3
Qhama miʼaadhe Haallikkito payamneppa ooqamaninnu cʼiknossi Haallikko Appa ine purasi ho mala dhamma!
Dhuke karay ine miʼaadhe huusu.
Olhuna mallay piyye qhaatʼia ye ine arti qhooti Usoosi ye aru maallay.
2 Koro haayyu,
haantu ine miʼaadhe Haallikkito,
karo miinatte qhama moʼo kodhdhinaani hannay ye aramu.
Kristoose xinke armadhina qhoota pareema Uso hiinaani maallay,
qhama Uso lighnissa an araani.
3 Qhawho Kristoose kippadha kaasay qhamu Kristoose ho meethe yena qaghe kodhdhi kula usokka ihhe alhessa.
4 Qhawho cʼuppo kodha kaasay hayo Haallikkitoosikki puli,
moʼo maalla payni cʼuppo kodhe hayo Haallikkitoosi pule.
5 Kristoose qhamu cʼuppo patisenu armadhisa aʼarankuy,
Usona cʼuppo yena qaghi.
6 Yaxakka ho Uso qale thoʼokunko sheegha kaasay cʼuppoosi ye kodhi,
ho cʼuppo kodha kapay Usoosi ye hiʼukka ye arukka.
7 Dhelle haayyu,
yaxakka qhamu ye hune tatakninnu he tiqthadhindha,
Kristoose qhamu ho pare qagha kodhdhi kula qhawho kodhmo pare qaghunkito kodha kaasay ho pare qagha.
8 Qhawho cʼuppo kodha ho Seetʼanay.
Moʼo maalla payni Seetʼana payyotenu ho cʼuppo kodha.
Miʼaaye Haallikkitokka hu okayi kodhmo Seetʼana pulenuy.
9 Qhawho miʼaaye Haallikkito kodhdhi kaasay cʼuppoosi ye kodhi,
moʼunko Haallikkitokka usona kittatte qaakni,
Haallikko qhooti Appa huusu kodhdhi maallay cʼuppo kodhe ye alkasni.
10 Miʼaadhe Haallikkitopa he Seetʼanay hu illena reehameppa isi arama husittay,
qhawho ye kodhmo pare qaghunkito kodhipa isi ye kristaanitto tokkoosi cʼikadhi kaasay ho Haallikkito qandhikka.
Ille Cʼikadhe
11 Hayossi payyotatteb aʼapaqhte iyyanna ille cʼikadhettay qaakindha haadhi husiye,
12 qhamo Kʼaeelessi ho Maghampakkito kodhdhipa qaso huusu poghu kula olo kodhdhe.
Moʼo maallakki poghi?
Qhooti kodhmo huusu ho magha kodhdhipa ho qaso huusuna ho pare qagha kodhdhu maallay.
13 Koro haayyu,
koro piyye qhaatʼinnaki hune shikkina payni olo dhahxhxe.
14 Qhoota kristanaadhdhe cʼikanni maallay fartenu karo qaghito qhama lighghinsa an araani,
qhawho ye cʼikno sheeghi kaasay fartate kittati qaaki.
15 Kristanito kristanito shikka ho qhawho pogha,
ho qhawho pogha qhamu qagho perre ye hume sheeghenna ye sheeghisa aʼaranku.
16 Iyyesus Kristoose qhooti qagho Huusuusi qhoota haani likkasepa teexu maallay cʼikno qhamu moʼo kodhdhisa husattay an arraani;
inekka qagho haanisi qhoota kristaanadheete likkasepa teexe ine gheeqasa.
17 Yaxakka ho kristaanitto kodhdhipa inni kodhaththe sheeghana kristaanitto tookko irrakkadhana hiʼuppa isi yenu horxu payni,
mali cʼikno Haallikkito na kittatte qaghni?
18 Dhelle hayyu,
dhukepa kodhmottay dhiishoy qallithepa pakottay patta ille cʼikadhe hxurri.
19 Ine husitakki qhama dhukampawhe kodhdhinissa arraanippa saqko haanikka isi Uso miinta hxaysadha.
20 Ho an hxaysannekka olho saqko haani inena qalli kaasanna,
moʼo maallay payni Haallikko saqko haanina ghutay qhooti kodhdhi maallay olho kaasasi iʼara.
21 Koro haayyu,
olho saqko haani ye inena qalliki qagha payni Haallikko miinta ini palamne.
22 Qhoota an hayo huusu tiqthanipa olho Uso hxaseesa isa kodhaani maallay olho anghissanni kaasasi iʼine teexna.
23 Hayo huusukka qhama Miʼaye huusu Iyyesus Kristooseesi dhukkaysaneppa qhamo Uso ine hayi kula ille cʼikadhettay qaakoninnu.
24 Qhawho hayidhdhe Haallikkito tiqthadha kaasay Uso qle qaaki;
Haallikkokka usundhe qale qaaki.
Uso qhamu ine qale qaakisakka Nasso Kʼulkʼullossi ine teexitakki an arri.