Ma jiba jingon di sren kin jingon di gom bibon yam
23
1 <<Ma jitri tut nihyet hou ba, jahati tut no di ningon mui tug hon gi joom ser mem noni au.2 Mbro nok gino tungwatu nindigsi yahagom ibon mun di tunggwei tirigi iba ide nimbrap gausi di nijit bi ba, ibiyoom ser ei nikei noho bei lo, ma jitti kin yok au. 3 Mbro nok gino no di ya ei nikei noho bei nuhui mbum lo, ma je di nindigsi jibibon noni ter leu tungwatu nindigsi nya au.
4 Gino jitau kep jide siceu de sapi kin keledai di mbut bisrawir ug rin lene jijem mindhe dima hanyen bak niceu. 5 Gino jide siceu nide keledai mbut tut ndigban di buhun bibor di bindei ba, tti ug ei dihyeisi lene jikon tut noni. Ma jikes noni ei bijimbut leu hak au.
6 Ma jiba jingon di sren bibon no di nuhui mbum di ya ei nikei noho bei bimbot kep tut yo di iba mbrap bit noni. 7 Ma jimbres jenti leu yo di ipai kep tungwatu nya ugwai-gwai. Lene jibindei hukum nimai cut igkep no di ningon ngun au. Lewo dikou sut yo di ibon mun di kinei bibor di nok gima. 8 Ma jisindui sut tungwatu ba, ingot kep je au. Lewo nibingot kep yamti dima bindei ba, tungwatu igyai tu ba, gi mbun ingon hukti tut mun di igbit kan bi ba, nibingot kep yamti kiek no di ningon ngun nihyet bisar noni cem.
9 Ma jiba jingon di can bibon ngkiai nya au. Lewo jikan kep notou mben Mesir yuubon je tirigi po jinok awak ei jingkiaisi pima.>>
Ari bingwam gi nimuhwindacan kin njap gi nimuhwindacan
10 <<Nna ba jiyai miai ei dihyei ttou nsi gom kikau mem ari bingwam nitindur muhwindagom lene jiyem kep njita dima. 11 Noro ma jisindui sut dihyei ttou nsi gom dima ei ari bingwam gi nimuhwindacan. Ma jug yai njita niken di ngat eisi au. Hagom jo mem yo di yuhui mbum nya bigyem lene niken jo mem mindhe-ndhe di yehek nya. Nok gima tut jide biei anggur nghousi kin jide biei zaitun nghousi cem.
12 Ma jiyai kep jide midyai mem njap nitindur muhwindagom lene jikes jinda tut midyai dima mem njap gi nimuhwindacan ba, jigwam kep jinghuisi. Leu binhyepo mibon nituti mem jide mindhe-ndhe nya kin jide awak nya kin ngkiai nya di igyai midyai bit je ba, yahagom igwam kep inghuisi bit je.
13 Ma jiyok ngon kep Ditde nicuk jeti nya hagom. Ma jikuk je bijahara bak ngkiai ide nung di ikuk yok bak nya au. Harin dima jindat kep nung dima ninyenga.>>
Nicukti tut njap ndig nya
(Kel. 34:18-26; Ul. 16:1-17)
14 <<Ma jibon midut nya ninyeng ningai bikwop ari bingwam leu binhyepo jibinggei sut Da. 15 Ma jibon midut Njap Nindig Roti Di Dwoi Bi mem bed Abib bit leu nok dicuk jeti tu. Lewo nipou ne jehei leu minu Mesir mem bed dima. Tirigi jibon midut dima lene jiyem kep roti di dwoi mem njap nitindur muhwindacan au. Bikwop mpe dino jikwei kuk je biDa lene jittei mun di jikwas tut Da kwei.
16 Tirigi jide njita len tu lene jibon midut Njap Nindig Nike Gandum. Tirigi jipuk ningat kwei leu jide biei anggur nghousi kin biei ngat nghousi dideu ari bingwam ningwigsi lene jibon midut Njap Nindig Ig Jibei Mpam Meng.
17 Suar pinai Israel yahagom ikwei kuk yok biDa mem nibon midut ninyeng ningai dini bikwop ari bingwam hagom lewo Dani ne TUHAN ba, dinok jide Allah ri.
18 Gino jibon midut nindig mindhe kep humti ei nimbar hum dokti bak Dani lene jikwas roti di dwoi hi bitut mindhe di jindig kep hum dima tut Dani au. Ma jibet mindhe di jindig kep hum mem nibon midut dima nimmau hi ei mem njap di hyep au.
19 Ma jikon gandum ningat ndrim hi ei Ditde ig mbusyameisi bikwop ari bingwam hagom. Lewo Dani ne TUHAN ba, dinok jide Allah ri.
Gino jikwen domba pmot ninghui e, he kambir pmot ninghui e, lene jiba nipmem nido ngei bikwen ei yeng gomti au.>>
Allah de nipreu eisi nya kin nicukti nya
20 <<Midipinak malaikat gom bibie mem je leu binhyepo noni minyohou ya ser je bibuwak je ug ei minu gom di ditin ei mem je tu. 21 Ma jingig jitingou mem malaikat dima nihyet ba, jibit nihyet cem. Ma jikiek jimig jou tut noni au. Lewo dipinak noni ndam je tu. Noni miciu ser sisar nipigau hanjopti dima kan bi. 22 Gino jibit malaikat dima nihyet ba, jiyai hagom bit leu nok dicuk jeti tu lene midikon pran bit jide siceu nya yahagom. 23 Ditde malaikat mibie tut je bibuwak je ug ei mben Amori kin mben Het kin mben Feris kin mben Kanaan kin mben Hewi kin mben Yebus yahagom ide minu leu api midicok tut yo dima yahagom. 24 Ma jikuk je bak yo dima ide kwar nya di inyohou yo dima ba, jinggei sut yok au. Tirigi yo dima ibon midut lene jiyai bram igyai kepti nya au. Ma jinggek ide kwar di ikuk yok bak nya ba, jitam hagom binnir-wap lene jinggek ide cou tig nya di ipigig ser bikuk yok bak cem. 25 Gino jikuk je bijinggei sut Da di TUHAN nok jide Allah lene midinjei mun di kei nok njita di jiyem kin minyei su di jidut bak jeni ba, midicom ninggwenti nya hagom ei minu ting bibor leu je. 26 Bikwop jitnem bat di inghop nya misrek kinei ei jide minu dini bi sren. Jitnem bat nya mipijet bi sren. Midibindei ba, jide njap jei bibor.
27 Midibindei ba, jide siceu nya mittin tut Da. Tirigi jikon pran bit jide siceu nya lene midibindei ba, ibou buwei nindig bibor apino yahagom minang bingkwei hanyen. 28 Midibindei ba, jide siceu nya yahagom ingon ttin bibor.i Lewo midijji mben Hewi kin mben Kanaan kin mben Het yahagom leu joho bei. 29 Noro midijji yok bingwig mem nijam ari bingwam gom ngat he bi. Leu gi nok lene minu dima minok ha ngunti apino mindhe di niten-pos nya midigek kep mpia ba, yaham je ugwai-gwai. 30 Noro midijji yok sindam bibou jimangti dem mem gima jiya bidem minu dima nisurti-nipekti ug e. 31 Lene midipek minu dima bak jeni ba, nijeisi jo leu minyei Akaba kikau ug bipek kin Minyei Efrat lene jo leu Muk Hacan nintig dip kikau ug bipek kin iggum dip ninghas him. Midisindem tut je leu binhyepo jijji timiei nya ei minu dima bingwig leu je sindam tirigi jidigek kep mpia. 32 Ma jitto mun bak timiei minu dima kin ide nung di ikuk yok bak nya cem au. 33 Lene jice tut yo dima ipek hanjop nsi hi ei jide minu dima au. Gino ipek hanjop nittou nsi gom lene gima mibindei ba, mijikuk je bak ide nung nya ba, jibibon sisar tut Da. Leu gino jikuk je bak ide nung nya lene mijibiam bon nimai.>>