7
Qhawhu ana payi Melketʼedhekʼekka Pogholho piyye Saalemeppa kʼeesitto Haallikko Olho Kaasay Alkasana,
Aprihaame iʼashshi poghlaadheesi orxamuppa kamoppa isi holanakki Melketʼedhekʼe na hxafipa uso sakoy,a
2 Aprihamekka olhossi poojuyi kaasanna xargho hudhanna tookoosi akkipa nu teexu.
Makaxko Melketʼedhekʼe aʼishigha payni “Pogholho pare qaghunkito” makaxko huusu lankakka “Pogholho Saaleme” hussa payyo:
“Pogholho nakayhito.”
3 Melketʼedhekʼe appapa yaaye takki sanitte sanynye inna dhaladhipa qhoota perre huusu payyotepa dhikkatte kaaʼitha olho aatooxi ye qaghi,
naqharray qhamo lighno Miʼaye Haallikkito kulakki kodhdhinipa perre ye hume sheeghe saasa kʼesito kodhdhuppa isi qaaka.
4 Into qhawhussa qhamu mala kaqqi kaanaste dhammay sheeghisa dhihadhindha,
Aprihaamessi paappo kaffeete kodhdhi kakki olhossi poojkottay tayadhina xargho hudhdhanna tookko nu teexi.
5 Miʼaadhessi Lewe anu kʼeesinko teexi issanynye Aprihaame kodhdhe kakki payni,
waarshito hussakka koro huusundhina qhamu xargho hudhanna tookko akkanennu hikke ippayti.b
6 Melketʼedhekʼe kapay sanynye kʼeesadheetena qandhi,
ikkodhdhitama kapay hossi anu kʼaale kippito teexi Aprihaamenakki teexakko xargho hudhdhanna tookko akkadhipa uso sakoy.
7 Qhawho sake akkadha ho teexana kalla qhamu qhacʼisa iʼarama.
8 He teexakko xargho hudhdhanna tookko akkadha he farra,
karo tookkottay hossi qaghampakko kodhinapa qaakoy apayipa qallu Melketʼedhekʼe akkanna.
9 Laadhdhi sanynyessi Lewi xargho hudhdhanna tookko akkadhe usundhe gheeqasti kakki Aprihaame kaakoruy xargho hudhdhanna tooko teexi payyo.
10 Moʼo maallay payni Melketʼedhekʼe xinkessi Aprihaameema hxafina,
sanynye Lewi Aprihaamena kittatti gheyyiti.
11 Lammi hikkeesi kʼeesinko Lewitakki awaarshonu teexi,
kʼeesinko Lewitakki olho kaasay pare kodhdhi payni ahxay ho kʼeesinko Aroonettay xawthami ye kodhunna ho qhamo Melketʼedhekʼe kula kʼeesunkonu xawthami kʼeesito pile ye gheeqasni.
12 Sanitte sanynye kʼesinkitoona iʼoohama payni hikkekka naqale oohame gheeqasa.
13-14 Pogholhossi haani aqhoota huusu oli kaasay athorruy qhamu ho kafko Yihudhanna kodhdhisa ho arami.
Kafkusanakka qhawho xayna qharaʼitha xaytossi ana teexakko teexisa itʼtʼuyipa kodhadhu ye qaghi.
Muusekka iqhqhoota kʼeesadheete thorruyana qhoota kafko Yihudhanna kaaiʼtha olho qalli ye qaghi.
15 Olho kaasay hu pare kodhdhinipa armadhu xinki kʼeesitto qhamo Melketʼedhekʼe kula xawthamina,
16 Ususakka hu kʼeesitto kodhdhi humna qagho ye pannittay dhiishay qhamo hikatte kula sanitte sanynyadheetettay qandhi.
17 Hasa payipa aqhoota Huusu masakaruy;
“Qhamo Melketʼedhekʼe xawthami kula,
Athokka kʼesitto perre yehume sheeghenna.”c
18-19 Hikke yaxasikka ho meethe yena qaghe ye kodhu maallay,
hayoossi qharro ho lathuppa hoye koro pakriki kodhdhipa haqhuy.
Lammi kippo pile ho ghula an karo Haallikkito itʼtʼuyinanitakki okayi.
20 Hussakka hu kodhdhamadhi akuttettay,
tookke kapay hu kʼeesadhdhe kodhdhe akutte malettay.
21 Iyyesuse kapay hu kʼeesitto kodhdhi akuttettay:
moʼo maalla payni:
“Haallikko qhoota huusu hasi payipa qalladhu:
‹Atho kʼeesitto perre ye hume sheeghenna.›
Haallikko olhu paysikka ye oohi.”d
22 Akuttisanna haqti,
Iyyesuse katape ghulanukki waase kodhdhi.
23 Kʼeesadhessi qharrona dhihakko huusundhi ho dhamma,
moʼo maallay payni kodhmo huusundhiitay perre ye hume sheeghe qhamu ye qaknennu farte na haqhasi,
24 Iyyesuse kapay perre ye hume sheeghe qhooti qaakni maallay kʼeesinko huusu hoye oohami.
25 Hussa maallay kuyyaqqe kaasay qhoota huusundhi inni waathadhankki qaghottay qaaki maallay he Uso kaakoruy karo Haallikkito okaya kaasasi perre ye hume sheeghe saasa dhinise iʼalkasana.
26 Lammi ine kʼeesitto kʼeesadheete ghula,
ho kʼulkʼullaawwi ho meethe yena qaghe,
ho alhesammi,
ho cʼuppolawhatte reehami,
ho monthidheete kutay kaanasami an sheeghni.
27 Uso qhamo kʼeesadhessi kʼeesadheete ghula tokke kula,
qharriteema qhoota cʼuppo huusu maallay nakalakka qhoota cʼuppo korito maalla kuyyaqako kuyyaqakooma teexakko itʼtʼoose ye Uso gheeqastie,
xinkessi Uso he teexakko kodhipa he itʼtʼoosunna qhoota cʼuppo waarshito maallay toʼomalekki dhikkisi,
28 Hikke koro malaalasikki kʼeesadhdhe kʼeesadheete ghula kottipa isi xawwadhay,
akuttessi hikke tupettay okaye kapay miʼaaye Haallikkitoosikki ho perre ye hume sheeghe saasa ho meethe yena qaghi kodheppa xawadhonki.