Nasso Dhukattepa Ho Aayyaasi Illena Reehe
4
Koro haayyu,
nasso kaasaasi olo dhukkaysadhe,
naqharray nassidhissa qhamu he Haallikkito kodhdheppa ye kodhdhonkissa eemindhapa upadhankuy,
moʼo maalla payni hxumampawhe aayyay he kishakki piyye qhatʼinna haqiye.
2 Nasso Haallikkitoosi husitakka arte,
nasso iyya Iyyesus Kristoose qhawho kodhdhipa okayu ho Haallikkito,
3 Nasso iyya Iyyesuse qhawho ye kodhdhuppa okayu kaasay ho Haallikkito qandhikka.
Nassossi qhamu okayni aʼapaqhte Kristoose toora haadhi husi.
Hantukka piyye qhaatʼinakki qaghi.
4 Dhelle hayyu,
hune he Haallikkito qhoota kodhdhite maallay hxuumampawhe aayyaasi apputte.
Moʼo maallay payni nasso hunena kittatte qagha ho piyye qhaatʼinna qaghana ighghula.
5 Usundhe he piyye qhaatʼinna,
hussa maallay hu qallekka olho piyye qhaatʼinna,
koro olho piyye qhaatʼinna cʼikadhakka iʼusundhena apaqha.
6 Ine he Haallikkito.
Ho Haallikkoosi ara kaasay iʼinena apaqhna,
ho Haallikkito ye kodhdhu kapay ye inena apaqhni,
Nasso dhukattepa ho aayyaasi husatakka an reehneppa arooni.
Haallikko Cʼikno
7 Koro haayyu,
cʼikno ho Haallikkito qhooti kodhdhi maallay inekka ille cʼikanni,
ho qhawhoosi cʼikadha kaasay miʼaaye Haallikkito,
Haallikkoosikka iʼara.
8 Qhawho ye qhaawho tokkoosi cʼikadhi Haallikkoosi ye ari,
moʼo maalla payni Haallikko cʼikno.
9 Haallikko olhu na maallay Miʼaye huusu toʼokoosi karo piyye qhaatʼe kula eraki ine qhama Usottay qagho tayanaaninnu.
Cʼikno Huususikka onke hasa lighattakki ine kitta ximpatheesi.
10 Cʼikno payyo hasa.
Ine qandhikki Haallikko cʼikadhima Uso ine cʼikadhipa qhama cʼuppo haanina hxurakko taayanaaninnu Miʼaye huusuusi qhoota haani maallay erakuy.
11 Koro hayyu,
Haallikko hasa ine cʼikadhi payni,
inekka ille cʼikadhe ine gheeqasa.
12 Yaxakka ho Haallikkoosi hiʼi ye qaghi,
an ille cʼikadhaani payni kapay Haallikko inena kittatte qaakni,
cʼikno huusuka ine kitteemi ho dhukatti kodhdhini.
13 Qhooti Nasso Huususi ine teexi maallay,
qhamu Uso ine qale qaakipa inekka isa Uso qale qaakaanissa an araani.
14 Qhamu Haallikko Appa Miʼaye Huususi dhinsampakko qhaatʼeete kodhipa erakussa an hiini,
an masakkaranikka.
15 Qhawho Iyyesuse qhamu Miʼaye Haallikkito kodhdhisa dhukkaysadhipa isi masakkara kaasay,
Haallikko uso qale qaakni,
usokka Haallikko qale qaakni.
16 Hussa maallay cʼikno Haallikko ine sheeghisi an arrippa Uso dhukkaysadhani.
Haallikko cʼikno.
Qhawho cʼiknottay qaaka Haallikko qale qaaki;
Haallikkokka uso qale qaaki.
17 Piyye qhaatʼinna an qaakaninna qhoota Usoosi lighne maallay kuyyaqko qhaqhitattena qhamu ini palamnennu cʼikno onke hasa lighattakki ine kitta ho dhukatte kodhdhi.
18 Cʼikno ye ghaapi,
cʼikno dhukatte ghaapkoosi ihhela patisa,
ghaapko kʼitʼaathetakki okayi,
qhawho ghaapana cʼikno huusu ho dhukatte qandhikka.
19 Uso iʼinthoosipa ine cʼikadho maallay inekka an Uso cʼikadhaani.
20 Qhawho paya:
“Haallikkoosi an cʼikadha” pa isi kristaanitto tookosi shikka aayyampoolakko,
ho qhawhossi hiʼisi ye cʼikadhi mali Haallikkossi ye hiʼisi cʼikadhe alkasni?
21 Hussa maallay hayossi Iyeesuse ine teexi ho iyyana:
“Ho Haallikko cʼikadha kaasay kristaanittoosi cʼikadhe gheeqasa”.a