Minu ndig ninang coi nya
(Bil. 35:9-28; Yos. 20:1-9)
19
1 <<Tirigi jide TUHAN Allah bindei sar mben dima yok leu jingwak him lene yai ide minu bije leu api jibong ser ide minu ndig nya kin ide ig nya ba, jibong kei jigwam kei eisi tu, 2-3 lene suar jidimig minu ttou nsi di jinyeng tak kepti dima ningaisi. Bikwop minu ttou nsi ningai dima bon nide minu ndig ninang coi gom di krop mem no di yai nimai bak hiter minang coi minu ndig dima ba, ningwes ngun. 4 Gino tungwagom yai nimai bak hiter di nok nide siceu bi kin gi bisinggre bi lene ma nang bicoi ug ei minu ndig ninang coi dima gom apino ningwes ngun. 5 Ibingon nok gini. Gino ibou can ittei yam ba, icoi baham nitindurti mem gima iwim biei leu api hi wim biei rino oi ho hak leu oi ka bindei nisut bimai. Lene ma no di yai nimai bak nisut kin gi bisinggre bi dima nang bicoi ug ei minu ndig ninang coi pima gom leu binhyepo ningwes ngun. 6 Leu gino minu ndig ninang coi gom ngat he lene hi rima ninang ug ei sirima cem ting bibor ba, nimbiam dima nide bat nya di dem mem gima ibuhup kin hukum drek dip nimai miyuhuk bram no dima lene iba ningon di sibui biyai nimai bak no di bon mun tunggwei bi pima. 7 Gima rino dicuk je mem gima jidimig minu ndig ninang coi ningat ningai ei.8 Tirigino jide TUHAN Allah bindei bres jide minu nijeisi kin ninyanti noyam kin gi po Noni preu ei mem jidigup bat-jidigai bat nya pima ba, yai minu dima titut yam bije tu, 9 lene ma jidimig minu ndig ninang coi ningat ningai ei bu. (Noni miyai minu dima bije gino jingon ngakei jide TUHAN Allah ba, jiyai igbit mun nyeng hagom di ditri tut bije njap di ammani ba, jibit jide TUHAN Allah ningginau jeti nya cem.) 10 Ma jiyai igbit dicuk jeti tut minu ndig ninang coi nya pima leu binhyepo jibon sisar tug hon gi jisindui sut ba, hi yai nimai bak no di bon mun tunggwei bi dima ei minu di jide TUHAN Allah miyai bije dima au.
11 Noro gima ter leu tungwagom di ba ningon di sibui biya ser nide siceu lene bisinggre biyai nimai bak leu api nang bicoi ug ei minu ndig ninang coi hi mem gima bicuon nonti niyaisi. 12 Tut gima lene suar nibou nya ei no dima nitimieisi ijem no dima kwei ba, ikes bak nimbiam nide bat di dem mem gima ibuhup tut nibon mun bak nimbiam pimati leu binhyepo igyai nimai bak hak ug. 13 Ma jingondut noni au. Tug hon nisinati dima mijikwek mben Israel bingwes ngun leu sisar nihwen nimbiam dima. Leu binhyepo jibong kei jigwam kei.>>
Niggai ser nison cou di ita ei hanjop niya kwas yamti
14 <<Gino juug krau minu di jide TUHAN Allah miyai bije tu lene ma jison jisut bat di ibong gahai je nya ide cou di ita ei hanjop niya kwas yamti nipou su nya au.>>
Nicukti tut yo di ingat mun nyeng hi bou igyai him
15 <<Gino no di niyai ngat nongkom ngat he pai sut hiter bipia yai mun tunggwei tu lene tungwagom ngat dima nibakilak no dimati dem bi. Suar ibou can di ingat no dima niyai mun tunggweisi bou igyai him ibakilak no dima lene dem. 16 Gino tungwagom ba nimbuk bipai kep hiter mikuisi ei nikei noho bei, 17 lene ma yahacem yuug ei mpia ttou nsi gom di TUHAN ndo ei mem jikuk je biNoni eisi dima leu binhyepo imam nya kin nikei nya di igyai kep ide midyai nya mimbus yo cin dima ingonti. 18 Suar nikei nya imbus ingonti nok gi igbit. Ne gino jo nibreisi bipia no dima pai kep nisut mben Israel mikuisi lene, 19 ma noni tug ndei hukum dima biluei no po noni pai kep mikuisi pima. Tug hon nisinati dima lene mijiciu ser sisar dima leu jikieti. 20 Apino tirigi mben Israel nindigsi ikan tut mun di cut igkep no dima lene yahagom midigit tut sisar di kinei bibor dima bicut eisi bu bi. 21 Tirigi sisar di nok gima srou tungwagom lene ma jingondut noni au. Ma jiba jiyaisi biluei igyaisi lene jiba jiyai njep biluei igyai njep lene jiba jikwai biluei ikwai lene jiba jinda biluei inda lene jiba jimig biluei imigya.>>