5
Kʼeesitto kʼeesadheete ghula kaasay korito kittatte aqhollipa olho Haallikkito kodhdhinu koro kapa isi kodhdhipa teexakopa olho asaqhi qhoota korito cʼuppito hxurakko tayasa itʼtʼoosenu isa xawwadhi.
2 Usokka ho tardha qhooti kodhdhi maallay,
heye areeppa isi dhappaasi kʼarkʼare iʼalkasanna.
3 Hussa maallakki qhoota huusupa ho koro pileete maallay texakko cʼuppito hxurakko tayasna iʼtʼtʼoose uso gheeqasti.a
4 Yaxakka ho qhamo Aroone Haallikkottay ooqami malettay ho kaanastiisi akkanna ye qaghi.b
5 Ladhdhi Kristoose kaanaste kʼeesito kʼeesadheete ghula Uso konnaasi pukkaqte thuusuna ye akkadhu,
naqharray Haallikko inna apay:
“Atho miʼaye haayyu,
Anokka kuyyu appa haahu.” c
6 Holuppa xayto pileete hasi payti:
“Athokka qhamo Melketʼedhekʼed xawtham kula,
kʼeesito perre ye hume sheeghenna.” e
7 Iyyesuse peressi hassa piyyinna qaakina hossi fartatte Uso dhinise alkasana kula ghisootepa waathadheesi riire dhammapa illmaametakki itʼtʼoosi,
thoodhe kodhdhupa eeʼe payu maallay ghissoote thuusu innu apaqhaminti.f
8 Immiʼaye Haallikkito kodhdhakka payni,
rakkussa iʼakkadhina haqati eeʼe payeesikki kolladhi.
9 Ihusattay hoye meethe na qaghe kodhdhi tupettay,
he Usoosi eeʼe paya kaasay qhamu dhinko perre ye hume sheeghe tayanenu onke kodhdhu.
10 Qhamo Melketʼedhekʼe xawthami kula Haallikko Usosi kʼeesito kʼeesadhdheete ghula kodhdhuppa xawwadhu.
Dhihaamte Qhamu Dhukkaysadhettay Kokkisanennu Ateexi
11 Olinna kaaʼitha olho an thorruynaani ho kishaki qagha,
naqharray ye hana hune xulti maallay hune qalle idhdhikitay.
12 Ahxay haaka hantu saasa kollisampawhe kodhdhe hune gheeqasa,
naqharray qhawho haannay kʼaale Haallikkito payyotatte hune kollisna gheeqasa.
Ho hune gheeqasakka yiʼo dhikita qandhima poodhdho.
13 He poodhdho quka kaasay miʼaadhe qhooti kodhdhe maallay kollinko pare qaghunkitoosi hannay ye aronki.g
14 Yiʼo dhikita kapay koro bhahxi ho olho xeesapa ho magha illena reehe kolladhinu.