Nicukti di bindei ningon di kwes kin ningon di sren
19
1 Lene TUHAN sok nihyet dini ei Musa dip bak, 2 mben Israel <<Suar jingon kwes-kwau lewo Dani ne TUHAN bidinok jide Allah rin ba, dingon kwes-kwau. 3 Suar jeni bikwop tungwagom-gom kuk no bak nicig bat nipmem bat nya bibit ighyet. Suar jikes tut Njap Nigwam Kep Ninghuisi ei mem Da bit leu nok dicuk jeti tu. Dani ne TUHAN bidinok jide Allah ri.4 Harin dima jikes Da ei bijikuk je bak kwar di jibon bou jinda him a. Harin dima jiba ngkimom nitu bibon kwar bou jinda him bijikuk je bak a. Dani ne TUHAN bidinok jide Allah ri.
5 Tirigi jibui mindhe mem nibon midut gi ningon kwes kin Allahti lene ma jiyok ngon kep dicuk jeti nya di ditri tut bije tu apino midingon cut hon nibon midut dima. 6 Suar jiyem kep mikwau dima mem njap di imam bui mikwau dima kin njap dihyep bu cem. Ne gino niken jo mem njap gi niningai lene ma jindig gima hagom kep hum bingwig hak ug. 7 Lewo map kui niken dimati ba, gino hi yem kep mikwau dima lene midingon cut hon jide nibon midut dima bi. 8 Tungwa tou rino yem kep mikwau dima ningon mui su lewo noni bimangkrei mun di dipigig ser mem Danti leu api no dima minok Ditde limwa bu bi.
9 Tirigi jikos jide gandum ei beisi lene ma jikos gandum niken di jo ninghas him au. Ma jingkwei hanyen bijimbus gandum dima mbican bram yam au. 10 Nok gima cem ma jingkwei hanyen ug ei jide miai ba anggur nghousi leu binhyepo jipuk ningat di jingat bi nya ba, jikam ningat di cut ug ei dihyeisi au. Ma jibet niken dima hagom ei mem yo di yuhui mbum nya kin ngkiai nya. Dani ne Tuhan bidinok jide Allah ri.
11 Harin dima jinggimang mun ba, jiris yam ba, jipai-pai wai cem a. 12 Gino jikos tut bipia jiluei jingonti tut mun di jipreu ei biyam lene ma jipreu ei biyam tug hon dinyeng hak au. Lewo jiyai munti dima mibindei bidinyeng kinei. Dani ne TUHAN bidinok jide Allah ri.
13 Ma jiba ningon di kwes bibon nindigsi nya lene ma jipos ndiyok leu yok au. Nok gima cem ma jingon tak kep no di yai midyai mem je nimuhup mem mmun-njap gom cem au. 14 Harin dima jimbriom no di nitingou nam ba, jikes tig ser no di niyai tu noho bei bindrat a. Suar jikuk je biDa ba, jingon digit tut Da lewo Dani ne TUHAN bidinok jide Allah ri.
15 Tirigi jigwam nok nikei mem yo di ipigau hanjop nya lene ma jingon sren. Harin dima jibibon no di nuhui mbum ba, bon ninyeng njiriek nindigsi nya a. Nok gima cem harin dima jingon digit tut no di nyeng bibor a. 16 Harin dima jiba jimbuk bikkin kep nindigsi nya inghapti a. Leu binhyepo gino bon nituti lene ma jimbrap gau no di ya nikei noho bei ser nhyepo noni tug ndei hukum nimai bi. Dani ne TUHAN ri.
17 Harin dima jingon koi kep nindigsi nya a. Ma jimbus yam ngonti leu binhyepo jingon kwes kin yam apino mijicut ei sisarti drek dip yam bi.d 18 Harin dima jeheu yam ba, jingon koi kep yam a. Noro ma jingon ngakei hiter bit leu nok jingon ngakei jenti. Dani ne TUHAN bidinok jide Allah ri.
19 Suar jibit dihyet hagom. Harin dima jikes mindhe-ndhe di ter leu yam nya bit yam bipri gau yam a. Harin dima jindim ningan ninyeng can ei miai ngoisi gom a. Harin dima jijuk sinsun di iba mong ninyeng can binap ei jeti a.
20 Gino andigpoi gom mitri nide awak sop gom bak hiter leu api no dima yok wab kep binok nitnem ndrim tu lo, njei mimbron hagom kep bak andigpoi pima bigyo leu api andigpoi di ninyeng tak kep awak dima cut tut awak dima lene suar yahacem itug ndei hukum. Noro ma jiyai hukum nimai biyok au lewo sop pima ne andigpoi pima nide awak ri. 21 Suar andigpoi dima jem domba nikre ningut gom kwei ei bei dimbou hui ei Ditde Prak Mengti mem nibon midut nibidip ninyeng tut nitunggweisi bak TUHAN. 22 Lene ma imam gom kos mindhe dima bibon midut nibikos ser no dima nide sisar apino Da di TUHAN midikos ser nide sisar hak ug.
23 Ei nidipti bu tirigi juug krau minu Kanaan lene jita biei di ngat ningat nya ninyeng hi gom hi gom lene ma jiba jingon srip huk bipia map kui biei ngat dimati mem nijam ari bingwam ningai di nimbie him lene ma jipuk ningat hi bijiyem au. 24 Ug ei ari bingwam gi nibitai lene ma jipigig ser biei ngat dima hagom mem Da ba, jibinggei sut Da di TUHAN. 25 Ug ei ari bingwam gi nimuhwi lene ma jipuk biei ngat dima bijiyem hak ug. Gino jibit dicuk jeti dini igbit lene jide biei nya mingat ningat nindig bibor bikum eisi bu. Dani ne TUHAN bidinok jide Allah ri.
26 Harin dima jiyem kep mikwau di ninggrom hugsi a. Harin dima jikrau kep yo di inda dut nya ingon kanti a. 27 Harin dima jikak jibou nta bei jijap ba, jikos juhui nta ba, 28 jiwim jingkek dip ba, jidigo jingkek dip cem tirigi jingon ngguk tut nimai a. Dani ne TUHAN bidinok jide Allah ri.
29 Harin dima jibimangkrei jipmisop bat nya tug hon gima jikes yok ba, inok sop sundal nya ei mpia di ngkiai nya ikuk yok bak ide nung nyae eisi a. Leu gi nok lene mijikiek je ndam kwar di jikuk je bak nya apino sisar mikieng kep jide minu dima. 30 Suar jikes tut Njap Nigwam Kep Ninghuisi ei mem Da lene suar jinyohou gumihyep di jindo ei mem gima jibikuk je biDa eisi. Dani ne TUHAN bidinok jide Allah ri.
31 Harin dima juug cem kep yo di nung kui yok nya bipingok kep jingonti a. Leu gi nok lene map mikui jeti. Dani ne TUHAN bidinok jide Allah ri.
32 Suar jibou cut bak andigpoi nya bijikon inyenga. Suar jikuk je biDa ba, jingon digit tut Da lewo Dani ne TUHAN bidinok jide Allah ri.
33 Ma jibon mun di kinei tut ngkiai di ibong srig jikieti nya au.
34 Ma jibibon yok noyam kin jisut bat mben Israel ba, jingon ngakei yok bit leu nok jingon ngakei jenti cem. Ma jiyok ngon kep bipia jibong jingkiaisi ei minu Mesir nipou su. Dani ne TUHAN bidinok jide Allah ri.
35 Harin dima jiba meter kin kilo kin brek ngwak di igbit bi nya biris bak nindigsi nya a. 36 Noro ma jikrau kep meter kin kilo kin brek ngwak di igbit. Dani ne TUHAN bidinok jide Allah rin ba, dibuwak je kwei leu minu Mesir.
37 Suar jibit Ditde nicukti nya kin dikos tutti nya lewo Dani ne TUHAN ri.>>