Ningon ngguk tut nimai tug hon nisinati di Allah ggai ser
14
1 <<Jeni ne TUHAN Allah de limwa nya ri. Gima rino mpe di jingon ngguk tut nimai lene harin dima jidigo jingkek dip ba, jikak jibou nta bei jingwak dip leu cem noyam kin ngkiai nya igyai kepti a. 2 Jide TUHAN Allah ninyeng tak kep je. Noni mbus jengkom bijinok Nide limwa nya leu mben nindigsi di ingat rin ei dihyei njek dip dini hagom.>>Mindhe-ndhe gi kwes kin gi map kuisi
(Im. 11:1-47)
3 <<Harin dima jiyem mindhe-ndhe di map kuisi ninghui a. Lewo TUHAN pigig ser hagom. 4 Ma jiyem kep mindhe-ndhe di nok sapi kin domba kin kambir, 5 kin rusa kin domba kin kambir bigbehei nya kin kijang cem yahagom inghui, 6 bitut mindhe-ndhe di bon ninjou nggram di itai-tai nyen njita di ipinde tu hanyen cem. 7 Ma jiyem mindhe di bon ninjou nggram bi di tai-tai nyen njita di ipinde tu hanyen bi ninghui au. Ma jiyem unta kin mikwou mbrei kin minmei mbrei cem ninghui au. Mindhe-ndhe dima yok ne mindhe nipigig ser rin lewo map kuisi. Lewo mbro nok gino itai-tai nyen njita di ipinde tu hanyen lo, ibon injou nggram bi. 8 Ma jiyem na nghui cem au. Mindhe dima ne mindhe nipigig ser rin lewo map kuisi. Mbro nok gino na bon ninjou nggram lo, tai-tai nyen njita di pinde tu hanyen bi. Ma jiyem na nghui ba, jingget na di mai ei cem au.
9 Ma jiyem bidem wau ninyeng di bon nikra kin ninnan ninghui hagom. 10 Noro tut mindhe-ndhe di niyaijo ei minyeisi lo, bon nikra kin ninnan bi ne mindhe nipigig ser rin ba, map kuisi. Gima rino ma jiyem ninghui au.
11 Ma jiyem bidem ha ninyeng di map kuisi bi nya ninghui hagom. 12-18 Noro ha ninyeng poi rino ma jiyem au a. Bitut ha krubri kin hatam kin swen kin kusin ninyeng hagom kin ha nasar kin miniwou kin ha unta kin nsrieu kin ha bangau kin kindus kin ha undan kin ha kasa kin hakom cem.h
19 Map kui mindhe nimien di bon ninyehei hagomti ba, mindhe dima ne mindhe nipigig ser ri. Gima rino ma jiyem au. 20 Noro mindhe di bon ninyehei di nipui kwes di ipigig ser bi ne ma jiyem hak ug.
21 Tut mindhe di nonti mai lene ma jiyem ninghui au. Noro ma jisindui sut ba, ngkiai nya di ibong timiei ei jikieti igyem mindhe dima ninghui a. Jitri nok mikwau bak ngkiai nya di ikwei cem kep je. Noro jeni ne limwa di jide TUHAN Allah dimig pijum ei mem Nonti ri.
Gino jikwen domba pmot ninghui e, he kambir pmot ninghui e, lene ma jiba nipmem nido ngei bikwen ei yeng gomti au.>>
Nicukti tut nikwas gom leu ningot gomti
22 <<Suar jikwas ningat gom leu njita ningot gom bibikwop nok di jiyai kwei leu jide miaisi nya hagom ei bikwop ari bingwam. 23 Lene ma jiyem njita ningat gom leu ningot gom bibikwop nok di jibikuk je bak TUHAN ei jide TUHAN Allah Noho bei ei mpia di Noni ndo ei nok mpia ttou nsi mem gima jikuk je bak Noni eisi. Ningat gom leu ningot gom bitut gandum kin ba anggur ngei kin mini zaitun kin jide sapi kin kambir kin domba nipmot bo nya hagom. Ma jiyai kep midut dima leu binhyepo jibiyok ngon kep nisinati tut nibikuk je bak jide TUHAN Allahti bijo kikau. 24 Gino mpia ttou nsi di Noni ndo ei su pima jo ting bibor leu jide ig bei ba, bit bon jittei njita ningat gom leu ningot gom bibikwop nok di jiyai leu jide miaisi tug hon jide TUHAN Allah nisingat tut jeti dima ba, juug sut ei sirima kan bi, 25 lene ma jitri njita nikwas pima bijibipek mitiei. Leu api jittei ninghoi mitiei dima ug ei mpia ttou nsi po jide TUHAN Allah ndo ei su pima. 26 Ma jiba mitiei dima bipek mun nyeng di jijoi sut ei mpia ttou nsi dima nok sapi nghui e, he kambir nghui e, he domba nghui e, he ba anggur ngei e, he mun ngei di pu je bi e, nya. Leu api jiya tut jide ig bei nsi nya bijiba jingon di nggei-hi-nggei biyem njita dima bit yam ei jide TUHAN Allah Noho bei.
27 Lene ma jingkek ndok tut keret Lewi di ibong ei jide minu ndig nya ba, jibibon yok nok nikinei-kinau au. Ma jiyok ngon kep bipia yoni ima dihyei hanjop nsi hi bou yok nok ide bi. 28 Bikwop ari bingwam niningai ningwigsi lene suar jittei njita ningat gom leu ningot gom di jiyai kwei leu jide miaisi pima ba, jinju keyam ei jide minu ndig nya. 29 Njita dima mem keret Lewi lewo yoni ima dihyei hanjop nsi hi bou yok nok ide bi. Lene hi mem yo di yuhui mbum di ibong ei jide minu ndig nya kin munggwom moibihi nya kin kibom nya kin ngkiai di ibong timiei bit je cem yahagom. Ma jisindui sut yoni ba, ikwei yai mun nyeng hagom di isuar nya. Suar jibit nicuk jeti dima leu api jide TUHAN Allah minjei mun di kei bak jeni tut jide midyai di jiyai nya hagom.>>