Hukum di micut igkep yo di ibit nihyet bi nya
20
1 TUHAN cuk Musa, 2 bipai sut nicukti dini bak mben Israel, <<Bikwop no di leu jikieti kin ngkiai nya di ibong timiei ei jikieti cem di bui nimunggwom di ndig kep hum bikuk no bak kwar Molokh lene suar limwa nya yahagom iba tig bihwen bimai hak ug. 3 No di bui nimunggwom bindig kep hum bikuk no bak Molokh dima bindei ba, map kui Ditde Prak Mengti. Ba, no dima binim kep dinyeng di dia-diau kei cem. Midikes hukum ei noni dip ba, midibibon noni nok no di nggre kin Ditde limwa nya bu bi. 4 Gino limwa nya iba igyai ngat no dima niyai munti ba, ikes hukum nimai ei noni dip bi, 5 lene Danti midikes hukum nimai ei noni dip bitut nide ig bei nsi nya kin yo di itti kin noni yahagom di iba inghim bak Dani leu ba, ikuk yok bak kwar Molokh. Midibibon yoni nok yo di inggre kin Ditde limwa nya bu bi.6 Tungwa tou rino bisau ndam no di nung kui di mbrap kep bit nimai ngwes nya igkei ba, no mbrap bit nimai ngwes hi lene midikes hukum ei noni dip ba, midibibon noni nok no di nggre kin Ditde limwa nya bu bi. 7 Ma jinyohou jingon kwesti lewo Dani ne TUHAN ba, jide Allah ri. 8 Ma jibit dicuk jeti nya lewo Dani ne TUHAN rin ba, dinyeng tak kep jeni pijum.>>
9 Lene TUHAN yai nicukti dini biyok, <<No di sigion nicig nipmem lene suar jikes hukum nimai ei noni dip. Noni mai drek dip nonti niyai mun tunggweisi dima.
10 Gino mben Israel gom yem njita tut hiter di ntun mben Israel him nitnem lene suar jikes hukum nimai ei noni kin sop dima dip hak ug. 11 Pinai gom di yem njita tut nicig nitnem bat nya igom lene niyai munti dima binggek tut mun di nicig nyeng tut. Gima rino suar jikes hukum nimai ei pinai dima kin sop dima dip hak ug. Yoni imai drek dip yonti igyai mun tunggweisi dima. 12 Gino pinai gom yem njita tut nignyot lene suar jikes hukum nimai ei ibou can dima dip hak ug. Lewo mbro nok gino itig mbier tut yam lo, ibon sisar nicut tut hi nitnemti lene imai drek dip yonti igyai mun tunggweisi dima. 13 Gino pinai gom yem njita tut pinai hiter lene gima mun di kinei bibor di bindei tungwatu igyai ngkek ttin ser. Lene suar jikes hukum nimai ei yahacem dip hak ug. Yoni imai drek dip yonti igyai mun tunggweisi dima. 14 Gino tungwagom wak sop gom bitut sop dima nipmem cem lene suar jindig ibou ningai dima kep hum ba, ibimai kep. Lewo yoni ibon mun di dem mem tungwatu ibonti bi. Ma jisindui sut sisar di nok gima ei jikieti au. 15 Gino pinai gom yem njita tut mindhe lene suar jikes hukum nimai ei no dima kin mindhe dima dip hak ug. 16 Gino sop gom yem njita tut mindhe lene suar jikes hukum nimai ei sop dima kin mindhe dima cem dip hak ug. Yoni imai drek dip yonti igyai mun tunggweisi dima.
17 Gino pinai gom yem njita tut nikwohop ningat cem nikwohop di icig ne icig gom rin lo, nipmem ter cem ipmem ne ipmem gom rin lo, icig ter cem lene ma jibibon yo dima tereu nok yo di inggre kin Ditde limwa nya bu bi. Yoni ibon mun di dem mem tungwatu ibonti bi. Ba, suar ibiang igyai munti dima nibuhunti. 18 Gino pinai gom yem njita tut sop gom mpe di sop dima ningkek kan mun lene ma jibibon yoni tereu nok yo di inggre kin Ditde limwa nya bu bi.
19 Gino pinai gom yem njita tut nicig nikwohop kin nipmem nikindig-nikinjoi sop hi cem lene suar ibou can dima ibiang igyai mun tunggweisi dima nibuhunti. 20 Gino pinai gom yem njita tut nipmum nitnem lene noni biyai nimmai bak nipmum. Suar pinai dima kin sop dima ibiang igyai munti nibuhunti. Ba, bit bon ibon imunggwom bat nya kan bi kikau ba, yuug bimai kep. 21 Gino pinai gom nggek nide adig-ajoi nitnem lene gima nok biyai nimmai bak nide adig-ajoi dima tu. Noni bon mun di dem mem tungwatu ibonti bi. Ba, bit bon ibon imunggwom bat nya kan bi kikau ba, yuug bimai kep.>>
22 Lene TUHAN binut bu bipai <<Ma jibit dicuk jeti nya hagom leu binhyepo timiei minu Kanaan nya mijji jeni leu ide minu di dibuwak je ug eisi dima bi. 23 Ma jiyai bram yo di ingon tindur di ibong ei sirima igyai kepti nya au. Lewo iba igyai kepti di kinei bibindei ba, dingon him muwei sut yok. Gima rino dijji yok leu ba, dibon nituti mem jeni jicoi ug ei itimieisi dima. 24 Dipreu kep jeni tut minu di bon ninnumti di kei bibor dima tu. Ba, diyai dihyei dima bije ba, jima bou je nok jide.
Dani ne TUHAN ba, jide Allah rin ba, didimig jeni bijo ter leu ngkiai nya ikieti. 25 Gima rino suar jingat igbit bijimig mbus mindhe di dipigig ser bijo ter leu mindhe di dipigig ser bi nya. Ma jiyem mindhe-ndhe di dipigig ser au. Disimbot dat bipia mindhe-ndhe dima ne mindhe-ndhe di dipigig ser tu rin ba, gino jiyem lene map kui jeti. 26 Didimig jeni leu mben hiter nya ikieti leu binhyepo dijem je bou Da nok Ditde. Suar jingon kwes lewo Dani ne TUHAN rin ba, dikwes-kwau.
27 Bikwop pinai kin sop tou rimbrap bit njungwes lene suar jiba tig bihwen no dima bimai kep. No dima mai drek dip nonti niyai mun tunggweisi dima.>>