Allah Nicukti Simnai
(Kel. 20:1-17)
5
1 Lene Musa nduk mben Israel yahagom kwei ba, idem yam ei su leu api noni pai biyok <<Disut bat jen, ma jingig jitingou mem niggai serti nya di diyai bije njap di ammani hagom. Ma jingginau yam tut nicukti dima yok ba, jiba jingon di gom bibit hak. 2 Ide TUHAN Allah bon gi preu gom ei Nungug Sinai, 3 bit idigup bat-idigai bat nya he bi noro gi preu dima mem nye di ingat rin ei mpia dini yahagom cem. 4 TUHAN joi sut mbrap bit je pijum leu hum njengti ei nungug dip pima. 5 Noro jittin tut hum njengti pima apino jibrim jingkek mem gima jikui nungug dima bi. Gima rino mpe dima ne diya hacan mem jeni kin TUHAN bidindat kep TUHAN nihyet bak jeni.6 TUHAN tri tut <Dani ne jide TUHAN Allah di teu je bijingwes ngun leu minu Mesir mpia po yuubon je nok awak eisi pima ri.
7 Harin dima jikuk je bak nung di mipror yon a. Noro ma jikuk je biDangkom he.
8 Harin dima jibon kwar bou jinda him mem gima jikuk je bak ba, jiba gima bingon mun nyeng hi di jo ei mpia-bbed him kin dihyeisi dini kin gi jo ei minyei jou ei dihyei jou cem a. 9 Harin dima jikuk je bak kwar di nok gima bijinggei sut a. Lewo Dani ne jide TUHAN Allah rin ba, dem tut gima jiba Da bingon mun nyeng hi cem bi. Lewo midikes hukum ei yo di ikinei sut Dani dip kin ide nintun him yamti di bram yam nya dip bitut ignyon bat-idrot bat nya kin yo di intun yok him bram yam cem dip. 10 Noro midingon ngakei yo di ingon ngakei Da bibit dihyet kikau ug bipek ibou sribu-ribu di intun yok him bram yam.
11 Harin dima jindat dinyeng ugwai-gwai a. Lewo Dani ne jide TUHAN Allah rin ba, midikes hukum ei yo di iba dinyeng bikek nya yahagom dip.
12 Ma jipiga Njap Nigwam Kep Ninghuisi ei ba, jitug hon njap dima nok njap di kwes bit leu nok Da di dinok jide TUHAN Allah dicuk je tut tu. 13 Dikwas njap muhwindagom tut je mem gima jibiyai jide midyai nya eisi. 14 Noro njap nimuhwindacan ne Njap Nigwam Kep Ninghuisi pijum mem Da rin lewo dinok jide TUHAN Allah. Harin dima hi yai midyai mem njap dima a. Dicukti dini mem jeni kin jimunggwom bat nya kin awak jide nya kin jide mindhe-ndhe nihyen kep nya kin ngkiai di ibong timiei srig jikieti cem yahagom. Tut awak jide nya lene suar igwam kep inghuisi noyam kin jeni cem. 15 Ma jiyok ngon kep bipia nipou yo lene mben Mesir yuubon je nok awak. Leu api Da di dinok jide TUHAN Allah diba nisindemti di nindig bibor bikwek jeni. Gima rino dicuk je bipia ma jibon midut nibiyok ngon kep Njap Nigwam Kep Ninghuisi a.
16 Ma jikon jicig bat-jipmem bat nya inyeng ba, jinyohou yok. Gini ne jide TUHAN Allah nicuk jeti rin leu binhyepo jibong kei jigwam kei ba, jide njap jei ei minu di midikwas tut je.
17 Harin leu dima jibisinggre bijiyai nimai bak hiter a.
18 Harin dima hi nitnem kin hi nijjep icut tut yam a.
19 Harin dima jinggimang mun nyeng hi a.
20 Harin dima jiris mun ei hiter dip a.
21 Harin dima jingon pri kep mun nyeng hi di jisut nyeng tut a. Nok nide ig di bong niti kin nide dihyei kin nitnem kin awak nide nya kin nide mindhe-ndhe nihyen kep nya kin nide keledai nya cem hagom.>
22 Gini ne TUHAN nicukti nya di diyai bije ei mpe di po jidem yam ei nungug pima ri. Tirigi po Noni ba nihyet di dem kep kru di cut leu hum njengti kin bumbuhui di ndok pima bitri tut nicukti dima bak jeni he lene bak hiter bi. Leu api Noni pas kep nicukti nya dima ei tig pas canti biyai sut bak dani.>>
mben Israel ittin bibor
(Kel. 20:18-21)
23 <<Mpe di po hum njeng srei ei nungug titut yam ba, jimiap nihyet di tibim kwei leu nidinditi lene jide nibou mben nya kin limwa ide ndigpoi di inyeng jei nya ikwei ngat dani. 24 Ba, ipai <Ide TUHAN Allah ndo tut Nide nisindemti di nindig bibor kin Nide nikei-kau-keisi tirigi nimiap nihyet di tibim kwei leu hum njengti. Njap di ammani nyeni ningat bou niyai him bipia mbro nok gino Allah mbrap bit tungwatu nya lo, igyaijo yo lene imai drek dip bi. 25 Noro nggon rino ninggok nimai eisi hanyen bu i? Hum di cig-cai nindig bibor dima mibindei sar nyeni! Nikan tut bipia gino nimiap TUHAN Allah nihyet tibim kwei hanyen bu lene minimai hak ri. 26 Tungwa hi di miap Allah Di Niyaijo mbrap kwei leu hum njengti no niyaijo yo e? 27 Gima rino Musa e, ma angkwei hanyen ba, amiap kep mun nyeng hagom di ide TUHAN Allah mipai binye leu api akwei tri tut mun nyeng di Noni sok ei nani dip hanyen binyeni. Lene minimiap kep ahyet binibit Nide nisok ei na dip dima hagom.>
28 Lene mpe di po TUHAN miap jihyet pima lene pai bida <Dimiap mun di ade limwa nya yahara nani tut tu ba, ipaisi dima ne igbit ri. 29 Nna ba itin ei ingon kanti di nok gima kikau ug! Gino yoni inggei sut Da kikau bibit dicuk yokti nya hagom lene yoni kin ide di intun him yok di bram yam nya mibong kei migwam kei bijo ninno bijo kikau. 30 Nogindini ma angkwei hanyen ndam yok ba, akes yok leu binhyepo ingkwei hanyen ug ei ide prak meng yati gom-gom hanyen. 31 Noro Musa e, angkwei hanyen bit yok au. Ma agwam bit Da ei mpia dini leu api midiyai Ditde nicukti nya kin dikos tutti nya hagom bina. Angginau yoni tut mun dima hagom leu binhyepo ipwoi dingon ei minu di midiyai biyok.>