2
Dhelle haayyu,
olho anna maallay oliisi hune tooxi qhamu huni cʼuppo kodhintennu,
naqharray yaxakkakki cʼuppo konna payni ho qhoota haani Haallikko Paappo miinta shikkara an sheeghni,
Ususakka hossi pare qagha Iyyesus Kristoose.
2 Uso ho cʼuppo haanina hxurakko tayasi;
hussakka cʼuppo haanina patta ye kodhdhunna ho koro piyye qhaatʼi kaasanna.
3 Hayo Huususikki an konne payni qhama he Uso ara kodhdhinessa husitakki an arraani.
4 Qhawho paya:
“Usoosi an ara” naqharray isi hayo huususi ye dhikkisi aayyampoolakko,
dhukekka yena kittatte qaghti.
5 Naqharray qhawho kʼaale Haallikkitonu eeʼe paya kaasay cʼikno Ihhaallikkonu sheeghi hoqhqho.
Usottay qaake haani husitakka arrani.
6 Qhawho iyya Haallikko qale an qaaki,
qhamo Iyyesuse qaaki kula qaake uso gheeqasa.
7 Koro haayyu,
hayussa an hune tooxi ho oladhi,
ho qharronu qagha dhiishoy qhawthitto qandhikka,
hayussa oladhikka kʼaalessi aʼapaqhte.
8 Karo tokkottay hayussa an hune tooxi hossi qagho Kristooseppa haahundhina dhuke kodhdhipa xinpadhu hayo qhawthitto,
thukkanko ippata,
mo’o mallay payni hamakko dhukatte hxusa.
9 Kristaanitto iyya hammakkito kittatte an qaakipa isi kristaanitto tookosi shikka haantukka thukkankito ighgheyyi.
10 Kristaanitto kristaanittoosi c’ikadha hammakkito kittatte qaaki,
hussa maallay yaxakka usottay ye kuththumanni.
11 Naqharray kristaanitto kristaanittoosi shikka thukkankito kittatte qaaki,
ho thukkankito lallaaghama,
thukkanko qhooti na ehxhxe shudhi maallay qhamu karo hunka ashshisa ye ari.
12 Dhelle haayyu,
cʼuppo haahundhi makaxko Iyyesus Kristoosettay qhooti hune hxurami maallay an hune tooxa.
13 Hune appadhdhe haayyukka,
hossi payyootenu qaghaasi qhoota arte maallay an hune tooxa.
Hune ponkorre,
qhoota Maghampakko putte maallay an hune tooxa.
14 Hune dhellekka,
Haallikko Appaasi qhoota arte maallay an hune tooxa.
Appadhdhe haayyu,
hossi paayyootenu qaghaasi qhoota arte maallay an hune tooxa.
Hune ponkorre,
qhoota he dhikitooma kodhdhiteppa kʼaale Haallikkito isi hunena kitatte qaakappa Maghampakko puttanku maallay an hune tooxa.
15 Maghno piyye qhaatʼinnapa olho nakitatte qagha kaasasi olo cʼikadhe,
yaxakka ho piyye qhaatʼe cʼikadha qagha payni Haallikko Appaasi ye cʼikadhi,
16 moʼo maallay payni olho piyye qhaatʼeete qagha kaasay,
yokkunte sakankitopa olho aʼehxhxettay eemana dharraʼo maghasa koro xullesapa shorokunkottay he paseese he piyye qhaatʼinna dhiishoy he Haallikko Appana kanta okaye qandhikka.
17 Piyye qhaatʼepa yokkunte illighghina,
qhawho woʼo Haallikkito kodha kapay perre ye hume sheeghe saasi qaakni.
He Kristoose Toorana He Tiqadhe
18 Dhelle haayyu,
husi perre dhikkattatte;
qhama apaqhte kula ho Kristoose toora iʼokayna,
hantu kakki he Kristoose toora he kisha iʼokaye,
qhamu perre dhikkattatte kodhdhessa husitakki an upanaani.
19 Inena kittatte lighe,
ikkodhitama kapay usundhissa ine qale qandhikki qaghe,
ine qale qaghe payni ahxay,
ine qale kokkisannappa qaakonki,
naqharray usundhe kaasay qhamu ye ine qale kodhdhokisa qhamu aramninu iʼinena reehame.
20 Hune kapay Kristoose qhooti Nasso Kʼulkʼullottay hune shiini maallay hune kaasay dhukeesi aʼaranku.
21 Ano olho anna maallay hune tooxi dhukeesi qhooti huni artennu qandhikka,
naqharray dhukeesi aʼarte,
moʼokakki payni dhukatte kittatte aayya ye tayamti.
22 Qhawho paya Iyyesuse Kristoose qandhippa isi marmadha maletttay aayyampakko yaxa?
Ho Haallikko Appapa Haallikko Miʼayeesi marmadha ususakki ho Kristoosesi toora.
23 Ho Haallikko Miʼayeesi marmadha kaasay qale Haallikko Appa yena qale qaghi;
ho Miʼaye Haallikkito payapa isi masakara kaasay qale Haallikko Appa na qali qaghi.
24 Hossi appayotatte apaqhte ihhunena kittatte qaaki,
Ususakki hunena kittatte qaaka payni,
Haallikko Miʼayepa Appa qale toʼokunkotakka qaakinte.
25 Kippo Uso ine teexi qagho perre ye hume sheeghenna.
26 Qhoota koro hune dhappisna kaaʼitha husisikki an hune tooxi.
27 Nassossi Akkristoosena akkatte qhooti hunena kitattte qaghi maallay kollisampakko pile ye hune gheeqasi;
naqharray Uso olho kaasasi ihhune kollisna;
hu hune kollisnikka dhukeesi dhiisho aayyasi qandhikka.
Hussa maallay qhamo Nasso Kʼulkʼullo hune kollisi kula Kristoose qale qaakindha.