Misikirunko Dhukkaysadhatte
11
Dhukkaysadhe payyo olho an kippanniisi “ee,
dhuke idhdhikkanna” payepa akkadhe,
holuppa olho ini hiinisikka qhamu qaghisa ho an upani dhukkaysadhettay.
2 Appadhe kedhdhanukka onke hasa lighatakki arame.
3 Qhaatʼe qhamu kʼaale Haallikkitottay uumamesa dhukkaysadhetakki an upanni,
hussa mallay olho armadha kaasay qhamu olho armadhana ye uumamussa an hela thaayani.a
4 Apeele Kʼayeelena kaanta dhukkaysadhettakki Haallikkonu teexakko itʼtʼoosi.
Xinkesi Haallikko teexakko Apeeleesi qhamu akkadhisa qallina,
qhamu dhukkaysadhettay ho pare qagha kodhdhisa aqalli,
ifarrakakki payni dhukkaysadhe thuusuttay hantukka iʼqalladha.b
5 Henooke farteesi qhamu ye hiininu piyye qhaatʼina dhukkaysadhetakki akkami,
qhooti Haallikko uso akki mallay ye tayamu,
ye akkamunna qharraʼithakka qhamu Haallikko hxasesisa aqalla.c
6 Holuppa dhukkaysadhe male Haallikko hxasese ye alkasamti,
moʼo malla payni he Haallikko kula itʼtʼuya kaasay Haallikko qhamu qaghipa he saqko dhukattettay Uso gheeqanu qhamu olho xeesa nu teexnisa dhukkaysadhe usundhe gheeqasa.
7 Haallikko Noohena olho hannay ye armadhu maallay he thiqthadha inna payina,
Haallikkosikki ghaapipa ahxke huusuusi pehisenu dhukkaysadhettay markape kodhdhu;
dhukkaysadhe thuusuttakki qhaatʼeesi palamisi,
pare qaghunkossi dhukkaysadhettay tayamaasi tayu.d
8 Aprihaamekka xinkesi karo xaytossi ghapatha huusu kodhdhina kula qhamu ashshininu aʼuso ooqina dhukkaysadhetakki eeʼe payi,
xanka kula qhamu ashshini ye arikka payni eeʼekki payipa ashshoye.
9 Qhamo okaayito kodhdhuppa piyyesi kippitona isi dhukkaysadhettay qaaka;
hessi karo miinate kʼaalesi kippito uso qale tayna Yisaakʼepa Yaykʼoope kulakka tunkaanana qaakoy.
10 Moʼo mallay payni kathamassi kiriththo dhikita sheegha Haallikko ghupadhipa gharisusikki thiqthadhi.
11 Aprihaame ikkeshuyaka payni,
Saarakka dhoopante kodhdhi payni,
hossi nu kippo teexi Haallikko ho dhukkaysathama qhooti payipa dhihadho maallay dhukkaysadhetakki paappo miʼayatte kodhdhi.f
12 Hussa maallay qhawho toʼokossi qhamo qhawho fari kula adhihinakki sanynye the qhamo xuske moonthitopa thaxakko pasito hinaaseete qagha kula olo dhihe alkasni na dhalatti.g
13 Hissa kaasay kʼaalessi kippito anu teexisi idhdhukkaysadheppa ye tayonkinna farronki,
ikkodhama kapay sikapnoomi hiʼeppa nu xasonki,
ippiyyinna qaakanakka okaayopa hayhitho qhamu kodhdhessa ihhela sheeghanki.h
14 Ihhasa payana he piyye thuusundhiisi kippadha qhamu kodhdhessa ihhiʼaase.
15 Piyyessi hxuureppa na lighonkiisikki hela ghadhe payni ahxay konan konaye holle iʼalkasna.
16 Hantu kapay piyye ghula monthito qaghanukki yore,
Haallikko qhootinu kathama gharisi maallay Haallikko huusundhi payamettay ye palamu.i
17 Haallikko xinkesi Aprihaameesi theemmina Aprihaame dhukkaysadhetakki Yisaakʼesi teexakkonu itʼtʼoosi,
Aprihaamessi kʼaale kippito akkadhi miʼayessi huusu toʼokoosi teexakkossi asaqhinukki itʼtʼosenu gharsadhi.j
18 Miʼaysakka hossi Haallikko na payi “Sanynye thaahu Yisaakʼetakki ooqaminti.”k
19 Aprihaame Haallikko qhamu he farreesi fartatte haqisnisa qhooti ari maallay Yisaakʼekka qhamu fartatte haqi kulaki dhihadhi.
20 Yisaakʼe olho karo miinatte kodhdhamanna ihhela ghadhipa Yaikʼoopepa Esawoosi dhukkaysadhettay sakoy.l
21 Yaikʼoope xinkessi farrina dhukkaysadhetakki dhelle Yoosefeesi pukkaqate pukkaqati saki,
qharo thoolakitosakka kahhuppa Haallikko kaanasu.m
22 Yoosefe xinkessi farteema itʼtʼuyina waarsho Israʼeelatte piyye Kiptʼattena qhamu lighnisa dhukkaysadhetakki qalli,
meqhqhe huususikka qhamu akkineppa ashshonktannu hayo nu teexu.n
23 Muuse idhdhaladhina ahxke huusu ho uuma xeesa qhamu kodhdhisa qhooti hiʼe maallay hayo pogholhitoosi ye ghaponkinaki dhukkaysadhettay leeqqo isex bhahe.
24 Muuse ibhbhahxi tupettay dhukkaysadhetakki opopko Fereoone payame iishi.o
25 Hxaso xeere qhacʼa cʼuppottay tayamana kaanta waarsho Haallikkito qale rakko akkadheesikki qholladhdhi.
26 Shorokunko piyye Kiptʼatena kaanta qhoota Kristoose rakko akkadhe shorokunko uuma ghula qhamu kodhdhisa upadhu,
moʼo maalla payni olhossi karo miinatte tayaniisi sikapnoomi eemi.
27 Miira poghohitoosikka ye ghaapunna dhukkaysadhettay piyye Kiptʼatteesi hela hxuruppa lighuy,
Haallikkossi ye ehxettay hiʼiisi ho hiʼa kula kodhdhuppa dhihadhisattay kokisadhuy.p
28 Muuse dhukkaysadhetakki kʼeqhte muxipa erkampattessi miʼaadhe qharumadhdhe paaxenu ahayi qhamu ye koro Israʼeelattena miʼaadhe qharumadhdhe paaxintinu kodhu.q
29 Waarsho Israeelatte dhukkaysadhetakki qhama piyye haxawanna ashshi kula Paso Idhdhana tahxhxe,
koro Kiptʼatte kapay iqhqhamussa kula kodhenu theemmana illoqhadhi.
30 Waarsho Israeelatte dhukkaysadhettakki ohintessi kathama Iyyaarko aʼawrughettay ghupadhina kuyyaqako taxxan laaghamenna idhdhoqti.r
31 Xiskatossi ghuppe iththa tʼiire qale rafay Reaape ana payi qhooti koro xayto qiwaasi nakayhottay akkati maallay dhukaysadhettakki koro ye eʼee payi qale ye patu.s
32 Lammi husinna ghutay moʼo an payni?
Qhoota Kedhiʼoonet,
qhoota Parakʼeu,
qhoota Samsoonev,
qhoota Yoftahew,
qhoota Dhaawitex pana qhoota Samuʼeeley holuppa qhoota hxumampawhatte qhama anu thorruyninnu xeere ye qhqhacʼi.
33 Usundhissa dhukkaysadhetakki ahxasadhdhe kame,
dhukettay rafisonki,
kʼaalessi kippito anu teexisikka akkadhonki,
pakke karmidheetesikka kʼuponki,z
34 humna haththattesikka patisonkia,
koorate leefamtinakka pinnokkib,
maalaale thuusundhinakka dhikitonkic,
xeere orxankitonakka tannappe kodhdhonki,
qhipampawhe usundhe qhipenu okayasikka ghoronki.
35 Xiskke koro huusundhi na farri fartatte ihhaqeppa akkadhonkid.
Tookke tookke haqmakko fartatte woyyasi tayadhenukki payeppa pineesi dhafonkippa qootʼo fartatennu he likkasonki.
36 Tookke tookke he ana xikkadhi ikkodhdhe,
aʼusundhe thubhokka.
Holuppa tookkesikka sipletakki ashaapipa manne shappetesa aʼusundhe yakuye,
37 tookke tookke awrughetakki ahaththapi toʼokke toʼokkeesi makasetakki allakki lakkisa bhaqhqhasoyf,
toʼokke toʼokkeesi koratettakka adhdhoththipa farronki.
Isi qootʼuyamappa isa usundhe ghoghorapa unte dhaponkippa qullidhdhe qematepa he talete urkuyonkippa isi lallaaghama.
38 Piyye qhaatʼi qhooti thuusundhi ye kodhdhu maallay mandhitopa guppeetepa pokkeetepa hxohxnidheeti tuurrase.