Imam Nadab Abihu nya itug ndei hukum nimai
10
1 Mpe di gom bu lene Harun nipmot bat cin Nadab Abihu nya igyai ide srier hum bikes hum mbom eisi. Lene ibigimahap biei nggrai di ui-gwang kei eisi bimbut tut ug ei TUHAN Noho bei. Noro hum dima ne hum di map kuisi rin ba, igyai mun njiriek TUHAN nicuk yokti. 2 Apino TUHAN kes hum di cig-cai kros kwei ba, hum dima yem yahacem bimai ei Nide Prak Mengti. 3 Lene Musa pai bak Harun <<Mun di cut igkep yo dima bit leu nok gi po TUHAN sok kep nye tut tirigi po Noni pai bipia suar yo di igyai kep Nide midyai ikuk yok bak Nide nikwes-kwausi. Noni mindo Nide nikei-kau-keisi bak Nide limwa nya yahagom pima.>>c Pai nok noro Harun kum nuhui kep bibuhup bi.4 Lene Musa hig Misael Elsafan nya di Harun nipmum Uziel nipmot bat cin kwei bicuk yok <<Jikwei kon jitom bat cin ingut leu TUHAN De Prak Meng bijikon ug ei mben Israel ide prak meng yati dima nisai.>> 5 Gima rino ikwei lene iba nimai nya ide sinsun ndok di jei bikon ingut biyuug sut ug ei mben Israel ide prak meng yati dima nisai bit leu nok Musa nicuk yokti.
6 Lene Musa pai bak Harun kin nipmot bat cin di Eleazar Itamar nya <<Ma jibou jo hak ba, jirik jide sinsun rok him cem nok bindo bipia jingon ngguk tut nimai au. Gino jisrep tut dicuk jeti dini lene mijimai hak leu api TUHAN ningon misibui sut nye di mben Israel yahagom ri. Noro nna ba mben Israel nindigsi nya ingon ngguk tut bipim kep yo cin di TUHAN de hum yem yok dini. 7 Ma jikes Prak Meng ba, jimbut leu au. Leu gi nok lene mijimai lewo TUHAN ta je tug hon Nide mini nibon midut tu.>> Lene ibit leu nok Musa nicuk yokti.
Nicukti mem imam nya
8 Lene TUHAN pai bak Harun, 9 <<Tirigi niabiati jidut ba anggur ngei kin mun ngei di pu yok bingwig leu su lene harin dima nani kin apmot bat nya jicoi ug ei Ditde Prak Meng nsi a. Gino jipigau nicukti dini lene mijimai hak ri. Suar ade nintun him yamti di bram yam nya cem yahagom ibit dicuk jeti dini kikau. 10 Dipai nok leu binhyepo jimig mbus mun di dinyeng tak kep nya kin mun di ugwai-gwai nya bijo ter leu yam. Ma jimig mbus mun di kwes-kwau kin mun di map kuisi bijo ter leu yam. 11 Suar jingginau mben Israel tut dikos tutti nya di diyai bina tug hon Musa hagom.>>
12 Lene Musa pai bak Harun kin nipmot bat cin di Eleazar Itamar nya <<Juug ket njita nibipai sigyo bak Allahti niken lene ma jiba tepun dima bikang roti dwoi bi leu api jiyem roti dima tirigi jiya kui nimbar hum dok lewo njita nitin ei dima kwes-kwau bibor. 13 Ma jiyem roti dima tirigi jiya kui mpia ttou nsi di kwes-kwau. Roti dima kwei leu nibon midut njita nibipai sigyo bak Allahti. Ma nani kin apmot bat nya jengkom jima roti dima bit leu nok TUHAN nicuk dati. 14 Lene Noni sindui sut gima jeni kin jide bat nya jahagom jiyem mindhe ningget kin nindimuhum di nok mun di bon ninyeng mem Noni di Noni yai hanyen bak imam nya. Ma jiyem mikwau dima kui mpia ttou nsi di kwes-kwau he. Mikwau dima ne mun di TUHAN yai leu mben Israel ide nibon midut nibiyai ningon kwes kin Allahti rin ba, yai hanyen bak jeni kin jimunggwom bat nya leu binhyepo jima nok jide. 15 Tirigi imam nya indig nimmau kep hum ei nimbar hum dokti mem nibon midut nindig mindhe titut kep humti lene suar mben Israel idigo nindimuhum kin ningget nghui kwei bigyai bije. Ma jeni kin jimunggwom bat nya jima ninghui dima mem jenti bijo ninno bijo kikau bit leu nok TUHAN nicukti.>>
16 Lene Musa hig ser yok tut kambir di ibui mem nibon midut nibiyai nikos ser sisarti leu api hi mbot kep binoni bipia indig kambir dima kep hum tu. Gima rino Musa ningon sibui sut Eleazar Itamar nya lene ba ningon di kui bihig ser yok, 17 <<Nggon rino jiyem mikwau leu nibon midut nibiyai nikos ser sisarti pima ei mpia ttou nsi di kwes-kwau bi i? Lewo mikwau dima kwes-kwau bibor. TUHAN sok nihyet tut nibon midut dima bak je di mben Israel leu binhyepo jahagom jibiyai nibikos ser jide sisar. 18 Jehek ninggrom ba, juug sut ug ei TUHAN De Prak Meng nsi bigyo. Gima rino suar jiyem mikwau dima ei mpia ttou nsi dima bit leu nok dicuk jeti.>>
19 Lene Harun buhup <<Mben Israel igyai nibon midut nibiyai nikos ser sisarti kin nibon midut nindig mindhe titut kep hum cem bak TUHAN njap di ammani tu. Mbro nok gima lo, mun di buhun dima cut igkep da. Gino diyem mikwau leu nibon midut nibiyai nikos ser sisarti ammani cem lene apo TUHAN mijoi sut da e?>> 20 Harun buhup nok leu api Musa ningon cut hon nihyet dima.