Nicukti tut nigo nibuhupti
22
1 <<Gino tungwagom mbrai sapi ningut gom e, he domba ningut gom e, bibui bibam ba, tri bak hiter cem lene noni ba sapi ningut muhwi biluei ningut gom dima lene ba domba ningut bitai biluei ningut gom dima lene nok. 2 Gino tungwa hi bong ser ig gom ba, kat no di let dimbou mem mmun leu binhyepo nggimang ndigban lene hwen noni bimai lene no di bong ser ig dima ningon mui bi. Noro gino noni kat no di nggimang ndigban mem njap bihwen noni bimai lene ningon mui. 3 Suar tungwa dino mbrai mindhe-ndhe go nibuhup tut mun di noni mbrai dima. Gino nuhui mbum lene jitri noni nok awak bijibipek mitiei mem gima go nibuhup tut nide mun di yai tunggwei dima. 4 Ne gino mindhe nok sapi kin keledai kin domba di noni mbrai dima nonaha lene noni ba ningut can biluei gi hi di noni mbrai pima.5 Gino tungwagom kes nide mindhe-ndhe bigyem kep mintu-minta ei nide sidumti kin nide miai biei anggur nghousi cem leu api mindhe-ndhe dima inggek ngug bigyem kep hiter de njita ei miaisih lene noni ba nide njita kin ba anggur ngat biluei hiter dima nide njita di mindhe-ndhe dima igyem bingwig pima.
6 Gino tungwagom pindei nide miai leu api hum dima sror ug ei hiter de miaisi bigyem gandum di ngun kin gandum di hiter dima ke tu lene no di pindei miai dima go nibuhup biluei gandum di hum yem dima.
7 Gino tungwagom ce tut nisut gom di kes mitiei kin ndigban di nibok kak bibor bit noni leu binhyepo nyohou lo, no di nggimang igkei kwei nggimang hagom bingwig lene jiyai nok gini. Gino jikat no di nggimang dima lene noni tug hagom hanyen bak niceu mbican bram yam. 8 Ne gino hi kat no di nggimang igkei dima bi lene jibuwak no di nyohou pima ug ei jide ig mbusyameisi leu binhyepo noni mipai jit tug hon neheng bipia nonti rino nggimang mun di nisut ba ningon com noni tut dima bi.
9 Nok gima tut ndigban di bindei dino tungwatu nya ibikki yam di nok sapi e, he keledai e, he domba e, he sinsun e, he mun nyeng hagom di pror leu api ingat hanyen bu e, lene ma jibuwak yo cin di ibikki yam dima ug ei jide ig mbusyameisi. Suar no di Allah ndo bipia ningon mui rima tug ndigban dima hagom hanyen bak niceu mbican bram yama.
10 Gino tungwagom ce tut ba, nyohou nisut nide keledai kin sapi kin domba kin mindhe hiter lo, mindhe dima mai ba, yai nibok cem ngkiai di imbuk nya ikwei pos mindhe dima lo, hiter ngat bou niyai him bi lene, 11 ma no dima ug ei jide ig mbusyameisi lene ba TUHAN ninyeng bipai jit tug hon neheng bipia noni mbrai nisut nide mindhe dima bi. Gino ningat ne noni mbrai mindhe dima bi lene nisut ningon jo nyahan drek dip mun di cut igkep nide mindhe dima. Lene no di nyohou mindhe dima migo nibuhup bi. 12 Ne gino ningat ne timiei minu hiter mbrai mindhe dima lene suar no di nyohou mindhe dima ba nide mindhe bigo nibuhup hanyen bak niceu. 13 Gino ningat ne mindhe di niten-pos ttem mindhe pima biyem ninghui leu su lene no di nyohou mindhe dima ket ninjum bindo bak nisut nok bindo. Lene noni migo nibuhup tut mindhe dima bi.
14 Gino tungwagom ppiet nisut nide mindhe leu api mindhe dima bok-ba biyai nimai cem lo, niceu mbut leu bingat gima bou niyai him bi lene no di ppiet dima go nibuhup. 15 Ne gino mindhe dima niceu ningat rin bingat mun dima bou niyai him tu lene no di ppiet mindhe migo nibuhup bi. Ne gino hi go nippiet mindheti dima leu api mindhe dima bok-ba biyai nimai cem lene noni migo tut bi. Lewo mitiei nigo nippietti pima dem mem nibirop bakti tu.>>
Nicukti tut niba nikuk nok bak Allahti biyai munti nya
16 <<Gino tungwagom pai cuk sop gwam nitta pilei gom di hiter yok wab kep bigyo bicut tut lene suar no dima njei mimbron bak nicig leu api wak sop dima nok nitnem. 17 Ne gino sop gwam nitta pilei dima nicig ce tut gi iwak yam bi lene no dima go nibuhup nimangti noyam kin mimbron gi dem mem sop gwam nitta pilei nibok bak nicigya.
18 Suar jikes hukum nimai ei sop di nung kui dip.
19 Suar jikes hukum nimai ei pinai di cut tut mindhe dip.
20 Suar jikes hukum nimai ei no di bui mindhe bindig kep hum ei nimbar hum dokti bak nung di ngkiai ikuk yok bak njiriek Dani dip lewo Dangkom ne TUHAN ri.
21 Ma jimbuk tut ngkiai nya di ibong srig jikieti ba, jingon koi kep yok au. Ma jiyok ngon kep bipia jeni cem jinok ngkiai nya ei minu Mesir nipou su. 22 Ma jiba jingon can bibon kibom nya kin moibihi nya au. 23 Leu gino jibibon yok nok gima lene Da di TUHAN midibuhup ighyet tirigi yahara Da drek dip je. 24 Lene midingon sibui sut je drek dip jiyaisi dima leu api midibindei ba, jitug ndei nimai tug hon yo di ikon pran bit je apino jitnem bat nya minok kibom nya ba, jimunggwom bat nya minok moibihi nya.
25 Gino jiyai mitiei ngwam bak Ditde limwa nya di yuhui mbum lene jibon jenti nok yo di igya tindei mitiei ngwam ba, jikak tut bikum ei gi ibitugti au. 26 Gino tungwagom kes nide sinsun ndok di jei ei jindati nok bitak kep je tut mitiei ngwam jide lene ma suar jitug sinsun dima hanyen binoni nipou tirigi mpia kimbas bigyo. 27 Lewo noni suar sinsun ndok di jei dima bijuk ser nidigokti. Gi bi lene noni mittin mindei kep noni ei nibongti mem mmun i? Gino noni hara Da mem gima dimpu noni lene midibuhup nihyet lewo dingondut noni.
28 Ma jihyet wer mpiahi tut Allah ba, jirom jihyet kui jide nibou ndig cem au.
29 Ma jikwas jide gandum ngan kin ba anggur ngat kin mini zaitun ngei ndrim hi tut Da dem igbit ttou boua.
Ma jidimig jipmot mighumbou nya ei mem Dani. 30 Lene jidimig jide sapi nipmot bou nya kin jide domba nipmot bou nya ei mem Dani. Noro ma jisindui sut ipmot bou nya bibong bit ipmem bat nya mem ari nitindur gom leu api ma jidimig yok ei mem Dani mem njap gi nimuhwindaningai.
31 Jahagom jinok Ditde limwa nya. Gima rino gino mindhe di niten-pos ttem mun di yem ningut gom bimai lene jiyem mikwau dima au. Noro ma jiyai bak nsien nya.>>