Ari bingwam gi nimuhwindacan
(Im. 25:1-7)
15
1 <<Bikwop ari bingwam gi nimuhwindacan ningwigsi lene suar jibon nidip tut ningwam nya. 2 Jiyai nok gini. Bikwop mben Israel di yai mitiei nok ningwam bak nisut mben Israel gom lene suar dip tut ningwam dima bit leu TUHAN Nonti nikos tutti lewo Noni ciu ser ningwam dima tu. Ma hi brim ningwam dima bu au. 3 TUHAN sindui sut ba, jibrim mitiei di jiyai nok ningwam bak ngkiai nya hanyen. Noro ma jibrim mitiei di jiyai nok ningwam bak jisut mben Israel gom hanyen au.4 Jide TUHAN Allah miyai mun di kei bak jeni ei minu di Noni miyai bak jeni. Apino jisut mben Israel leu jikieti hi nuhui mbum bi sren, 5 gino jipwoi TUHAN ningon ba, jiba jingon di gom bibit mun nyeng hagom di ditri tut bije njap di ammani gom-gom sindam. 6 Jide TUHAN Allah minjei mun di kei bak jeni dem igbit nipreu ei mem jeti. Mijiyai mitiei nok ningwam bak ngkiai nya imang bibor noro mijisuar nidahat mitiei nok ningwam leu yok bi. Mijinyeng tak kep ngkiai nya imang bibor noro ngkiai nya hi mininyeng tak kep jeni bi sren.
7 Tirigi juug bong ei dihyei di jide TUHAN Allah miyai bije leu api jingat lo, jisut mben Israel di bong ei jide minu ndig gom nuhui mbum lene ma jingkek ndok tut noni ba, jikou sut gi jingondut noni au. 8 Noro ma jingon mba ba, jiyai bidem nimangti di suar nya nok ningwam bak noni. 9 Ma jikou sut jiyai mitiei nok ningwam bak noni drek dip ari bingwam nidip tut ningwamti di dideu su au. Ma jisindui sut jikan-kan nyenti di kinei dima ba, pijuk jingonti au. Gino jikou sut jiyai mitiei nok ningwam bak no dima lene noni mahara bak TUHAN drek dip jingkek ndokti dima apino jingon mui. 10 Ma jiba ningon di mba kin ningondutti cem biyai mun di suar nya bak no dima leu api jide TUHAN Allah minjei mun di kei bak jeni tug hon jide midyai hagom di jiyai nya. 11 Jisut mben Israel di yuhui mbum ibou poi mingat rin ei jikieti bijo kikau. Gima rino dicuk jeni leu binhyepo jingon mba tut yoni.>>
Nibibon awak nyati
(Kel. 21:1-11)
12 <<Tirigino tungwagom tri nisut mben Israel pinai-sop gom nok awak bak nani lene suar awak dima yai midyai bit na ei nijam ari bingwam muhwindagom. Ba, ug ei ari bingwam nimuhwindacan nitausi lene suar akes noni hanyen leu midyai nok awak bimbut hak ug. 13 Noro ma asindui sut ba, awak di akes dima biba ninda ngwak bimbut hak au. 14 Ma aba angon di mba bikwas mun di ade TUHAN Allah yai bina nok kambir kin domba kin gandum kin ba anggur ngei tut noni. 15 Ma jiyok ngon kep bipia nipou yo lene jeni cem jinok awak ei minu Mesir leu api jide TUHAN Allah kwek je. Gima rino diyai nicukti dini bije.
16 Noro gino awak dima kou sut gima ug bihigom leu nani drek dip ningon di ngakei na kin ade ig bei nsi nya ba, joi sut bong bit na kikau, 17 lene ma abuwak noni ug ei jide dimbou hui ba, ahum nitingou meng a. Tug hon nisinati dima noni minok ade awak kikau bimai kep. Ma ayai nok gima tut ade awak sop cem. 18 Ma aba angon di kinei bikes ade awak gom bimbut leu na bihigom au. Lewo noni yai midyai bit na ei nijam ari bingwam muhwindagom tu. Gino abinai nide midyai di yai nya kin awak di yai midyai bibipek nimuhup lene ningat ne ade awak dima tug ndei nimuhup pwoi mien he.>>
Sapi kin kambir kin domba nipmot bou nya
19 <<Ma jikwas sapi kin kambir kin domba nipmot bou nya hagom tut jide TUHAN Allah. Ma jiba sapi nipmot bou nya dima bikkin dihyei ba, jikos domba nipmot bou dima ninta leu cem au. 20 Bikwop ari bingwam lene jiya tut jide ig bei nsi nya ba, jibam mindhe-ndhe dima bijiyem ei jide TUHAN Allah Noho bei, ei mpia ttou nsi di Noni ndo ei su. 21 Noro gino mindhe-ndhe dima kinei nok nimig lit e, he niyai tu e, he bon nikineisi hi gom bu e, lene ma jiba mindhe-ndhe dima bikuk je bak jide TUHAN Allah au. 22 Bikwop tungwagom-gom di nipuig kwes kin gi map kui cem ma yem mindhe-ndhe dima hak ei ig bei noyam kin gi igyem rusa nghui kin kijang nghui. 23 Ma igyem ninggrom di huisi au. Noro suar ikiber ninggrom ug ei dihyeiti noyam kin isiber minyei.>>