Imam nya ide ningon kwesti
21
1 TUHAN cuk Musa bipai sut nicukti dini bak imam di intun Harun him nya, <<Harin dima imam hi bindei ba, map kui noti drek dip gi priet kin yo di itig nide bat nya ingut a. 2 Disindui sut imam dima bit yok tut gino itig nipmem kin nicig ingut kin nimunggwom kin nide adig-ajoi nipinai, 3 kin nikwohop di wak nijjep bigyo di bong ig gom bit noni he. 4 Harin dima noni bindei ba, map kui noti drek dip gi priet kin yo di itig nitnem nide bat nya ingut a.5 Harin dima imam hi kak nibou nta ndrim hi leu nibou ba, kos nuhui nta cem leu a. Harin dima noni ba mun di nggwen biciu ningut mem bindo tut bipia no gwam ningon di nggukti yo a. 6 Dinyeng tak kep noni pijum ba, harin dima noni bibon dinyeng kinei a. Noni nyohou dimig nibon midut njita nibipai sigyo bak Allahti bou diyai him. Gima rino suar ningon kwes. 7 Harin dima imam hi wak sop di nipou yo nok sop sundal kin sop di gwam pilei ngat di bon mun hi tu kin sop di nijjep kes ei nya a. Lewo imam dima ningon kwes. 8 Suar mben Israel igyok ngon kep bipia dinyeng tak kep imam pijum lewo noni nyohou dimig nibon midut njita nibipai sigyo bak Allahti bou diyai him. Dani ne TUHAN ri. Dani dingon kwes ba, dibindei Ditde limwa nya cem ingon kwes. 9 Gino imam hi nipmisop sindi nok sop sundal lene biyai nimmai bak nicigya. Suar jindig noni kep hum bimai ug.
10 Jita Imam Nibou Ndig tug hon nibon midut nisiber mini midut ei nibouti kin nibon midut niba sinsun Imam Nibou Ndig bijuk noti. Gima rino ma noni sindui sut nibou bisinsiou ba, rik nide sinsun nok bindo tut gi gwam ei ningon di nggukti au. 11 Harin dima Imam Nibou Ndig coi ug ei ig bei di nimai ngut joti a. Nok gino nicig ningat ningut kin nipmem ningat ningut rin lo, ma dideu au. Lewo bindei ba, map kui noti. 12 Jita Imam Nibou Ndig dima ei mem Dani. Gima rino harin dima noni hei leu Ditde Prak Meng ba, ug gwam srig yo di ipim tut nimai a. Lewo noni bindei ba, map kui noti kin Prak Meng niyati dimati cem. 13 Nnaba noni wak sop di gwam nitta pilei ngat, 14 di tig mbier tut nide keret. Harin dima noni wak sop kibom kin sop di nijjep kes ei kin sop di nipou yo nok sop sundal a. Noro ma noni wak sop di gwam nitta pilei yo. 15 Gino imam dima tunggwei nicukti dima lene mibindei ba, map kui nimunggwom bat di suar ingon kwes nyati. Dani ne TUHAN rin ba, dinyeng tak kep noni pijum nok Imam Nibou Ndig.>> 16 Lene TUHAN sok nihyet dini ei Musa dip, 17 bak Harun, <<Harin dima ade nintun him di bram yam nya di bon ningut nimbumbati gom kinei nyohou dimig nibon midut njita nibipai sigyo bak Allahti bou diyai him a. Nicukti dima bijo ninno bijo kikau. 18 Harin dima no di nyohou dimig nibon midut bou diyai him dima bon ningut nimbumbati gom kinei a. Bitut no di niyai tu kin no di nimig lit kin no di niimaisi kinei kin no di nimbumbati lit, 19 kin no di ninda mai kin no di nimig lit, 20 kin no di ninghim koi kin no di kiot kin no di niyai mmui kin no di ninggwenti hwen ningkek dip kin no di nitig kinei a. 21 Harin dima no di ntun Harun him di bon ningut nimbumbati gom kinei dima nyohou dimig nibon midut njita nibipai sigyo bak Allahti bou diyai him a. 22 Noro disindui sut ba, noni yem kep njita di leu nibon midut njita nibipai sigyo bak Allahti di kwes kin njita gi nitin eisi di kwes-kwau cem. 23 Noro ningut nimbumbati gom di kinei dima bindei ba, harin dima noni dideu sinsun mbrawin di bikkin Ninsi Di Kwes kin nimbar hum dok cem a. Harin dima noni bindei ba, map kui mun di dinyeng tak kep pijum a. Lewo Dani ne TUHAN rin ba, dinyeng tak kep nimbumbati ei ninsi dima yok pijum.>> 24 Lene nicukti nya di Musa sok ei Harun kin nimunggwom bat nya dip bak mben Israel hagom ndia ri.