Israel bindei timek Nibou Ndig Og
(Bil. 21:31-35)
3
1 <<Leu api nyeni injei hanyen ug ei nite bei mpia nijjai biyuug krau minu Basan. Lene Og di nibou ndig Basan kiju tut nide tentara yahagom bipi bikon pran bit nye dideu minu mien Edrei. 2 Noro TUHAN pai bida <Musa e, ma attin tut noni au. Midikes noni kin nide tentara nya kin nide minu ndig nya hagom titut yam ei jinda nsi. Abindei noni noyam kin gi po abindei Sihon di nibou ndig mben Amori di ninyeng tak kep ei Hesybon pima.>3 Mpe dima ne ide TUHAN Allah kes Nibou Ndig Og kin nide limwa nya cem ei nyeni inda nsi leu api icok tut yoni yahagom. 4 Mpe dima ne ibrim minu ndig dima hagom ba, ikriau gom cem bi. Minu ndig di ibrim dima hagom sok yam nimangti ningot muhwindagom ba, gima hagom jo ei hanjop Argob di Nibou Ndig Og leu minu Basan ninyeng tak kepti. 5 Minu ndig dima yok hagom bon ngug tig di jo anai bibor di krop ttai nya kin dimbou pmem nya di iba biei nggam mbou di nindig cem bikibi dimbou pmem dima yok bingkiem-kiau cem hagom. Ter leu gima lene minu mien mang bibor nindigsi nya di bon ngug tig hi bi cem. 6 Nyeni ihwen minu ndig dima yok hagom bisar lene igyai nimai bak ide pinai nya kin sop nya kin munggwom nya cem yahagom noyam kin gi po ibindei Nibou Ndig Sihon ei Hesybon de minu ndig nya pima. 7 Nyeni ipos ide mindhe-ndhe di ighyen kep nya ba, ipos mun di inyeng tut nya bicat ndigban di ide nya hagom.
8 Mpe dima ne nyeni ibrim minu di jo Minyei Yordan nite bei mpia nipriti ei Minyei Arnon kikau ug bipek kin Nungug Hermon leu nibou ndig mben Amori cin dima. ( 9 Timiei Sidon ijem Nungug Hermon ninyeng Siryon noro mben Amori ijem ninyeng Senir.) 10 Nyeni ibrim Nibou Ndig Og leu minu Basan de ninyeng tak kepti hagom bitut minu ndig nya di iwin ei briep bou him di nai nya kin minu Gilead kin Basan kikau ug ei minu ndig Salka kin Edrei nite bei mpia nipriti.>>
( 11 Mben Refaim ningwigsi rino Nibou Ndig Og nongkom. Iba tigb di nijeisi meter bitai ba, ninyanti meter gom biniken bibon nide brua nimaic bit leu nai di ice tut yam tut tu. Brua dima ningat rin ei mben Amon ide minu ndig Raba kikau kwei bipek ammani kep.)
Mben Israel di ikwas dihyei tut yam ei Minyei Yordan nite bei mpia nipriti bigyati
(Bil. 32:1-42)
12 <<Tirigi nyeni ibrim minu dima ba, nok ide tu lene dikwas dihyei di jo bei Aroer nijjai nite bei mpia nijjai dideu Minyei Arnon nyai kin nungug him ei Gilead nite hi bitut minu ndig nya di jo niti hagom tut keret Ruben kin keret Gad. 13 Lene dikwas Gilead nikenti di jo kin minu Basan di nipou Og ninyeng tak kep ei hanjop Argob hagom titut yam tut keret Manasye nite hi.>>
(Tungwatu nya ikan tut bipia minu Basan ne mben Refaim itimieisi ri. 14 Yair di ntun keret Manasye him pek nide hanjop nsi ei Argob leu minu Basan de minu niya kwas yamti kikau ug bipek kin Gesur kin Maakha ide minu niya kwas yamti. Noni ba minu mien dima yok bijem nonti ninyeng apino tungwatu nya ikan tut minu mien dima ne Yair de rin kikau kwei bipek ammani kep.)
15 <<Lene dikwas dihyei Gilead tut Makhir di ntun keret Manasye ninsi de hi him. 16 Lene dikwas dihyei ei Gilead kin Minyei Arnon nyai ikieti tut keret Ruben kin keret Gad. Minyei nibiamti dima nikieti bikkin nok ide hanjop nohon keti nite bei mpia nibiho. Lene Minyei Yabok nyai bikkin nok ide hanjop nohon keti nite bei mpia nijjai lo, minyei dima nite hi ne hanjop di bikkin mben Amon ide minu ri. 17 Lene ide minu ug ninno bipek Minyei Yordan nite bei mpia nicutti leu Igpong Galilea nite bei mpia nijjai ug bipek Igpong Nsim nite bei mpia nibiho. Lene ide minu niya kwas yamti nite bei mpia nipriti ne Nungug Pisga nimig ri.
18 Mpe dima ne dicuk yok bidipai <<Jide TUHAN Allah kwas minu ndig nya ei Minyei Yordan nite bei mpia nipriti dini tut je leu binhyepo jibong eisi. Noro suar jipinak jide tentara di ikrau ide minggwen kan nya ba, isigon Minyei Yordan biyuug dihip ei nite hi bittei nibou tut mben Israel nindigsi nya. 19 Disindui sut ba, jikes jimunggwom bat nya kin jitnem bat nya kin mindhe-ndhe nihyen kep jide di mang-mang nya dima yok bibong nyahan ei minu ndig dini yok di dikwas tut je tu. 20 Ma jimpu jisut bat mben Israel nindigsi nya bibou ibrim minu di jide TUHAN Allah mikwas tut yok ei Minyei Yordan nite bei mpia nicutti ug e. Tirigi ikieng kep minu dima bigyati ba, TUHAN sindui sut ibong kei igwam kei eisi noyam kin gi Noni bibon bije ei minyei nite dini tu lene ma jingkwei hanyen kwei ei jide minu di dikwas tut je ei dini.
21 Leu api dipai bak Yosua <<Angat mun nyeng hagom di ade TUHAN Allah bibon bak nibou ndig cin di Sihon kin Og bou ayai him tu. TUHAN mibibon nok gima bak nibou ndig nindigsi nya di jihwen yok leu ba, jibrim minu di ide nya bijiyati nya cem. 22 Ma attin tut yoni au. Lewo ade TUHAN mikon pran gau nani.>>
TUHAN sindui sut Musa coi ug ei minu Kanaan bi
23 <<Mpe dima ne dahara bak TUHAN, 24 TUHAN Di Ninyeng Jei e, dikan tut bipia gi ando bida dini ne sindi nimbie him leu abon munti di nindig bibor nya ba, mindur cem rin yo. Bit bon kwar di tungwatu nya ikuk yok bak ei mpia-bbed him kin dihyeisi dini bibon mindur di nindig bibor nok abibon bi ba, hi noyam kin Nani kan bi. 25 TUHAN e, ma asindui sut ba, disigon Minyei Yordan ba, duug dihip ei nite dima ug leu binhyepo dingat minu di nnum kei di jo nite dinyo kin nungug tou di kei bibor kei nya kin Nungug Libanon nya cem bou diyai him ug e.
26 Dahara nok noro jibindei ba, TUHAN gga dani apino kou sut ditde naharati dima bibuhup bi. Noro Noni pai bida <Cobi! Musa e, ma ahara Da tut mun nyeng dima bu au! 27 Noro aug hak ei Nungug Pisga ninggram him ba, acap ug ei nite bei mpia nijjai cem bei mpia nibiho cem bei mpia nipriti cem bei mpia nicutti cem hagom. Angig ayai kep mun di angat dima ba, aput mungkun kei leu mporo asigon Minyei Yordan ba, aug dihip ei nite hi bi sren. 28 Ma aba dicuk nati nya hagom bipingok Yosua ningonti leu binhyepo ningon nddong bingkiem lewo noni rino mibie tut Ditde limwa nya ug ei minyei dima nite hi leu binhyepo ibrim minu di angat bou ayai him dima bigyati.>
29 Lene nyeni ibong ei mbang briep di birok kik minu ndig Bet-Peor.>>