Nimbiam ngut di bit bon ikos tut kan bi
21
1 <<Gino jittau kep tungwa hi di mai ei ngoi dumti ba, jikan tut no di yai nimai bak dima ei minu di jide TUHAN Allah miyai bije bi, 2 lene suar jide nibou nya kin nikei nya yuug nai mpia di nimbiam ngut joti nitingti leu minu ndig di jo dideu nya hagom. 3 Leu api suar nibou nya leu minu ndig di dideu bibor ijem sapi di nibo yo ningut gom di ibiyai midyai bigyo, 4 kwei ei minyei di biam kikau bipingge bi sren nipimat di tungwatu nya igyai miai eisi bigyo leu api suar idahat sapi dima ninggibi ei sirima. 5 Suar imam keret Lewi nya cem ibit yok. Lewo yoni rima ikos tut mun niba nisibut biyai munti nya. Jide TUHAN Allah dimig yoni ei binok awak mem Noni ba, indat kep nihyet di binjei mun di kei bak ide limwa nya tug hon Noni ninyeng ba, ikos tut mun di buhun di srou yok cem. 6 Leu api suar nibou nya leu minu ndig di dideu pima ipiap inda ei nai sapi dima dip, 7 Bipai <Nyeni nihwen nimbiam dima ba, nikan tut no di hwen di mai cem bi. 8 TUHAN e, ma akos ser Ade limwa nya di ateu yok bingwes ngun leu minu Mesir ide nitunggweisi. Ma akos ser nyende sisar lene ma abibon nyeni tereu nok yo di itug ndei nibuhunti drek dip no di ningon ngun dini di mai nok nimbiam dini au.> 9 Leu api TUHAN mibibon jeni tereu nok yo di itug ndei nibuhunti drek dip nimbiam dima bi lewo jiyai mun bit leu TUHAN nicuk jeti.>>Nicukti tut sop di ikat nok awak ei pranti
10 <<Tirigino jikon pran lene jide TUHAN Allah bindei ba, joom kep jide siceu nya leu api jikat yok nok awak ei pranti, 11 lene jigom ningon ngakei sop ubbu gom di srig yokti ba, ningon pri kep noni biyai nok nitnem. 12 Gi nok lene ma buwak sop dima ug ei nide ig bei lo, suar sop dima kos nibou nta leuj Lene bikos ninda ndungwakti cem leu, 13 lene ba jide sinsun biluei nide sinsun ngkiai cem ei sirima. Suar noni bong kikau ei ig bei ba, pim tut nide ndigpoi imaisi kikau mem bed nitindur gom. Nijam dima ngwig leu api no dima wak noni nok nitnem. 14 Gino no dima joi sut noni ei nidipti bu bi lene kes noni bimbut bit leu nijoi sutti hak ug. Ma no dima ubon noni nok awak ba, tri noni nok awak cem au. Lewo bidip huk noni ba, igyem njita tut yam tu.>>
Nicukti tut munggwom mighumbou de mun ninda rom
15 <<Gini ne nicukti mem tungwagom di wak nitnem ibou can ri. Ba, yahacem isrek tut munggwom pinai noro nitnem gi hi di ningon him ngi-ngat bi srek tut nipmot mighumbou. 16 Gino son dideu nituti mem no dima kos tut notou noni mikwas mun di nyeng tut nya tut nipmot bat nya lene ma ningon tti kin nitnem di ningon him ngi-ngat nipmot pima ba, kwas mun di nyeng tut nya tut au. Noro suar nipmot mighumbou pima ba nokep ndigban di nicig nyeng tut nya. 17 Mbro nok gino noni ne nicig nitnem ningon him ngi-ngat pima nipmot rin bi lo, suar nicig njei ndigban di nyeng tut nya mbican bram yam bak nipmot mighumbou dima. Suar nicig ndo nipmot mighumbou brei bak tungwatu nya lewo munggwom mighumbou dima dem mem gima ba nokep ndigban di nicig nyeng tut bit leu nok jide nikos tutti pai ei su.>>
Nicukti tut munggwom pinai di co kep nide ndigpoi nya
18 <<Gino munggwom pinai hi ningkek ndok ba, co kep nide ndigpoi nya ba, bit ighyet bi lene mbro nok gino ikes hukum ei noni dip lo, co kep yok kikau, 19 lene suar nide ndigpoi ikat noni bikes bak nibou nya ei minu ndig di yoni ibong niti dima leu binhyepo imbus ningonti. 20 Suar nide ndigpoi ipai bak nibou dima yok <Nyeni nipmot dini ningkek ndok ba, co kep nye bibit nyeni nihyet bi ba, bimangkrei mitiei ba, dut mun di pu no bijo ninno cem.> 21 Leu api suar timiei minu ndig dima iba tig bihwen munggwom dima kikau bimai ug. Tug hon nisinati dima mijicok tut mun di kinei dima leu jikieti. Apino limwa mben Israel mimiap tut mun di cut igkep no dima ba, yahagom ittin tut.>>
Nicukti nikenti nya
22 <<Tirigino jikes hukum nimai ei tungwagom dip drek dip niyai munti di kinei hi ba, jipindur ningut ei cou him, 23 lene ma jisindui sut nimai ngut dima bijo ei sirima mmun jei dima au. Noro suar jitig ei njap dima cem. Nimai ngut di ipindur ei cou him bindei ba, Allah misigion minu dima drek dip. Gima rino ma jitig nimai ngut dima leu binhyepo jibindei map kui minu di TUHAN Allah miyai bije bi.