Tanpadhdhessi Atunkaana Piyyattena Kaalla Kodhi
9
Katapessi paayyotatte aata Haallikko kaanastepa xayto kʼulkʼullawi piyyatte ishsheeghi.
2 Tunkaana ho kompo lakki sheegha aghupadhi,
kompo paayyotattena mahxatossi ana hamakko xawwadhipa tʼarbheesa pana dhilankossi teexakkito na qagha,
kompusanakka ho kʼulkʼulawi anpayi.
3 Karratossi laankanna koray konpossi kʼulkʼullunkkottay konpidhdheete ghula qagha.a
4 Kompusana kittatte maahxaththo ana itʼaana kuuti ho awarkʼatte kodhdhipa taapotessi katapatte awarkʼettay saalikki qagha,
taapotisanna kittattekka thaanko awarkʼatte kodhdhi yiʼo moonthonu okayi ana payi mannapa thoolakkossi Aroone kʼartaxa pana awrughghessi ana hayo hudhdhay tooxikki qagha.b
5 Taapotisanna saappeete erkampatadhdhe kaanastatte kurupele ana payi he hoolo huusundhittay xayto hxurakitoosi shudhakki qagha,
naqharray hantu qhoota oli kaasay thoruye ye ine gheeqasi.c
6 Olho kaasasi onke hasa lighatakki agharisi tupettay,
kʼeesadhe kuyyaqko kaasay kodhmo huusundhi kodhenu tunkanisana karo kompossi payyootatte kulakki xulle.d
7 Naqharray ho kompossi lanka kula xulla kʼesitto kʼeesadheete ghula patta,
hu xulikka perkito thara totte patta,
ixxullanakka qhoota cʼuppo huusu pana qhoota cʼuppo waarsho ye arina kodhi kaaʼitha kʼeeqhti itʼtʼoosni ye ghapadhunna ye xullikka.e
8 Tunkanassi payyotatte haki qaghi saasa onke karo konpossi kʼululkʼullunkkottay ghula kula korottay ashshay haannay qhamu ye armadhussa Nasso Kʼulkʼulo onke hasa lighattay iʼarasa.
9 Hussakka perre hantunnu lighno,
meepa pana teexakko aʼonke hasa lighattay itʼtʼoosi kʼalpe korussa teexassi moʼokka payni hxaysise ye alkasi.
10 Hisi kaasay he aata qhawthitossi haki okayni saasa aata yiʼitopa ho quktattepa ho alhessamatte qawni qawni akodhi.
Kʼeeqhte Kristoose
11 Kristoose kapay olhossi xeesa okaayanu Kʼeesitto kʼeesadheete ghula ikkodhipa ximpadhu,
tunkanassi Uso na xulli ho dhammapa ho meethe yena qaghe,
tunkaanisakka ho xarghe qhawhitottay olo ghupadhuppa ho uumatha piyyinana ye kodhdhu.f
12 Uso ikkaro konposi kʼulkʼullinkkottay konpidheete ghula kula xullana kʼeeqhte taltatte taakki the laqhqhitakito qandhikki ghapadhipa xulluy,
naqharray dhinko perre ye hume sheeghenna tayasenu kʼeeqhte thuususikki ghapadhipa toʼonna male xulluy.
13 Kʼeeqhte taleetepa the oyfanadheete holuppa tarqossi sakanko okkatatte akoro lokumadhisa muxki pishko usundhe alheesse alkasi payni,g
14 hossi Nassossi perre ye hume sheeghettay pukkaqe thuususi teexakko dhawre yena qaghi kodhipa Haallikkonu itʼtʼosuy,
kʼeeqhtessi Kristoose malakki the ghulattay Haallikko qaghampakkoosi qhama kaanasnennu kʼalpe thaaniisi aatassi lathunna kaalla ye alhessinti?
15 Hussa maallay he ooqame kippossi teexami ghapatha perre ye hume sheeghenna qhamu tayanennu Kristoose ararsampakko katapessi qhawthitattena,
cʼuppossi xinke ikkatape paʼathatena kaalla qaghana ikkodhenna usundhe lihasenu murra ikkodhipa naqharrete faru.
16 Sake qagha payni,
qhawhussa sake teexa iffarim ata iqqaghasa upadhe gheeqasa,
17 moʼo maallay payni sakissa hu dhikkanni qhawhussa sake teexi fari payni patta,
naqharray qhawhussa qagha payni sakissa kodhmito ye nakayne.
18 Hussa mallakki katapessi payyotatte kʼeqhte male ye dhikitu.
19 Muuse hayo hikkatte kaasasi waarshonu iqqalli tupettay kʼeeqhte oyfanadheetepa the taleteesi qandhe illakki laxipa ufurko orppo idhdhanapa miise hisoppe ana payittay matʼaafa hikkatepa waarshosissa muxuy,
20 Hasakka na payu:
“Kʼeeqhtessi katapatte qhama tiqadhintennu Haallikko hune hayo teexi haadhi thisi.”h
21 Holuppa tunkaanasippa mahxhxessi ana kodhadhi saamakka kʼeeqhte muxuy.i
22 Karay olho qhacʼa malettey olho kaasay kʼeqhtettay alhesamme qhamu gheeqastisa hikke ihhayay,
kʼeeqhetekki ye elu payni cʼuppito hxurakko ye tayami.j
23 Lammi olhossi manessi kʼulkʼulawe moonthito qaghanu lighno kodhdhi onke hasa lighattakki alheesame usundhe gheeqasi,
hessi he moonthito kodhdhe kapay teexakko ghulattay alhesamme gheeasa.
24 Kristoose manne kulkʼullawhessi he monthito qaghanu lighno kodhdhe axarghe koritottay ghupadhi kula ye xulluy,
naqharray hantuy Uso qhoota haani maallay Haallikkito miinatte ximpadhenukki karo hessi monthito qagha kula xulli.
25 Qhamo kʼeesitto kʼeesadheete ghula perko perkooma kʼeeqhtessi ye thuusu kodhdhu ghapadhipa isi konposi kʼulkʼullunkkottay ghula manne kʼulkʼullawhatena qagha kula xullayya kula,
Kristoose xeere kisha pukkaqte thuususi ye teexakko kodhuppa itʼtʼosenu kaaro moonthito xulluy.
26 Hasi kodhiti payyni ahxay Kristoose haki piyye qhaatʼe umammennu payyatti na hoholepa rakko akkadhe Uso gheeqasa,
hantu kapay perri dhikkatattena pukkaqe thuususi teexakko kodhettay cʼuppo patisenu toʼonna maalle ximpadhuy.
27 Qhawhonu toʼonna male faresikki anu pay,
iffari tupettay qhaqhitte miinta shikkare uso gheeqasa.
28 Lammi Kristoose cʼuppo koro kishana patisenukki toʼonna male he teexipa lankakka isi holla,
hu laanka hollikka he Uso tiqthadhanu dhinko okaasenu dhiishoy cʼuppo huusundhi maallay farenu qandhikka. k