Kʼeesito Kʼesadheete Ghula Katape Qhawthitattena
8
Olho anna maallay oli kaasay qallanni haadhi husi,
hussakka hossi monthooma Haallikkossi kaanasamina miskito kaaqqila qakkadhi Kʼesitto Kʼeesadheette Ghula an sheeghni.a
2 Uso kodhampakko tunkaanassi qhawhottay ye kodhdhu naqharray Pogholhottay ghuputhami dhukattena.
3 Kʼeesitto kʼeesadheete ghula kaasay meepa pana teexakko itʼtʼoosenukki axawwaadhi,
Hussa maallay Kʼeesitu Kʼeesadheete Ghula Iyyesusekka olhu itʼtʼoosni Uso gheeqasa.
4 Uso piyyatti qaaki payni ahxay Kʼeesitto ye kodhdhini,
moʼo maalla payni he hikkenu eeʼe payettay teexakko itʼtʼoosa iqqagha.
5 Usundhissa tunkaanassi moonthito qaghanu lighnopa kaase kodhdhina kittatti kodhadhe.
Hussa maallakki Muuse xinkessi tunkaana ghupadhenu haqina,
Haallikko hasi payipa nu hayo teexu:
“Olho kaasasi olhossi ghupo qharra ho armadhi kula qhama kodhintinu he tiqthadha.”b
6 Naqharray katapessi Iyyesuse na ararsampakko kodhdhi,
thessi qharrona qhamu ghulti kula kodhmo Aʼisoosi teexikka kodhmo huusundhina ighghula,
husakka kʼaalessi ghula kippitosi ghupthami.
7 Katapessi paayyotatenakki meethe yena taymu kulana,
katapessi lankay ye gheeqasinti ahxay.
8 Naqharray Haallikko waarshito qhooti na meethe hiʼi maallay hasi payi:
“Xeere an manne Israʼeelattepa he Yihudha qale katape qhawthitte xullikki okayna.
9 Katapi thessi an appadhdhe huusundhiisi piyye Kiptʼatena lihasina annu xuli kula qandhi,
usundhe qhooti katapisattay ye dhikitonki maallay
An usundhena kaanta laaghghammi.
10 Haallikko iʼiyya xayi tupettay katape an manne Israaʼelatte qale xulli haadhi thisi:
hikke thaayyusi kʼalpe thuusundhi kitta an xawwani,
saqqe huusundhi kittakka nu tooxo.
Ano Haallikko huusundhi An kodhdhini,
usundhekka waarsho haayyu ikkodhine.
11 Lammi yaxakka ghormadhdhitto huususi takki qhawho huusuna ‹Pogholhoosi ara› yena paynippa kollisu,
moʼo maalla payni usundhe kaasay,
miʼaayenu haaka ho bhahxi saasa heye arakki kodhdhine.
12 Dhappitte thuusundhisi annu hxurra,
xaynu koru cʼuppo huusundhiisi anu dhihanni.”c
13 “Katape qhawthitte” paye huusuttay thessi qharrosi keeshatti kodhi,
hussa mallay xeeressi keeshatte na patinti iʼitʼtʼuye.