Dhihamte Ashorokkenu Teexi
5
Hune shorokke apaqhasindha,
qhoota rakko huneema okaynay maallay oyindha,
woyyo woyyo paya.
2 Shorokunko haahundhi iqararaghoodhi,
lalladhdhe haahundhiisikka itte yiʼi.
3 Workʼepa pirre thaahundhikka ikʼkʼoore;
kʼoore huusundhikka ihhuna masakkara,
kitte thaahundhikka qhamo haththatte hunena dhillinti!
Moʼo maallay payyni perre dhikkatattenukki aʼilla shorokunko holsatte.
4 Toomoma apaqhasindha,
hxayyessi koro hune maangho ghimisi adhdhawrite irriira,
riiressi koro hune mangho ghimina karo qhaame Haallikkossi Olho Kaasa Alkasaa kulakki dhaghghapti.
5 Piyyinna ihhune ghartipa he peepettay isa qaakonku,
qhamo qholtessi asaqhenu meerisi kula kuyyaqko qhaqhitattenu isa he gharisankuyb.
6 Heye hune toore koro pare qaghasa ayyattay qhaqhitte qhaqhiteppa poghankuy.
Rakko Dhuupadhe
7 Koro hayyu,
haka Pogholho okayini saasa dhuupadha.
Qhothampakko piyye awusho xeesa hakinu teexinti saasa qhamu mala dhuupadhipa irrawo payyotattepa ho tupeetesi isi tiqithadha kula,
8 hunekka dhuupadha.
Saqqe haahundhittay kokkisadhanku,
moʼo maallay payni okaye Pogholhito iʼitʼtʼuytiye.
9 Koro hayyu,
olo illa qhurumurume,
taakki ihhuna qhaqhamnayye,
haadhi ho qhaqhitte qhaqhna mankaxeeti shikkari.
10 Koro hayyu,
hxuumapawhessi makaxako Pogholhitottay hxuuma qalleesi qhamu mala rakkito dhuupadhdhessa lighno kodhapa eemonnkuy.
11 He dhuupaythettay kokisadhena qhama hehe poghadhe na paynisa aʼaranku.
Iyyoope qhamu mala dhuupadhipa kokisadhussa aʼapaqhte,
olho Haallikko dhikkattatte nu kodhiisikka ahhiite.
Haallikko xorxithopa ho koro hxurakko hxura.
12 Koro hayyu,
karo ghulattay montho taakki piyyettaka ikkodhdha olho hunkattakka olo akutadhe,
“Eeʼe” payni eeʼe,
“Errayto” payni errayto ikkodhita.
Hasakki ye kodhdhu payni ihhuna qhaqhamnayc.
Dhukkaysadhettay Ghissadhe
13 Hunena kittatte qhawho rakadhdhi iqqagha?
Usussa Ihhallikko ghissadha.
Ho hxasoodhi iqqagha?
Iqhqhallitakko kalatha qhaalladha.
14 Hunena kittatte qhawho udhami qagha?
Xaadhighghe manne kristaananna ihhe kula haya,
usundhekka makaxko Pogholhitottay izzayithettayd shiineppa nu ghissadhonki.
15 Ghissoote adhdhukkaysadhettay ghissadhi qhawho udhamiisi idhdhinsinay,
Pogholhokka iʼuso dhinsina.
Cʼuppo ikkodhikka payni innu hxuramina,
16 hussa maallay cʼuppo haahundhiisi ille minta puutʼa,
qhama dhintennu tookko ittookkonu ghissadha.
Ghissoote qhawho pare qaghana humni sheeghtipa isi olho dhammasikka kodhay.
17 Eeliyaase qhamo haani kula qhawho;
irrawo qhamu ye dhipninnu ikkokkisipa ghissadhu,
perko isxepa karo irrawo piyeema ye dhipunna oladhuy.
18 Lankakka holuy ghissadhu,
irrawokka monthikki dhipuy,
piyyekka maangho awushasi.