Miʼaye Haallikkitoosi Dhukkaysadhe
5
Yaxakka ho Iyyesuse qhamu Kristoose kodhdhisa dhukkaysadha kaasay miʼaye Haallikkito,
qhawho Haallikko Appaasi cʼikadha kaasay he miʼaadhe Huusu kodhdheesikka icʼcʼikadha.
2 Haallikosikki an cʼikannippa isa hayo huususi kodhaani payni qhama miʼaadhe Huusussi cʼikannissa husittakki an arrani,
3 Haallikko cʼikadhe hayo huusu kodhe.
Hayo Huusukka ho dhikita qandhi,
4 moʼo maalla payni ho miʼaye Haallikkito kodhdhi kaasay maghno piyye qhaatʼinna ippunna.
Ho maghno piyye qhaatʼinna punnakka dhukkaysadhe thaani.
5 Qhawho Iyyesuse qhamu Miʼaye Haallikkito kodhdhi dhukkaysadha malettay ho maghno piyye qhaatʼinna punna yaxa?
6 Ho shoxatte qandheete shoxadhepa maskaʼalaama kʼeqhte Thuusu elisenu okayi Iyyesus Kristoose.
Uso shoxatte qandheete shoxadhepa maskaʼalaama kʼeqhte Thuusu elisenu okayi dhiisho shoxatte qandheete shoxadhenu patta qandhi.
Ho hussaasi masakkarakka Nasso Kʼulkʼullo;
Nasso Kʼulkʼullokka dhukampakko.
7 Hussa maallay misikkire isexkki qagha.
8 Usundhissakka,
Nasso Kʼulkʼullopa shoxatte qandheetepa kʼeeqhte Thuusu.
Isexissa iʼille gharanki.
9 Misikkirunko koritoosi an akkanakka payni,
ho Haallikkito ho koritona ighghula,
hussakka ho Haallikko qhoota Miʼaye huusu maallay masakari.
10 Ho Miʼaye Haallikkito dhukkaysadha kaasay saqko husuna kittatte misikkirisa sheeghi,
yaxakka hoye Haallikko dhukkaysadhi kaasay misikkirunkossi Haallikko qhoota Miʼaye huusu massakariisi qhooti ye dhukkaysadhu maallay Haallikkoosikki ayyampakko kodhi.
11 Misikkirunkusakka husi;
husakka qaghossi perre ye hume sheeghenna Haallikko ine teexi,
qaghussakka Miʼaye Huusutakki tayami.
12 Ho Miʼaye Haallikkito dhukkaysadhi qaghu sheeghi,
ho Miʼaye Haallikkito ye dhukkaysadhu kapay qagho ye sheeghi.
Dhihamte Dhikkattatte
13 Olho anna maallay husi kaasasi hune tooxi hune he Miʼaye Haallikkito dhukaysadha qhama qagho perre ye hume sheeghenna tayattessa arintennu.
14 Ghaapko male Haallikko miinta itʼtʼuye an sheeghni haadhi husi,
hussakka qhamo woʼo Huusu kulakki an ghissanaani payni Uso olho an ghissanni kaasasi iʼinena apaqhna.
15 Olho an ghissanni kaasasi qhamu ine apaqhisa an arri payni,
hussa an ghissanniisi qhama akkanissa an araani.
16 Yaxakka kristaanito tookko ho cʼuppo farteema ye uso hxafasni kodhana hiʼi payni innu ghissadha,
Haallikkokka he cʼuppo ye farteema usundhe hxafasni kodhanu qagho innu teexni.
Cʼuppo farteema koro hxafasa qagha,
qhoota cʼuppo farteema koro hxafasa kapay ighghissadha anu payni.
17 Maghno kaasay cʼuppo,
ikkodhitama kapay cʼuppo farteema ye koro hxafasikki qagha.
18 Naqharray qhawho Miʼaye Haallikkito kodhdhi kaasay qhamu ye cʼuppo kodhipa Iyyesuse isi uso tiqadhapa maghnokka isi ye uso kohxinissa an araani.
19 Ine qhama miʼaadhe Haallikkito kodhdhini kula piyye qhaatʼikka qhamu Maghampakkottay ghapamtisa an araani.
20 Qhamu Miʼaye Haallikkito okayipa Haallikko dhukampakkoosi arenu ine thaayho teexussa an araani,
inekka Miʼaye huusu dhukampakko kodhdhi Iyyesus Kristoosetakki an qaghni.
Usokka Haallikko dhukattepa qagho perre ye hume sheeghenna.
21 Dhelle hayyu,
killankito kalla he tiqadhindha.