Mben di Allah dimig ei su
(Kel. 34:11-16)
7
1 <<TUHAN di nok jide Allah mibuwak je ug ei minu ttou nsi gom leu binhyepo jidigek kep minu dima nisurti-nipekti. Lene Noni mijji ngkiai nya imang bibor leu minu dima. Noni mijji mben nindig bibor muhwindacan di isindem bibor dor njiriek je cem bou jiyai him. Yo dima rino mben Het kin mben Girgasi kin mben Amori kin mben Kanaan kin mben Feris kin mben Hewi kin mben Yebus. 2 Tirigi TUHAN di nok jide Allah kes mben dini yok hagom ei jindati lene ma jihwen yahagom ba, imai bingwig hak ug. Ma jingondut yok ba, jipreu mun hi ei biyok au. 3 Ma jibuwak sop di ide nya bak jipmot bat nya binok itnem bat nya au. Ma jitri jipmisop bat nya bak yoni nok itnem bat nya cem au. 4 Leu binhyepo yoni miris jimunggwom bat nya leu TUHAN ndam nung di yo dima ikuk yok bak nya au. Gino mun dima cut igkep je lene TUHAN ningon misibui sut je leu api Noni mihwen je bijingwig. 5 Gima rino ma jinggek ide nimbar hum dok nya ba, jiki ide cou tig di ipigig sut nya kukiau bijitam ide kwar mien di bindo tut kwar nisop Asyera nya cem leu api ma jindig ide kwar nindigsi di ikuk yok bak nya kep hum bingwig. 6 Ma jiyai gini hagom igbit lewo TUHAN di nok jide Allah ninyeng tak kep je. Noni dimig je leu mben dihyeisi dini hagom leu binhyepo jinok Nide mben di ningon kieti.7 Noni ningon ngakei je ba, dimig je ei drek dip gi jide mben nindig bibor dor njiriek mben nindigsi nya ei dihyeisi dini bi. Lewo jide mben mien bibor dor njiriek mben nindigsi nya hagom. 8 Noro Noni ningon ngakei je ba, joi sut yai igbit mun di Noni preu ei mem jidigup bat-jidigai bat nya. Gima rino Noni teu je bijingwes ngun tug hon Nide nisindemti di nindig bibor lene kwek je leu nibou ndig mben Mesir di yuubon je nok nide awak nya. 9 Ma jiyok ngon kep bipia TUHAN di nok jide Allah Nongkom nok Allah gom ngat ba, ningon gom. Noni miyai igbit mun di Noni preu ei su bindo tut ningon ngakei di nggek jei bi bak yo di ingon ngakei Noni ba, ibit Nide nicukti nya kikau bidem ibou sribu-ribu di intun yam him di bram yam nya. 10 Noro Noni miba nihig ningon tut bisi bikes hukum ei yo di ingon mpo tut Noni dip. 11 Lene ma jibit TUHAN di nok jide Allah nicuk jeti nya di ditri tut bije njap di ammani hagom.>>
Yo di ibit nihyet migyai mun di kei
(Ul. 28:1-14)
12 <<Gino jiyok ngon kep nicukti dini yok ba, jiba jingon di gom bibit hagom lene TUHAN di nok jide Allah miyok ngon kep mun di Noni preu ei mem je ba, ningon ngakei je bijo kikau buug hon nohonti bi bit leu nok gi po Noni preu ei mem jidigup bat-jidigai bat nya. 13 Noni miningon ngakei je biyai gi kei bije leu binhyepo jibon jimunggwom bat nya imang bibor ba, jidigek kep mpia. Noni miyai gi kei bije bibindei ba, njita di nnum hei ei jide miaisi nya apino mijiyai gandum kin ba anggur ningei kin biei zaitun ningei nok gi dem. Noni miyai gi kei bije bibindei ba, jide sapi nya kin jide domba nya mikum eisi bu. Noni minjei mun di kei dini yok hagom bak jeni ei minu po Noni preu ei mem jidigup bat-jidigai bat nya bipia miyai bije pima ri. 14 Mijiyai mun di kei bibor nindig dor njiriek mben nindigsi nya ei dihyeisi dini hagom. Sop mben Israel hi mipijet bi ba, jide mindhe-ndhe niwek nya cem hi ya nau bi sren. 15 TUHAN minyohou je leu binhyema ninggwenti ninyeng hagom kin nsuwer ajar nya po cut igkep je ei minu Mesir pima mihwen je bi. Noro Noni minjei ninggwenti dima yok hagom ei jide siceu nya dip. 16 Bikwop mben di TUHAN di nok jide Allah kes ei jindati lene suar ma jihwen yahagom bingwig hak ug. Lene ma jingondut yok au. Ma jikuk je bak ide nung di yoni ikuk yok bak nya au. Leu gi nok lene mijitug ndei hukum nimai drek dip.
17 Mpaba jikan bipia mben dima yok imang ndig dor njiriek jimangti apino jisindem mem gima jijji yok bingwig bi e? 18 Noro ma jittin tut yok au. Ma jiyok ngon kep notou TUHAN di nok jide Allah kes mun di buhun pima ei nibou ndig mben Mesir kin nide limwa nya dip. 19 Ma jiyok ngon kep nsuwer ajar nya po jingat bou jiyai him pima. Lewo TUHAN di nok jide Allah kwek je leu minu Mesir tug hon mun di mindur nya kin Nide nisindemti di nindig bibor tu. Lene Noni mihwen mben di jittin tut yok dini bingwig leu je bit leu nok Noni hwen mben Mesir bingwig su pima. 20 Noni mibindei ba, yahagom ighyet ngwig kep yam bimbuk tut yame leu api mihwen yo di inang biku yok nyahan bingwig. 21 Gima rino ma jittin tut mben dima yok au. TUHAN di nok jide Allah ningat rin bit je. Noni ne Allah di sindem bibor di bindei ba, tungwatu nya idigit tut Noni ri. 22 Noni minyohou jji mben dima yok sindam tirigi jikieng kep minu dima. Bit bon jihwen yahagom bingwig ei mpe di gom kan bi. Leu gi nok lene mindhe-ndhe di niten-pos nya midigek kep minu dima ba, yaham je bijingwig. 23 TUHAN di nok jide Allah mikes jide siceu nya ei jindati lene mibindei ba, minggek yok sinsiou bibou imai bingwig ug e. 24 Noni mikes ide nibou ndig nya ei jindati. Tirigi jihwen yok bingwig lene ide limwa nya mingon prion ser yok. Bit bon jide siceu nya igya ngkiem ser je kan bi lewo mijihwen yahagom bingwig. 25 Ma jindig ide kwar di ikuk yok bak nya kep huma. Ma jingon pri kep perak kin mas di jo kin ide kwar nya bijiyai mem jenti au. Gino jiyai mun dima yok mem jenti lene mijitug ndei nimai drek dip lewo TUHAN di nok jide Allah ningon mpo tut yo di ikuk yok bak kwar nya. 26 Ma jipwoi kwar dima yok ba, juug sut ug ei jide ig bei au. Leu gi nok lene mijitug ndei nisigion jeti noyam kin kwar nya di TUHAN sigion tu. Suar jingon mpo tut mun dima yok hagom bijimbres jenti leu. Lewo TUHAN sigion mun di dima yok hagom tu.>>