Haallikko Miʼaadhe Huususi Iqheera
12
Lammi misikiradhdhe hasa ghaqqi qhamo urrathatte inena kaaʼitha qagha payni,
olho dhoqhqho ina kodhdhina kaasappa cʼuppossi ine ghapna kaasasi hela patisnipa hermaththossi karo miinatte here ine gheeqastiisi kokkisadhettay herri.
2 Hossi dhukkaysadhe thani payyasipa isi dhikkateema hxafasina Iyyesuseesi eemni,
Uso hxasossi Usona miinatte qagha maallay rakko maskʼaalasi idhdhuupadhipa palanko maskʼaalasikka dhafoppa kaanaste Haallikkitona miskito kaqqila qakadhuy.
3 Lammi inna tardhonkunppa hela kippo qhaqhankuy,
hossi toorakko hasa ligha cʼuppolawhettay na dhaghghapipa dhuupadhu Iyyesuseesi dhihadhindha!a
4 Acʼcʼuppo qale ohxmamankunna haaki kʼeqhte hunana elti saasa huni ohxmamonkuy.b
5 Dhihamtessi Haallikko qhamo miʼaadhe Huusu kula hasa payipa hune dhihamuusi aththaymotte:
“Miʼaye haayyu,
kʼitʼaathe Haallikitoosi olo dhafi,
xeeri ho qheerinakka olo kippo qhaqhi,
6 moʼo maallay payni Haallikko qhawhu cʼikadhiisi iqhqheera,
hu qhamo miʼayatte akkadhisikka ikʼkʼatʼaʼa.c”
7 Haallikko qhamo miʼaadhe huusu kula ihhune akkadhi maallay dhihamte ihhunettay qheeriisi dhuupadha.
Lammi miʼaye pappo ye dheehi yaxa?
8 Qheerko miʼaadhe akkadhekki huni akkatte payni,
hune maasawhe dhiisoy miʼaadhe maneete qandhi.d
9 Ladhdhi piyyatteka appadhdhe ine kaasasi dheehaki an sheeghni,
isan usundhe kaanasanikka.
Lammi Paappossi Nassawinkitonu malakki the ghulatay nu eeʼe payyettay qaghottay ini qaakne?e
10 Appadhdhe haani olho xeesa paye malakki kuyyaqqe qhacʼasa isi ine dheehe,
Haallikko kapay he kʼulkʼulunko huusu qhottadha qhaman kodhinennu pakirko haaninukki paypa isi ine qattuyaf.
11 Kʼitʼaate kaasay xeere akʼkʼaʼami kaasanna the koro azanisa dhishoy the koro hxasesa ye lighti,
xaysay tupettay kapay koro kolladhinu awsho pare qaghinkitopa ho nakayhito innu tayastig.
12 Hussa maallay tʼihile thaahundhi tardhitipa kilpaye haahundhi maalaleesi dhikitisah.
13 Thoonnakko qhamu dhinninu dhiishoy qhamu ye holli uuma qoopunnu:
“Luhhe haahundhinuy onke gheteʼay gharsadha.i”
Dhihamte Dhikitay
14 Kʼulkʼullunko male yaxakka Pogholhoosi hiʼe qhooti ye alkasni maallay koro kaasay qale nakayyhottay qaakindha,
kʼulkʼullunkottay qaakenu kokkisadha.
15 Hunena kittatte yaxanakka qhamu teexakko Haallikkito yena erqini,
holuppa xissitte raqay qhamu ye hunena kittatte fuʼintippa hune rakkisippa he kishasi lokonnu he tiqthadhindhaj!
16 Qhamo Esawossi yiʼo thara to’otattenu qharumunte thuususi lasi kula yaxakka qhamu woʼo paalakunkitottay ye ghapami takki hoye Haallikko kaanasi qhamu ye kodhdhinippa tayamunnu he tiqthadhindhak.
17 Tupenu Esawo xeeressi sakeesi akkadhe woʼina qhama uso dhawrisa aʼarankuy,
iʼilmaamettay gheeqakkakki payni laanka taye ye alkasu.
18 Karo ghupossi Siinay axarghettay ghapadhe alkasnipa isi haththettay shaʼina tukankopa qhayanqhayhopa pimpatte huni okayonkuy,l
19 ikkito kaththakito taakki karo ikkito Haallikkito qhaskadha kula huni okayonkuy,
he apaqhikka olho pile qhamu olo holle nu qallunukki waathathame.m
20 Moʼo maalla payni hayossi iyyana:
“Aaghitakko kakki ghupussaasi kohxi payni aʼawurughettay haththapipa farun”,
tiqthadhe ye alkasonki.
21 Olho xaytusana kodhdhamadha ho uuma koro ghaapisa qhooti kodhdhi maallay Muuse ippayi:
“An ghaapipa xotholadhao.”
22 Hune kapay Iyyerusaalemessi moonthito qagha kathamassi Haalikko Qaghampakito erkampatadhdhessi ye dhihakko sheeghe hxasottay na illa hole ghupossi Tʼiyyoone kulakka okayte,
23 karo toʼokunko qharumaadhessi makaxxe huusundhi moonthooma tooxame kula itʼtʼuyanku,
karo Haallikkossi olho kaasasa tanynya kodhdhipa karo hessi Haallikko dhukunko nu teexi nassidhessi pare qagha kula, p
24 Hossi katape qhawthitatte koropa Haallikkito kitta ararsampakko kodhdhi Iyyesuse kula,
holuppa karo kʼeqhtessi Apeelenna kaanta kʼeqhtessi olho ghula qalla kula dhaghghapanku.q
25 Haallikko ihhune qalladhana ini apaqhne qhamu huni payintennu he tiqthadhindha.
Ihhassa piyyatte qaghanakki usundhissana hetiqthadhindha napayipa ini apaqhne payonkippa isi yepinnonki payni,
lammi ine hossi moonthonuy okayi hetiqthadhindha iʼinena paynaki anna setto laaghne payni mala pinne alkasnaani?r
26 Xinkissana ikkitto Huusu piyyeesikki leehisi,
hantu kapay:
“Piyyeesi patta ye kodhdhunna Anna hollapa moonthidheesikka thara tootte leehisas” ippayipa akutadhu.
27 Lammi qallithissa iyyanna “thara toʼotte anna holli” heye lelleehe qhamu dhikitneppa qaakonkinnuy naqharray he lelleeha hussakka he uumamme qhamu pannessakki hiʼasi.