Musa ta Harun kin nipmot bat nya
(Kel. 29:1-37)
8
1 Lene Tuhan pai bak Musa, 2 <<Ma ahig Harun kin nipmot bat nya kwei. Lene ma ikon ide sinsun nibon midut kin bansi di roti dwoi bi joti cem kwei. Lene ma ijem sapi nikre di nehen pap ningut gom kwei mem nibon midut nibiyai nikos ser sisarti. Lene ma ijem domba nikre ningut can kwei bu ba, ijem hagom biyuug sut bigya kui dimbou ei Ditde Prak Meng nuhuigya. 3 Lene ma anduk ditde limwa di mben Israel cem yahagom kwei ba, idem yam ei sirima.>>4 Lene Musa yai hagom bit leu nok TUHAN nicuk noti. Tirigi yahagom idem yam ei sirima tu, 5 lene Musa pai biyok <<Mun di diyai nogindini hagom tug hon TUHAN nicuk dati.>>
6 Lene noni cuk Harun kin nipmot bat nya bipia igya bibie nindigsi nya yohobei ba, ikek minyeiti. 7 Lene noni juk sinsun nibon midut di nok sinsun nda kin sinsun ndok di jei kin mun di ibikri kep intig bou kin sinsun efoda di iba nimmam di dia-diau kei bikri kep intig bou bijuk ei Harunti. 8 Lene noni juk sinsun minai ei Harunti bikes Urim kin Tumimb eisi. 9 Lene noni kes topi ei Harun nibou bittin leu api ngot penen di iba mas bibon di ndo bipia TUHAN ninyeng tak kep imam dima eisi. Musa yai gini hagom bit leu nok TUHAN nicuk noti.
10 Lene noni yai mini nibon midut bibiprok TUHAN De Prak Meng bitut mun di joti nya hagom. Tug hon nisinati dima lene noni pigig sut hagom ei mem TUHAN. 11 Lene noni ug yai mini hi kin bu bibiprok nimbar hum dok bitut nimbumbati nya kin bokor minyei bitut nidihim cem mbimuhwindacan leu binhyepo dimig hagom ei mem TUHAN. 12 Lene noni ug yai mini hi kin bu bikiber ei Harun nibouti leu binhyepo bita noni mem nide midyai. 13 Lene noni cuk Harun nipmot bat nya bipia igya bibie leu api juk sinsun nda ei yokti ba, kri mun di ibikri kep intig bou kep yok cem kes topi bijo ei ibou bittin bit leu nok TUHAN nicukti.
14 Lene noni jem sapi nikre di nehen pap ningut gom kwei mem nibon midut nibiyai nikos ser sisarti leu api Harun kin nipmot bat nya ikes inda ei sapi nibou dip. 15 Lene Musa bui sapi behek ninggrom poi leu api tur ninda pijum eisi bibidip nimbar hum dok ninggai nya leu binhyepo piga gima ba, tug hon nisinati dima lene noni piga nimbar dima ei mem TUHAN bibindei ba, nimbar kwes-kwau. 16 Lene noni digo ninggwo kin nisingau igdo hi di kei bibor kin nikimbu hacem bitut nimmau di joti nya bindig hagom kep hum ei nimbar hum dokti. 17 Lene noni et ningkek ba, digo ninghui kin ninak hagom cem buug sut ug ei mben Israel ide prak meng yati dima nisai bindig hagom kep hum bit leu nok TUHAN nicukti.
18 Lene Musa jem domba nikre ningut gom mem nibon midut nindig mindhe titut kep humti kwei leu api Harun kin nipmot bat nya ikes inda ei nibou dip. 19 Lene Musa bui domba dima behek ninggrom bibiprok nimbar hum dok nitta bitaisi. 20 Lene noni digo mindhe dima bindig nibou kin ninghui kin nimmau ei humti. 21 Tirigi noni ba minyei bipiap ninak kin nimig tu lene noni ndig domba nikre dima titut kep hum ei nimbar hum dokti bit leu nok TUHAN nicukti. Lene TUHAN joi sut ninghap di ngge kei dima.
22 Lene Musa jem domba nikre gi nican di noni bet ei mem gima bita imam nya kwei leu api Harun kin nipmot bat nya ikes inda ei nibou dip. 23 Lene noni bui domba dima behek ninggrom poi mien bibingget Harun nitingou meng kin nindapmem kin nimig ndapmem bei nite ninda com. 24 Lene noni cuk Harun nipmot bat nya bipia yuug ya bibie leu api noni hek domba ninggrom poi mien hi kin bu bibingget itingou meng kin indapmem kin imig ndapmem bei nite inda com. Lene noni hek ninggrom niken bibiprok nimbar hum dok nitta bitaisi. 25 Lene Musa digo domba dima nimmau kin nipu di nimmau ndok kin ninggwo kin nisingau igdo hi di kei bibor kin nikimbu hacem bitut nimmau di joti nya kin nindimuhum bei nite ninda com hagom. 26 Lene noni ug yai roti dwoi bi di ipigig sut ei mem TUHAN di jo ei bansiti nindak gom kin roti di mini zaitun srigsi nindak gom kin roti di dile nindak gom bikes hagom ei domba nimmau kin nindimuhum bei nite ninda com dip. 27 Lene noni kon mun dini yok hagom bikes ei Harun kin nipmot bat nya indati leu binhyepo ikon bijo nai ei TUHAN Noho bei nok mun di bon ninyeng mem Noni. 28 Lene Musa yai mun nyeng dima yok hagom hanyen leu yok leu api kes ei mindhe ningut po indig titut kep hum pima dip leu api noni ndig hagom kep hum ei nimbar hum dokti bita yok nok imam. Lene TUHAN joi sut ninghap di ngge kei dima. 29 Lene Musa digo domba pima ningget leu api kon bijo nai ei TUHAN Noho bei nok mun di bon ninyeng mem Noni. Gima rino Musa ma domba ningget di noni digo mem gima bita imam nya dima nok nide. Noni yai mun dini yok hagom bit leu nok TUHAN nicukti.
30 Lene noni yai mini nibon midut poi kin mindhe nggrom dijo ei nimbar hum dokti poi leu api ug biprok Harun kin nipmot bat nya ingat kin ide sinsun nibon midut di ijuk cem. Tug hon nisinati dima lene noni dimig yoni ingat kin ide sinsun cem ei mem TUHAN.
31 Lene noni cuk Harun kin nipmot bat nya <<Ma jikus domba pima ninghui gom bijikon ba, juug ya kui dimbou ei TUHAN De Prak Meng nuhuigya. Lene ma jikwen mikwau dima bijiyem kin roti nibon midut nita imam nyati ei bansiti ei sirima bit leu nok TUHAN nicukti. 32 Gino mikwau kin roti dima niken jo lene ma jindig hagom kep hum. 33 Nibon midut nita je nok imam miyem mmun-njap nitindur muhwindacan. Gima rino ma jikes dimbou TUHAN De Prak Meng nuhui dini bijimbut leu au. 34 TUHAN cuk nye bipia ma nyeni igyai nibon midut dini mem nituti dini ba, kikau cem. Tug hon nibon midut dima lene jiyai gi kos ser jide sisar. 35 Suar jibong ser dimbou hui kui Prak Meng dini mem mmun-njap nitindur muhwindacan bijibit leu TUHAN nicuk jeti nya. Gi bi lene mijimai hak. Dicuk jeti dini hagom tibim kwei leu TUHAN Nonti nuhui him.>> 36 Gima rino Harun kin nipmot bat nya igyai hagom bit leu nok TUHAN nicuk yokti di tug hon Musa.