Harun kin nipmot bat nya ikinyon ei nibon midut nyati
9
1 Tirigi nibon midut nita imam nya pima ngwig leu su lene Musa hig Harun kin nipmot bat nya kin nibou mben Israel yahagom kwei mem njap di hyep. 2 Lene noni cuk Harun <<Ma ajem sapi nikre nehen pap ningut gom kin domba nikre ningut gom ba, hacem ibok-ba bi kwei leu api abui hacem nok mun di abikuk na bak TUHAN. Sapi nikre dima mem nibon midut nibiyai nikos ser sisarti lene domba nikre mem nibon midut nindig mindhe titut kep hum. 3 Lene ma acuk mben Israel bipia ijem ide kambir nikre ningut gom kwei mem nibon midut nibiyai nikos ser ide sisarti kin sapi nehen pap ningut gom kin domba mien ningut gom ba, hacem ide njap ug ei ari bingwam gom ba, ibok-ba bi kwei mem nibon midut nindig mindhe titut kep hum. 4 Kin sapi nikre ningut gom kin domba nikre ningut gom mem nibon midut nibiyai ningon kwes kin Allahti kwei. Lene ma ibui mindhe dini yok hagom bitut roti di mini zaitun srigsi bak TUHAN. Suar igyai hagom bit leu nok dicuk yokti lewo TUHAN mindo Nonti brei biyok mem njap di ammani.>>5 Lene mben Israel igyai hagom bit leu nok Musa nicuk yokti. Ijem mindhe-ndhe nya kwei bigya kui dimbou hui ei Prak Meng leu api yahagom idem yam ei sirima leu binhyepo ikuk yok bak TUHAN. 6 Lene Musa pai biyok <<TUHAN cuk je bipia ma jiyai mun dini yok hagom leu binhyepo jingat Nide nikei-kau-keisi brei bou jiyai him.>> 7 Lene noni pai bak Harun <<Aug ya kui nimbar hum dok ba, atin ei nibon midut nibiyai nikos ser sisarti kin nibon midut nindig mindhe titut kep hum leu binhyepo TUHAN mikos ser ade sisar kin ade limwa nya ide sisar. Ma ayai hagom bit leu nok Noni nicuk nyeti.>>
8 Lene Harun ug ya kui nimbar hum dok leu api bui sapi nikre di nehen pap di noni tin ei mem nibon midut nibiyai nide nikos ser sisarti. 9 Lene nipmot bat nya yehek sapi ninggrom kwei binoni leu api noni tur ninda pijum eisi bibidip nimbar hum dok ninggai nya. Lene noni siber ninggrom niken ei nikiou. 10 Lene noni digo nimmau kin nikimbu hacem kin nisingau igdo hi di kei bibor bindig hagom kep hum ei nimbar hum dokti bit leu nok TUHAN nicuk Musati. 11 Lene noni ndig ninghui kin ningkek kep hum ei mben Israel ide prak meng yati dima nisai.
12 Lene noni bui mindhe di noni bet ei mem nibon midut nindig mindhe titut kep hum. Lene nipmot bat nya yehek ninggrom kwei binoni leu binhyepo noni biprok nimbar hum dok nitta bitaisi. 13 Lene yoni ikon mindhe dima nibou kin ninghui nindigsi nya bigyai binoni leu api noni ndig hagom kep hum ei nimbar hum dokti. 14 Lene noni ba minyei bipiap ninghop kin nindimuhum leu api kon bijo ei ninghui nindigsi nya dip ei nimbar hum dokti bindig kep hum.
15 Gima ngwig lene noni jem kambir mem nibon midut nibikos ser nide limwa nya ide sisar kwei leu api bui kambir dima bindig kep hum bit leu nok gi po noni bon midut mem nide sisar pima. 16 Nok gima cem noni jem mindhe di noni tin ei mem nibon midut nindig mindhe titut kep humti kwei leu api bui bit leu nok Musa nicuk noti. 17 Gima ngwig lene noni tin ei nibon midut njita nibipai sigyo bak Allahti. Noni kam tepun ei ninda bia bei gom bindig kep hum ei nimbar hum dokti. Gini ne mun di bikum ei nibon midut nindig mindhe titut kep hum po mbut bikwop njap pima ri. 18 Lene noni bui sapi nikre kin domba nikre mem nibon midut nibiyai ningon kwes kin Allahti mem nide limwa nya leu api nipmot bat nya yehek ninggrom kwei binoni leu binhyepo noni biprok nimbar hum dok nitta bitaisi. 19 Lene noni digo sapi nikre kin domba nikre pima nimmau bikon, 20 bijo ei mindhe-ndhe pima yok ningget nya dip ba, ug sut biya kui nimbar hum dok. Noni ndig nimmau hagom kep hum lene, 21 yai ningget hacem kin nindimuhum bei nite ninda com hacem bak imam nindigsi nya nok mun di bon ninyeng mem TUHAN bit leu nok Musa nicuk noti.
22 Tirigi Harun bon midut pima hagom tu lene noni kon ninda hacem gau mben Israel bingat nadi tindei mun di kei mem yok. Lene noni juk kwei leu niyati. 23 Lene Musa kin Harun icoi ug ei TUHAN De Prak Meng lo, mpe dino yehei hanyen kwei lene ingat nadi tindei mun di kei mem ide limwa nya bu. Mpe dima lene mben Israel yahagom ingat TUHAN de nikei-kau-keisi brei bou igyai him. 24 Jei bi lene TUHAN pinak nide hum kros kwei bibindei hum dima yem mindhe titut kin nimmau hagom ei nimbar hum dokti bingwig. Tirigi yo dima ingat mun di mindur dini lene yahagom ikon ighyet nok gom leu api yom yok biba ingwak bikik mpia.