Musa sok kep mben Israel leu binhyepo ibit Allah nihyet
4
1 Lene Musa pai bak nide limwa nya <<Ma jibit nicukti di dingginau je tut hagom leu binhyepo jibong kei jigwam kei ba, jidigek kep mpia ei minu di TUHAN di nok jidigup bat-jidigai bat nya ide Allah miyai bije cem. 2 Ma jiba jide nicukti bikum eisi ba, jikus hi bijicom ei au. Noro ma jibit TUHAN di nok jide Allah nicukti di ditri tut bije hagom. 3 Jahagom jingat mun po Allah bibon ei Nungug Peor pima bou jiyai him tu. Noni hwen jide bat nya di ikuk yok bak Baal ei sirima yahagom bingwig. 4 Noro je dino jingon gom tut TUHAN di nok jide Allah ei mpia dima ne jiyaijo kikau kwei bipek ammani kep.5 Dingginau je tut nicukti pima hagom bit leu nok TUHAN di nok ditde Allah nicuk dati tu. Ma jibit nicukti dima hagom tirigi jibong kei jigwam kei ei minu di jitin ei mem jicoi eisi. 6 Ma jiba jingon gom bibit nicukti nya hagom apino ngkiai nya mingat bou igyai him bipia jingon ki. Tirigi yoni imiap tut niggai serti dima lene yahagom misimbot kep bipai biyam <Mbenjen! Mben di nindig bibor dini ingon ki ba, ingon tek cem.>
7 Ngkiai nya di isindem bibor nindigsi hi bon nide kwar di ngig nitingou mem ighyet tirigi mun di buhun cut igkep yok bi. Noro TUHAN di nok nyeni ide Allah ningat rin bit nye ba, Noni buhup nyeni ighyet hammi tirigi yahara Noni. 8 Ngkiai nya di isindem bibor nindigsi hi bon niggai serti di sren kei dem kep nok nicukti di dingginau je tut njap di ammani bi. 9 Ma jiyok ngon kep mun di jingat bou jiyai him kikau ug bipek jiyaijo ningwig honti lene ma jingon prion ser au. Ma jitri tut mun dima yok hagom bak jimunggwom bat nya kin jignyon bat-jidrot bat nya. 10 Tut njap po jiya ei TUHAN di nok jide Allah Noho bei ei Nungug Sinai pima. Mpe dima ne Noni cuk da bipai <Ma anduk ade limwa nya yahagom kwei leu binhyepo ingig itingou mem dihyet. Leu binhyepo ipwoi dingon bibit dihyet hagom kikau ug bipek igyaijo ningwig honti. Lene ma inyohou pingok imunggwom bat nya ingonti leu binhyepo yoni cem ibit dihyet.>
11 Ma jitri bak jimunggwom bat nya tut gi jahagom jinduk yam ug ei nungug dima nikiou di hum nimmup di ndok bibor dem kep bumbuhui di ndok bibor nggai kep mun nyeng hagom ba, hum ninjeng srei bikui ug ei mpia-bbed him. 12 Mpe dima ne TUHAN nihyet tibim kwei leu hum njengti dima ei jitingou nsi ba, jimiap nihyet noro jingat ningat bou jiyai him bi. 13 Mpe dima ne Noni tri tut mun di suar jiyai kep nya leu binhyepo jibit mun po Noni preu kep je tut pima. Ma jibit Nicukti Simnai di Noni pas ei tig mma canti tu pima. 14 TUHAN cuk da <<suar dingginau je tut Nide nicukti nya hagom. Ma jibit hagom tirigi jibong kei jigwam kei ei minu di jitin ei mem jicoi eisi.>>
Musa sok kep yok ser nhyema ikuk yok bak kwar nya au
15 <<Ma jiyok ngon kep bipia tirigi po TUHAN nihyet tibim kwei leu hum njengti ei Nungug Sinai ei jitingou nsi pima lene jingat Nonti ningat bou jiyai him bi. 16 Gima rino ma jingon sok kep jenti leu binhyepo jibihi jibon kwar di nok nipinai kin nisop, 17 kin mindhe-ndhe nya kin ha nya, 18 kin mun di srei ei dihyeisi kin wau bou jinda him au. 19 Nok gima cem ma jisindui sut mun di jingat bou jiyai him ei mpia-bbed him nok mpia njap kin bed mmun kin ham nya biris je bijikuk je biyok au. Lewo TUHAN di nok jide Allah sindui sut ngkiai nindigsi nya hagom ei gwam nibehei dini bikuk yok bak mun dima yok. 20 Noro Noni teu je bijingwes ngun leu minu Mesir di nok mpia po jiyai jinghuisi wei nindig bibor eisi pima tu. Lene Noni buwak je kwei ei minu dini bibon je nok Nide limwa nya kikau kwei bipek ammani kep.
21 Noro TUHAN di nok jide Allah ningon sibui sut da drek dip je lene Noni sok kep da tug hon neheng bipia midisigon Minyei Yordan bit je tirigi jikieng kep minu di nnum bibor di Noni miyai bije dima bi sren. 22 Jei bi lene mijicoi ug ei minu di nnum bibor dima leu api mijidigek kep mpia. Noro midibit je bi. Diyaijo mingwig hon ei mpia dini hak ug. 23 Gima rino ma jingon sok kep jenti ser nhyema jingon prion ser gi preu di TUHAN preu ei mem je au. Ma jibit nicuk jeti nya ba, jibon kwar di jikuk je bak nya hi bou jinda him au. 24 Lewo TUHAN di nok jide Allah dem kep nok hum di cig-cai ba, Noni kou sut mun di jikuk je bak nya.
25 Tirigi jibong kei jigwam kei ei minu dima wer ninno ba, jibon jimunggwom bat nya kin jignyon bat-jidrot bat nya tu lene ma jibon sisar tug hon gima jibon kwar di jikuk je bak hi bou jinda him au. Mun dima ne sisar ei TUHAN niyai him rin lene mibindei ba, ningon sibui sut je. 26 Gino jibit dihyet bi lene mpia-bbed him kin dihyeisi dini mitou kep je nok tungwagom di mipai brei sut jiyai munti nya lene jei bi mijipror hak leu minu di jibong kei jigwam kei eisi ei Minyei Yordan nite dima ug ug ri. Mijibong ser minu dima mem nituti poi he leu api TUHAN mibindei ba, jimai bijingwig. 27 Noni mibindei ntek je srig ngkiai nya ikieti leu api jibou poi he mijingwes ngun. 28 Mijikuk je bak nung di ngkiai nya ibon bou inda him nok kwar di iba biei kin tig bibon di bit bon ingat mpia bi lene imiap mun bi lene igyem njita bi lene itinip kan bi au. 29 Mpe dima ne mijinggok tut TUHAN di nok jide Allah ba, gino jiba jingon di gom binggok tut Noni lene mijingat Noni. 30 Tirigino mun dima yok hagom pek kep mem je apino mun di buhun bibor cut igkep je lene mijingkwei hanyen ndam TUHAN di nok jide Allah lene mijibit nihyet. 31 Lewo TUHAN Allah ne jide Allah di ngondut tungwatu nya nindig bibor ri. Noni mikes je bihigom ei bi ba, mihwen je bijingwig bi. Gima cem ningon miprion ser mun po Noni preu ei mem jidigup bat-jidigai bat nya pima bi.
32 Ma jiba jingon bisrip huk nijam gi nipou nya kin nijam tirigi jipmem bat nya isrek tut je bigyo kin nimbie him tirigi po Allah pai tes tungwatu nya ei dihyeisi dini ba, jiput ser dihyeisi dini ninjek dip hagom. Dihig ser je bipia mun di mindur nok gini hi pek kep mem tungwatu nya nipou su e? Tungwatu nya imiap tut mun di mindur nok gini ninghapti tu e? 33 Dihig ser je bipia mben hi ingwes ngun bigyaijo niabiati imiap kwar di ikuk yok bak nihyet tibim kwei leu hum njengti dem kep nok mun di pek kep mem je tu e? 34 Dihig ser je bipia kwar di tungwatu nya ikuk yok bak hi sindem mem gima ug dimig mben gom leu mben nindigsi nya ikieti ei ba, ninyeng tak kep yok e? Noro TUHAN di nok jide Allah dimig jeni ei leu mben Mesir ikieti tu. Noni ribindei dino nsuwer ajar kin pran cut igkep yok. Noni bon mun di mindur nya kin bindo nya kin mun di bindei dino tungwatu nya ingon ttin bibor tug hon Nide nisindemti di nindig bibor bou jiyai him tu. 35 Allah ndo mun dini yok hagom brei bije nok mun di bindo bipia Nongkom ne Allah rin lene kwar di tungwatu nya ikuk yok bak hi ningat rin bi. 36 Noni sindui sut je bijimiap nihyet di tibim kwei leu mpia-bbed him leu binhyepo bingginau je. Noni sindui sut je bijingat Nide hum njeng di mindur ei dihyeisi dini leu api Noni tri tut nihyet bije leu hum dima. 37 Noni dimig je ei su lewo ningon ngakei jidigup bat-jidigai bat nya leu api buwak je bijingwes ngun leu minu Mesir tug hon Nide nisindemti di nindig bibor. 38 Noni jji mben di nindig bibor ba, isindem bibor cem bingwig leu joho bei tirigi jikieng kep dihyeisi dini. Noni buwak je bijicoi ug ei ide minu bijinyeng tak kep nok jide minu kikau kwei bipek ammani kep. 39 Gima rino njap di ammani ma jiyok ngon kep lene ma jingon prion ser TUHAN di nok Allah di ninyeng tak kep mpia-bbed him kin dihyeisi dini cem au. Lewo Allah hiter hi ningat rin bi. 40 Ma jibit Allah nicuk jeti nya di ditri tut bije njap di ammani apino jeni kin jide nintun him yamti di bram yam nya mijibong kei mijigwam kei ei minu di TUHAN di nok jide Allah miyai bije nogindini ba, bijo ninno bijo kikau cem.>>
Minu ndig ninang coi nya ei Minyei Yordan nite bei mpia nipriti
41 Leu api Musa ndo minu ndig ningai ei Minyei Yordan nite bei mpia nipriti, 42 binok minu ndig ninang coi nya. Gino tungwagom bisinggre biyai nimai bak no di nok nide siceu bi sren lene ma nonti nang bicoi ug ei minu ndig pima yok gom leu binhyepo tug ndei nimai drek dip bi. Lewo minu dima ne mpia di noni nang coi biningwes ngun eisi ri. 43 Gima rino Musa ndo minu ndig Bezer ei hampiati ei iggum ndigsi mem keret Ruben kin minu ndig Ramot ei Gilead mem keret Gad kin minu ndig Golan ei minu Basan mem keret Manasye.
Musa yai Allah Nicukti bak mben Israel
44 Leu api Musa yai Allah niggai serti kin nidimig sutti nya bak mben Israel. 45-46 Noni tri tut Allah ningon kanti dini tirigi yehei leu minu Mesir ba, ingat rin ei mbang briep di jo Minyei Yordan nite bei mpia nipriti di birok kik minu ndig Bet-Peor. Nipou ne Nibou Ndig Sihon di ninyeng tak kep mben Amori nyeng tut mpia dini bibon minu ndig Hesybon nok nibousi bibong ei sirima. Musa kin mben Israel ibindei timek noni mpe di po yehei leu minu Mesir pima. 47 Yoni ibrim dihyei po Nibou Ndig Sihon de pima kin Nibou Ndig Og leu minu Basan de bigyati. Og dima ne mben Amori ide nibou ndig gom kin bu di bong ei Minyei Yordan nite bei mpia nipriti ri. 48 Dihyei dima nohon keti jo ei minu ndig Aroer ei Minyei Arnon nyai kikau nite bei mpia nijjai ug ei Nungug Siryon di bon ninyeng hi Nungug Hermon cem, 49 bitut dihyei hagom ei Minyei Yordan nite bei mpia nipriti leu Igpong Nsim nite bei mpia nibiho kikau ug bipek kin Nungug Pisga nimig nite bei mpia nipriti.