17
1 Ma jiba sapi kin domba di kinei bikuk je bak jide TUHAN Allah au. Lewo Noni kou sut gima bibor.2 Tirigino jimiap tut bipia bihi no ibon sisar tut jide TUHAN Allah ei minu ndig gom drek dip gi igyai mun tunggwei Nide nipreu ei mem jeti, 3 kin nicuk jeti tug hon gi ikuk yok bak mun nyeng hi ba, ibiyai ingon gom bak mun nyeng hi ba, ikuk yok bak mpia yaisi kin bed mmun cem ham nya cem, 4 lene suar jiyok jitta kep gima mungkun kei. Gino jit-jit mun di kinei dima srou tungwagom ei je di mben Israel jikieti, 5 lene suar jikri no di tunggwei sut mun dima ug ei nide minu ndig dima nisai leu api jiba tig bihwen kikau bimai hak ug. 6 Noro ma ibou can ibou ningai njiriek bu ipai sut nitunggweisi di ingat bou igyai him ug e leu api tug ndei nimai drek dip. Ma hi tug ndei nimai drek dip tungwagom ngat di ngat nitunggweisi dima bou niyai him nihyet he au. 7 Suar yo di ingat nitunggweisi dima bou igyai him rima iba tig bihwen no dima nimbie him ngat a. Leu api limwa nya yahagom iba tig bihwen bram bu. Tug hon jiyai munti dima lene jibidip tut mun di kinei dima leu jikieti.
8 Munhyet dino dem tut gima nikei nya ei mpia dima ikos tut kan bi di nggruk bibor bitut no di bisinggre biyai nimai bak tungwagom kin no di yai nimai bak tungwagom kin gi bisinggre ba, nihyet tunggwei yam tut mun di ijem bou yok nok ide cem nihwen yamti di bindei ba, ingkek bok cem lene suar juug sut munhyet dima ug ei mpia ttou nsi di jide TUHAN Allah ndo ei su. 9 Lene ma jipai sut munhyet dima bak imam Lewi nya kin nikei di yai midyai mem mpe dima leu api jisindui sut ba, ikos tut munhyet dima. 10 Tirigi ikos tut tu lene suar jinyohou hati tut mun nyeng di ipai bije nya. 11 Ma jice tut ikos tutti dima lene ma jibit ide nicuk jeti di buhun kin gi nggan cem hagom nok igbit. 12 Suar jiyai nimai bak yo di itte tut nikei nya kin imam nya di igyai midyai mem nijam dima ide nicuk jeti nya hak ug. Tug hon nisinati dima lene mijibidip tut mun di kinei dima leu Israel. 13 Apino tungwatu nya yahagom mimiap tut mun di cut ig kep no dima lene mittin tut ba, hi mibrim ningkek mem gima yai bram no dima nitunggweisi bu bi.>>
Nicukti nya tut nibou ndig
14 <<Tirigino jikieng kep minu di TUHAN Allah yai bije ba, jibong kep minu dima tu lo, hi rino jijoi sut nibou ndig gom ninyeng tak kep je noyam kin ngkiai nya di ibong ttai je di ibon ide nibou ndig nya. 15 Gi nok lene ma jinyohou yai sut jingon kanti dima leu binhyepo no di jikon nok jide nibou ndig dima ne no di jide TUHAN Allah dimig ei mem je ri. Ma jikon no di ngkiai nok jide nibou ndig au. 16 Lene ma nibou ndig dima ma kuda ningot ndig mem nide tentara nya ibri bigwam dip au. Lene ma noni cuk nide limwa nya ug ei minu Mesir mem gima pek kudai ei sirima au. Lewo TUHAN pai sut Nide limwa nya bipia ma ingkwei hanyen ug ei minu dima au. 17 Ma nibou ndig wak sop mang au. Leu binhyepo ba nghim bak TUHAN au. Lene ma noni ngat ningwes ei perak kin masti binyeng tut nindig bibor au. 18 Gino jikon tungwagom binok nibou ndig lene suar jipas kep srat ningat gom di tibim tut Allah niggai serti nya ba, srat dima ningat noyam kin srat ningat-ngat di imam Lewi nya igyok ei a. 19 Suar nibou ndig pwoi srat dima bikwop mmun-njap kikau leu binhyepo kwop-kwop nyen srat dima kikau ug bipek niyaijo ningwig honti. Leu binhyepo bingon tut gi kuk no bak nide TUHAN Allah lene ba ningon di gom bibit TUHAN nicukti nya di tibim ei srat dimati hagom kikau. 20 Gino ta nibou eisi bikwop mungkun kei lene mijo nibreisi mem nonti bipia noni kei-kau dor njiriek nide limwa nya bi. Gino noni ba ningon gom bikrau kep TUHAN nicukti nya lene noni kin ide nintun him yamti di bram yam nya minyeng tak kep Israel sindam bijo kikau.>>