6
1-2 Hussa maallay kollinkossi payyotatte aqhoota Kristoose ine teexina hohole hxurripa bhahxni.
Kodhmossi cʼuppito fartte kula korotta ashshana karo Haallikkito holepa Haallikko dhukkaysadhepa qhoota shoxatattepa xarghghe koro sappa ghapadhattepa haqmakko koro farrinapa qhoota kollinko qhaqhitte perre ye hume sheeghenna kaaʼitha haannay kiritho xawwadhe xhurri.
3 Woʼo Haallikkito kodhdhini payni husiisi an konnaani.
4 He toʼonnay male hamakko nu hammasamiisi,
he teexakko monthito lokodheesi,
he Nasso Kʼulkʼullo qhottadhdheesi,
5 he Kʼaalessi Haallikkito xeesappa he humna piyye qhaatʼessi okaynana lokodheppa
6 holonki marmaadhonkiisi lanka karo Haallikkito holase ye alkasaminti,
moʼo maalla payni usundhe lanka Immiʼaye Haallikkitosi maskʼalama dhiseppa isi palamisa.
7 Kappe irrawo kuyyaqko kaasay naadhipipa isi qhukappa hossi qhothanukka isi awsho teexay sakeesi Haallikkito akkadhinti.
8 Naqharray kappe hxashhxashshopa moghoghirre fuuʼasay the ye pakirko sheeghintikki kodhdhinti,
xeere inna qhicʼamintikka iʼitʼuye,
dhikkatattekka haththetakki shaʼinti.a
9 Koro haayyu,
an hasa qallanakka payni,
olho qhama dhintessa hiʼaasa qhamu qaghisa ho arami.
10 Haallikko tʼuuhxarko qhooti ye kodhdhu maallay,
kodhmo haahundhi qharrokka ikkodhdha hantu kʼulkʼullawhe kʼarkʼare thaahundhittakka cʼikno aqhqhoota makaxko Huusunu hiʼaasteesi ye thaymonni.
11 Kippossi ateexi haki dhikkani saasa hune kaasay kokkisadhe hasa lighaasi dhikkate saasa qhama hiʼastenukki awwooni.
12 Hussakka dhukkaysadhepa dhupaythettay he kʼaalessi kippito taynaasi qhama lighitennu dhiishoy he shillaʼuma qhama kodhdhinte ini woone.
Kippo Haallikko Teexi Ho Dhukatte
13 Haallikko xinkessi Aprihaamenu kippo teexina,
olho Usona ghula pile qhooti ye qaghi mallay Uso hettay akutadhi,
14 hasakka payu:
“Dhukeenu Anho sakna,
sanynye thaahusikka an naqhisna.”b
15 Aprihaamekka kippossi anu teexiisi idhdhupaythettay tiqthadhi tupettay ittayadhi.
16 Koro qhawho ghulatakki akutadhi,
akutisakka olhossi apayisi qhooti kokkisti maallay ille thamakadhisay usundhena kittatte haqay ippatay.
17 Qhamussa kula Haallikko olhu payiisi qhamu ye oohisa hessi kʼaale kippito taynanu parema arase qhooti woʼi maallay akuttettakki dhiktisi.
18 Haallikko olho lakki ye oohami Uso qhamu ye ayyodhi hiʼaasa husakka kʼaaleesi kippitopac akutetakki inessi kippo inena miinatte qaghasi ghapadhenu Uso kula ghoraniisi qhama dhikitno dhamma tayanaaninnu kodhi.
19 Ine napse thaani qhamu ye lelleehintinnu kippo dhikita ho dhukkaysathama an sheeghni.
Kippusattay karo konpossi Manne K’ulkʼullawhatena kaaratito koray qagha kula xullani.
20 Xaytusakka ho xayna qharraʼitha Iyyesuse qhoota haani maallay na xulli.
Usokka qhamo Melketʼedhekʼe xawthami kula kʼeesitto kʼeesadheete ghula perre ye hume sheeghenakki kodhdhi.