Olho Manne Kristaananna Kittatte Korito Gheeqama
2
Atho kapay olhossi kollinko dhukatte qale gharaasi kollis.
2 Tʼiire bhahxoome he qhamu gheeqasti kula qaaka,
he kaanasame,
hehe pankadhapa dhukkaysadhepa cʼiknopa dhuupaythettay ghare qhamu kodhdhinennu dhihami.
3 Holuppa xiskke bhahxoomekka he qaako huusundhittay kodhmo kʼulkʼullawinu gheeqasa,
he olho xeesasi kollisa,
heye makaxxe korito patise takki he quktenu ye aylaadhdhe kodhonki ikkodhdhe.
4 Onke hasa lighattay xiskisa bhahxe xiske hanna qaako ghapadhe qhamu tʼiirepa dhelle huusundhiisi cʼikanepa,
5 hehe pankadhapa he miilaaweppa he manneete kalla kodhmottay ghapamepa lalawhepa he tʼiire thuusundhinu eeʼe paya qhamu kodhdhinennu kollise iʼalkasna.
Olhuna maallay hasa konnekka kʼaale Haallikkito korito miinatte qhamu ye meethuyamintnnuye.
6 Qhamussa kula ponkorrekka he thayhottay pukaqte thuusundhi pankadhapa isi qaaka qhamu kodhdhinenu dhihami.
7 Olho kaasaasi akkodhana xeeno kodhettay nu lighno kodhdhi.
Kolisetakka dhukunkopa hoqhqhunkopa
8 qalliithe ye meethuyamti the ghartiisi nu hiʼas,
hussakka ho ine toora olho magha iʼinena qaallini qhamu dhapnipa palamunuye.
9 Ayladhdhekka he rafisampawhe husundhinu eeʼe paya,
he olho kaasattay usundhe hxasesa,
he yena poko holase,
10 he yena kodhaththe keereqne qhamu kodhdhinennu dhihami.
Laadhdhi kollinko Dhinsampakko haani Haallikkito olho kaasattay qhamu kaanasamninu xeere kaasay dhukkasathame meethe yena qagheesi ihhiʼaase.
11 Moʼo maalla payni Haallikko teexxakkossi korottay dhinisiisi kaasanukki hiʼaasi.
12 Teexakussakka cʼupottay qaakepa woʼoko maghaasi qhama ishinaanippa perri hantunna he pankadhaanippa pare qaghunkopa Haallikko ghaapettay qaakoninukki ine kollisni.
13 Hussakka hossi kippo haani sakami kodhdhi,
Haallikko haani dhammanapa Dhinisamppakko haani Iyyesus Kristoosena xinpadhe Thuusu kaanasamtiisi tiqtadhettay.
14 Uso maghno kaasanna ine pehsadhepa he kodhmo xeesa kodhenu yookapa he Usoosi rehamini waarsho xeesa qhama kodhinaaninnukki ine alheesenu he teexi.
15 Lammi olisaasi kollis,
ghulno kaasattay dhiham,
qheerka,
yaxakka inu ho dhafu.