Mun di imam nya ikwas tut yam
18
1 <<Yahak midyai imam ei Keret Lewi yahagom indati. Gima rino igyai dihyei hanjop nsi hi ei minu Israel mem yonti bi a. Noro ma yoni igyem kep mun di keret nindigsi ittei mem ibikuk yok bak TUHAN bitut mikwau di ibui bibam ei nimbar hum dokti bak TUHAN cem. 2 Harin dima yoni ima dihyei hanjop nsi noyam kin keret nindigsi nya a. Lewo TUHAN Nonti ne ide mun ninda rom rin bit leu gi Noni preu ei mem yok nipou su.3 Tirigino tungwagom jem sapi kin domba mem gima imam nya ibui bibam ei nimbar hum dokti bibikuk no bak TUHAN lene suar imam nya itug ndei mindhe dima nindimuhum nghui bei noho kin niji kin ninghop nok ide mikwau dima igyem ri. 4 Nok gima cem ma itug ndei ningat nimbie him leu gandum kin ba anggur ngei kin mini zaitun kin domba nta cem nok ide ri. 5 Jide TUHAN Allah dimig keret Lewi leu keret mben Israel nindigsi ikieti ba, inok imam bijo ninno bijo kikau.
6 Gino tungwagom di ntun keret Lewi him kwei leu minu ndig hiter ei minu Israel bibong ei mpia ttou nsi di TUHAN ndo ei su, 7 lene ma jisindui sut noni ba, yai midyai nok imam mem nide TUHAN Allah noyam kin imam Lewi nindigsi nya cem di igyai midyai ei sirima. 8 Lene ma noni cem tug ndei njita di nimangti noyam kin imam nindigsi nya ima pima nok nide. Lene noni ma mun di nide bat nya ikwas tut noni bou no cem.>>
Nibon munti di TUHAN ggai ser nya
9 <<Tirigino jicoi ug ei minu di jide TUHAN Allah miyai bije lene ma jiyai bram ngkiai nya di ibong ei minu dima ide nibon munti di kinei nya au. 10 Ma tungwa hi kwas nimunggwom bat nya nok mun di ibui bindig kep hum ei nimbar hum dokti au. Ma hi bon midut nikrau kep nihyet di dut ba, hi ninda dut ba, hi ba seig ngei bipijuk tungwatu nya ba, 11 hi kuk no bibindei ba, nung kui no ba, hi bon midut nimbrap bit yo di imai nya innei cem au. 12 Jide TUHAN Allah kou sut yo di ibon nibon munti di kinei dima yok. Gima rino Noni mibindei sar mben nya dima leu jingwak him drek dip. 13 Gima rino ma jiba jingon di gom boom jenti bijinok awak mem jide TUHAN Allah.>>
Allah mipinak nabi gom bak mben Israel
14 Lene Musa pai biyok <<Timiei minu di jitin ei mem jiyai bijiyati dima yahagom ibit nung nya ipingok yokti ba, iko binggok tut bindo. Noro TUHAN di nok jide Allah ce tut gi jibit leu yo dima igyai kepti dima bi. 15 Noni mipinak nabi gom leu jide mben di noyam kin da ndam je. Lene ma jibit nipingok jeti nya.
16 Tirigi po jinduk yam bijidem yam ei Nungug Sinai nimig pima lene jibidip huk da ser nhyema TUHAN di nok jide Allah mimbrap pijum bije ba, ndo Nonti bije tug hon hum di cig-cai bu au lewo jikan bigya mijimai drek dip. 17 Mpe dima ne TUHAN pai bida <Mun di ibidip huk na tut dima ne igbit ri. 18 Midipinak nabi gom leu ide mben di noyam kin nani ndam yok. Midisok dihyet tut dicuk yokti nya ei noni dip mem yoni leu binhyepo noni mitri tut dihyet hagom bak ade limwa nya yahagom. 19 Noni mitri tut nihyet biyok tug hon dinyeng leu api gino tungwa hi kou sut nabi pima nihyet lene midikes hukum ei no dima dip. 20 Noro gino nabi gom brim ningkek kep mben Israel bitri tut nonti ningon kanti biyok tirigi disok dihyet tut ditde nicuk yokti nya ei noni dip bi lene ma noni tug ndei hukum nimai drek dip nide sisar dima. Nok gima cem tut nabi gom di tri tut nung di ikuk yok bak nya ighyet bak Ditde limwa nya suar mai hak.>
21 Gino jihig jingon ei nabi gom nicuk jeti bijihig yam <Notou mem gima ikan mungkun tut bipia nabi nihyet dima kwei leu TUHAN i?> 22 Gino nabi gom ris mun bije tug hon TUHAN ninyeng lo, mun di noni ris bije dima pek kep mem je bi lene jo nibreisi bipia nihyet dima kwei leu TUHAN bi. Noro no dima tri tut nonti ningon kanti tug hon nonti ninyenga. Gima rino ma jidigit tut mun di tibim ei nuhui him au.>>