10
Hikke the olhossi xeesa karo miinatte okaynanu lighno kodhdhti dhiishoy the dhukatte qandhi,
hussa mallay teexakkossi olo hxuru male aperko perkooma itʼtʼoosi,
ho korossi Haallikko kula itʼtʼuyenu okayinu cʼuppito minakale hxurakko tayasa qhandhikka.
2 Minakali cʼuppito hxurakko tayasi payni ahxay,
teexakko itʼtʼoose ihhela hxurra.
Moʼo maalla payni korossi teexakko teexa qhooti toʼonna male cʼuppito alheesamni maallay kʼalpe thuusundhina qhamu cʼuppolawhe kodhdhe yenu dhakaanni.
3 Naqharray teexakkidhdhissa he perko perkooma cʼuppo korito thaayisa,
4 moʼo maalla payyni kʼeeqhte oyfanadhdheetepa the ghopleete cʼuppoosi patise ye alkasti.
5 Hussa mallay Kristoose xinkessi karo piyye qhaatʼe kula okayna Haallikko Paappona hasi payi:
“Teexakkossi asaqhipa teexako athu woʼukka,
kapay pishko ayye gharisti,
6 teexakko adhilipa ho aqhoota cʼuppito itʼtʼosittay
athu hxasodhuy,
7 xinkisana hasa an payi,
‹qhama matʼaafama qhoota haayyu tooxi kula,
Haallikko hayyu,
haadhi woʼo haahu dhikkisenukki an okay.›”a
8 Hikke payyotatte oliisi qhama konninu ihhaytakka payyni,
Uso kapay hasi payi:
“Teexakko asaqhipa teexakopa teexakkossi adhili pana teexakkossi aqhoota cʼuppito itʼtʼoosiisi athu woʼu,
athu na hxaasodhukka.”
9 Nakalakka hasi payi:
“Ano,
woʼo haahuusi dhikkisenukki an okayi” ho lankaasi shikkarashenu ho payyotateesi pulu.
10 Woʼusattay inekka pishko Iyyesus Kristoose teexakko kodhdhipa itʼtʼuyittay toʼonna male kʼulkʼulawwani.
11 Kʼeesadhdhe kaasay kuyyaqko kuyyaqakoomi shikaareppa isi kodhmo huusundhi kodhapa isi teexakidhdhissa ye cʼuppito hxurakko tayase itʼtʼoosa.b
12 Kristoose kapay teexakko thoʼokoosikki xeere kaasannu itʼtʼoosipa Haallikkito miskitto kaaqila qakkadhuy.
13 Xeerisanu payyatti parakaradhdhe huusu haaki luhhe huusuna kalay kodhdhine saasa ittiqthadhi,c
14 moʼo mallay payni teexakko toʼokussattakki koro kʼulkʼulawina kasaasi perre ye hume sheeghe saasa he meethe yena qaghe kodhi.
15 Nasso Kʼulkʼulokka oli mallay iʼine qalla,
payyotatte Pogholho hasi payi:
16 “Xayi tupettay katape an usundhe qale xulli haadhi thisi,
hikke thaayyusi saqko huusundhi kitta an xawwanni,
kʼalpe thuusundhi kittakka nu tooxo.”d
17 Holuppa Pogholho hasi payi:
“Xaynu koru cʼuppo huusundhipa maghno huusundhiisi anu dhihanni.”e
18 Lammi cʼuppo kaasakki hxurami tupettay teexakko aqhoota cʼuppito itʼtʼoosni ye gheeqasi.
Haallikko Kula Itʼtʼuye Ighgheeqasa
19 Lammi koro haayyu,
kʼeeqhete Iyyesusettakki an karo konposi kʼulkʼullunkkottay ghula manne kʼulkʼullawhatena kittate qagha kula ghapko male xullenu dhikitno tayanni,
20 hussakka ho an xullinaani kaaratottay,
hussa payyo onke qhawthitepa qaghampattessi sakanko Kristoose kaakoru ine qhashamtittay.
21 Kʼeesitto kʼeesadheete ghula ho dhamma amanne Haallikkitosa axawdhi qhoota an sheghni maallay,
22 kʼalpe maghanna alhesammenu saqqe haanisi gharsanni,
pishkko haanisikka qandhe xeesattay shoxomni,
saqko dhukatettappa dhukkaysadhe dhukatettay Haallikko kula iʼtʼtʼuyni.f
23 Ho kʼaale kippito ine teexi ho dhukkaysathami qhooti kodhdhi mallay kippossi an dhukkaysanni qhari isan qaladhaanisi kokkisnipa ghapanni.
24 Inekka cʼiknopa kodhmo xeesa kodhettay qhama kokisaananninnu ille dhikitisni.
25 Tookke tookke qhamu illa hole hela hxure kula inekka inna hxurooni,
laadhdhi kuyyaqko Pogholho na holli qhamu itʼtʼuyisa upadhapa ille dhikitisni.
26 Dhukeesi an arri tupettakki hinu an cʼuppo kodhettay qaakni payni,
lammi teexakko pile aqhoota cʼuppito itʼtʼoosni ye qaghi.
27 Naqharray ho haqhi qhaqhitte koro ghaapisappa haththessi dhikitay paarakaradhdhe Haallikkitoosi yiinay patta.g
28 Qhawho yaxakka ho hikke Muuse iishi qhawho lakki taakki isexki na masakari payni hxurakko malekki apogha.h
29 Lammi qhawho Miʼaye Haallikkitoosi dhafipa katapessi inna kʼulkʼulawisikka qhamo olho lathu kula dhihoy,
Nassossi texakko Haallkkitonakka dhaghghisoy kʼithathe mala kaqqi ghulay iʼakkanikki hune lighti?i
30 Hossi “Haalo haayyu,
Ano haaloteesi an holasna” payisi an araani,
holuppa “Pogholho waarsho huususa inna qhaqhna” iʼiyyi.j
31 Xargho Haallikko qaghampakkitosa rane uumi koro ghaapisi.
32 Perressi qharro rakkito ihhammakko hune hammammi aʼohxhxmatho dhikitattay kookisatteppa na lighankuusi hela thaaya.
33 Kuyyaqko tookko tookko waarsho miintema ahune dhaghghisipa ahune ghoghoroy,
kuyyaqko pilekka koro rakko hasa ligha na dhaghghapisi qhoota dhalumte mallay rakko akkadhankuy.
34 Hune kodhaththe woyyappa the kuyyaqqe kaasay gheyyinay qhama sheeghtessa qhoota arte maallay kodhaththe thaahundhiisikka ahunena sarana adhdhuupatte,
he shappamaasikka qharasadhanku.
35 Hussa maallay Haallikkottay dhukkaysathame thaahundhi shillimathe hune tayasnaasi olo hxure.
36 Qhama woʼoko Haallikkito dhikkisinteppa kʼaalessi kippito akkadhankunnu,
kokisadhepa shikkaare hune gheeqasa,
37 moʼo maallay payyni hasi payamtipa tooxamoy:
“Hossi xeere qhacʼa tupettay okayna,
Uso iʼokayna ye olanikka.
38 Qhawho pare qagha kapay dhukkaysadhetakki qaaki,
ihholla konankonaye holu payni kapay,
Napse Thaayu usottay ye hxasodhinti.”k
39 Ine kapay hessi dhukkaysadhapa isi dhinana dhiishoy hessi konnankonnaye hollapa patonkinna qandhikka.