Allah nicuk nyeti gom di bon ninyenga
6
1 <<TUHAN di nok jide Allah cuk da bipia suar dingginau je tut Nide nicukti nya. Lene hagom ndia ri. Ma jibit nihyet hagom tirigi jibong kei jigwam kei ei minu di jitin ei mem jiya bidem eisi. 2 Ma jeni kin jide nintun him yamti di bram yam nya jahagom jikon TUHAN di nok jide Allah ninyeng kikau ug bipek jiyaijo ningwig honti. Ma jibit Nide nicukti di ditri tut bije tu leu binhyepo jide njap jei bibor ei minu dima. 3 Je di mben Israel e, ma jintu kep nicukti dima yok lene ma jibit hagom! Gi nok lene mijibong kei mijigwam kei apino jide mben nya midigek kep mpia tirigi jikieng kep minu di nnum bibor dima bit leu nok TUHAN di nok jidigup bat-jidigai bat nya ide Allah preu ei su.4 Je di mben Israel e, ma jiyok ngon kep bipia TUHAN Nongkom he rino ide Allah! 5 Ma jiba jingonti titut kin jinnei titut kin jide nisindemti titut bingon ngakei TUHAN di nok jide Allah. 6 Ma jingon prion ser nicukti dini yok di ditri tut bije njap di ammani jit au. 7 Ma jingginau jimunggwom bat nya tut hagom. Ma jisimbot kep biyam tut hagom ei jide ig kin puig sinon cem tirigi jibong kep jinghuisi bijiyai kep jide midyai nya cem. 8 Ma jiba nicukti dima yok bikri jinda pang ba, jibikri jingwakd nok bindo. 9 Ma jipas kep nicukti dima yok ei jide ig hyei di jo dimbou him kin dimbou heisi di jitu ei ngug tig di bikrop ttai jide minu nya cem.>>
Musa sok kep yok ser nhyema ipigau nicukti nya au
10 <<TUHAN di nok jide Allah miyai dihyei hanjop nsi bitut minu nindig bibor di jiwin bi nya di mpung tut ndigban bije bit leu nok Noni preu ei mem jidigup bat-jidigai bat di Abraham kin Ishak kin Yakub nipou su. 11 Ig nya ei minu pima mimpung tut ndigban di kei bibor di jo habiei di jinju bou jinda him eisi bi. Minyei bousi nya di jitig bou jinda him bi nya kin ba anggur ninjem kin biei zaitun ninjem di jita bou jinda him bi nya no rinaha. Tirigi TUHAN buwak je ug ei minu dima ba, jinyeng tut njita di jirai sut ninyeng hagom tu lene, 12 ma jingon sok kep jenti leu binhyepo jingon prion ser TUHAN po teu je bijingwes ngun leu mben Mesir di yuubon je nok awak pima au. 13 Ma jikon TUHAN di nok jide Allah ninyeng lene ma jikuk je biNoni cem jiba neheng bipreu mun ei tug hon Noni Nongkom ninyenga. 14 Ma jikuk je bak nung di ngkiai nya di ibong ttai je ikuk yok bak nya au. 15 Gino jikuk je bak nung nya lene TUHAN di nok jide Allah ningon misibui sut je apino mijimai bijingwig. Lewo TUHAN di nok jide Allah di ningat rin ei jikieti kou sut gima jikuk je bak nung nya.
16 Ma jibingon TUHAN di nok jide Allah hanyen nok gi nipou po jibingon Noni ei Masa pima au. 17 Ma jibit nicukti di Noni yai bije tu nya hagom. 18 Gino jiyai igbit nicuk jeti nya di kei bibor ba, sren kei cem lene mijibong kei jigwam kei leu api mijiyai nisindemti mem gima jikieng kep minu di bon ninnumti po Noni preu sut ei mem jidigup bat-jidigai bat nya pima. 19 Lene mijiyai nisindemti mem gima jihwen jide siceu nya bingwig bit leu nok TUHAN preu ei mem je tu.
20 Lene ei nidipti bu tirigi jimunggwom bat nya mihig ser je <Nggon rino TUHAN di nok nyeni ide Allah cuk nye bipia ibit nicukti dini yok hagom i?> 21 Lene ma jibuhup <Gi nipou lene ninok awak mem nibou ndig mben Mesir noro TUHAN teu nye biningwes ngun tug hon Nide nisindemti di nindig bibor. 22 Nyeni ningat mun di mindur kin mun di buhun di TUHAN bibon bak nibou ndig mben Mesir kin yo di igya kui noni kin nide limwa nya yahagom bou nyeni niyai him tu. 23 Noni kwek nye leu minu Mesir bibuwak nye kwei biyai minu dini hagom binye bit leu nok Noni preu sut ei mem idigup bat-idigai bat nya nipou su. 24 Lene TUHAN di nok nyeni ide Allah cuk nye bipia ma ibit nicukti dini yok hagom ba, ikon Nonti ninyeng. Gino igyai hagom igbit lene Noni minyohou nye di mben Israel bibindei ba, ibong kei igwam kei. 25 Gino nyeni iba ingon di gom bibit nicuk nyeti nya hagom lene Noni mijoi sut nye.> >>