Njap Ndig Paskah
(Kel. 12:1-20)
16
1 <<Ma jibon midut Njap Ndig Paskah mem bed Abib mem gima jibikon jide TUHAN Allah ninyenga. Lewo Noni teu je mem mmun bijingwes ngun leu minu Mesir mem bed dima. 2 Ma juug ei mpia di TUHAN ndo ei mem gima jikos jide kambir kin domba kin sapi ningut gom eisi nok mun di jibikuk je bak TUHAN ei Njap Ndig Paskahti dima leu binhyepo jibikon jide TUHAN Allah ninyenga. 3 Tirigi jiba mikwau bikuk je bak TUHAN ei Njap Ndig Paskahti dima lene ma jiyem kin roti dwoi au. Noro suar jiyem roti di roti ninjep srigsi bi ei ninsi njap muhwindacan nok mun di jibiyok ngon kep mpe di po jibipbur ba, jinang leu minu Mesir pima. Ma jiyem roti dima di indat kep ninyeng roti ninghuisi wei. Leu binhyepo tirigi jiyaijo ei dihyeisi dini mijiyok ngon kep njap po jibipbur ba, jinang leu minu Mesir di nok mpia di ninghuisi wei cut igkep je eisi pima. 4 Ma hi kon roti ninjep ei nide ig bei mem njap nitindur muhwindacan dima au. Lene suar jiyem mikwau di jibui bijibam mem mmun ei njap gi nimbie him pima bingwig hak mem mmun dima cem.5-6 Suar jibui mindhe-ndhe kep nibon midut Njap Ndig Paskah dima ei mpia ttou nsi di jide TUHAN Allah ndo ei su. Lene ma jibui ei mpia ttou nsi hiter ei minu di jide TUHAN Allah miyai bije dima nisurti-nipekti au. Ma jibon midut dima mem mpia nicutti noyam kin mpe di po jinang leu minu Mesir pima. 7 Ma jikwen mikwau dima bijiyem ei mpia ttou nsi di TUHAN Allah ndo ei su. Ba, njapti kui leu api jingkwei hanyen ug ei jide minu di jibong kep. 8 Suar jiyem roti dwoi bi kikau mem njap nitindur muhwindagom di gwam dip bu. Suar jidem yam ei ba, jikuk je bak jide TUHAN Allah ei njap gi nimuhwindacan. Ma jiyai kep midyai di jiyai kepti nya mem njap dima au.>>
Njap Ndig Nike Gandumti
(Kel. 34:22; Im. 23:15-21)
9 <<Ma jikinyon eisi ba, jikwop ninsi ari nitindur muhwindacan leu njap nimbie him di jike gandum, 10 leu api jibon midut Njap Ndig Nike Gandumti mem gima jibikon jide TUHAN Allah ninyenga. Njap dima lene ma jittei mun di jibikuk je bak TUHAN bit leu jijoi sutti bak Noni dem kep mun di kei di TUHAN yai di binyohou jiyaisi nimangti. 11 Suar jiyai nillei bit jimunggwom bat nya kin awak jide nya kin keret Lewi nya kin ngkiai nya kin moibihi nya kin kibom nya di ibong ei jide minu ndig nya. Ma jibon midut dima ei jide TUHAN Allah Noho bei ei mpia ttou nsi di Noni ndo ei mem je tu. 12 Ma jiba jingon di gom bibit TUHAN Allah nicuk jeti nya dini hagom. Lene ma jibbwe ser gi po jinok awak ei minu Mesir pima au.>>
Njap Ndig Ig Jibei Mpam Meng
(Im. 23:33-43)
13 <<Tirigi jipuk gandum ngat jide nya hagom ba, jikimut ba anggur ngat jide nya hagom cem biput leu su lene suar jibon midut Njap Ndig Ig Jibei Mpam Meng kikau mem njap nitindur muhwindacan. 14 Ma jingon nggei-hi-nggei bit jimunggwom bat nya kin awak jide nya kin keret Lewi nya kin ngkiai nya kin moibihi nya kin kibom nya di ibong ei jide minu ndig nya. 15 Suar jiba midut dima bikon jide TUHAN Allah ninyeng kikau mem njap muhwindacan ei mpia ttou nsi di TUHAN ndo ei mem je tu.
16 Suar pinai mben Israel yahagom ikwei kuk yok bak jide TUHAN Allah mbiningai ei nijam ari bingwam gom ei mpia ttou nsi di Noni ndo ei su. Nok idem yam ei Njap Ndig Paskah kin Njap Ndig Nike Gandum kin Njap Ndig Ig Jibei Mpam Meng. Bikwop tungwagom-gom suar ttei munkwas, 17 bit leu nide nisindemti dem kep mun di kei di jide TUHAN Allah yai di binyohou niyaisi nimangti.>>
Tut nibindei mbut nikrau kep mun di igbitti
18 <<Suar jita nikei nya kin nibou di igyai midyai hiter nya bikwop minu ndig di jide TUHAN Allah yai bije nya leu binhyepo iba ingon di gom bitri tut nikos tutti ei limwa ikieti. 19 Tirigi ikos tut mun nyeng hi lene ma iba ide ningon canti bikos tut ba, imbus nggok yo di inyeng jei nya cem au. Ma itindei hiter nindati tut mun nibingot kep yok au. Lewo mun nibingot kep dima tak kep tungwatu igyai bitut yo di ingon ki kin yo di ingon sren nya igyai ser apino gimbun ingon hukti tut mun di igbit kan bi. 20 Suar nikei dima yok ikos tut mun di igbit kikau leu binhyepo jiya timiei ba, jibong kei jigwam kei ei minu di jide TUHAN Allah miyai bije. 21 Gino jibon nimbar hum dok mem jide TUHAN Allah lene ma jitas kwar biei Asyera biya simiak nimbar dima au. 22 Lene ma jitas dihim tig mem gima jibikuk je bak cem au. Lewo jide TUHAN Allah kou sut niyai munti dima.