Erko Erkampakko Pawloose Thithonu
Erko Pawloose Thithonu Tooxi
1
Ano Pawloosessi kodhampakko Haallikkitopa erkampakko Iyyesus Kristoose kodhdhi,
hessi Haallikko qholadhi dhukkaysadhettay qhamu dhikitneppa arnossi dhukattettay Haallikko ghaape kula ghohonkinu xawthami.
2 Dhukkaysadhisapa arnusakka kipposi qagho perre ye hume sheeghenna Haallikkossi ye ayyodhi perre qharreetena teexisa ighghupthame.
3 Xeeresi Uso payi ihxhxafenna hayo Dhinisampakko haani Haallikko yetteexittay,
ote xeesa ayye teexi kakoru Haallikko Kʼaale thuususi iʼarmatheesi.
4 Hossi qhamo haayyu Kristoose dhukkaysadha miʼaye haayyu Thithonu.
Nakayhopa teexako Haallikko Paappopa ho Dhinisamppakko haani Kristoose Iyyesuse ihho kodhdha.
Kodhmo Thitho Piyye Kʼertʼeesenna
5 Olho anna maallay piyye Kʼertʼesesa ho hxuri olho yegherusi qhama gharistipa qhamossi an ho dhihaami kula kathammadhdhe kaasassa qhama xaadhighghe manne kristaananna xawwantinu.
6 Xaadhikto manne kristanana ho meethe ye naqaghe,
ho xiskatto toʼotte akki,
miʼaadhe huusukka he dhukkaysadhapa palakunkonu ille ghaghapadhettay takki eeʼe paye hxurettay he olo qalli.
7 Inthawmpakko manne kristananakka ho kodhmo Haallikkitoosi atarattay akkadhi qhooti kodhdhi maallay ho meethe yena qaghe kodhdhe gheeqasa,
ladhdhi hoye he peepi,
hoye waadhettay miirodhi,
hoye hxayyodhi,
hoye paqhtuyami,
ho pakirko onke ye gheeqastittay tayama kala ye heheri kodhdhe gheeqasa.
8 Laadhdhi ho hayhitho akkadha,
ho olho xeesa cʼikadha,
hohe pankadha,
ho pare qagha,
ho kodhmo Haallikkitonu he teexi,
ho qhamu gheeqasti kula qaaka.
9 Ho tookkeesi kollinkkossi dhukattettay dhiktisa,
ho qhamossi kolladhi kula he kollinkussa tooraasikka qheerenu kʼaalessi dhukkaysathamattay kokkisadha kodhdhe gheeqasa.
10 Koro kiisha hoye eeʼe payi,
ho lathu qalladha,
ho koro tataka qagha,
karo ghulattay korossi karrasamina.a
11 Koro hasa lighaasi kʼampayase gheeqasa,
moʼo maallay payni usudhissa pakirko tayadhenukki payeppa kollinko ye gheeqasi ho koro xarkishaasi isi kollisapa qaako kortoosi isi pulla.
12 Qhawho tookko ho koro Kʼertʼeese hxumampakko napaye hasi payi:
“Koro Kʼertʼeese ayyampoolawhe,
aaghe maghomapa karqithoolawhe heye kodhathadhe woʼe.”
13 Olissakka dhuke,
hussa maallay kokkispa qheeray,
hussakka qhamu dhukkaysadhe xeesa sheeghneppa,
14 tharathe lathu koro Ayhudhattepa hayossi koro dhuke toorana qhamu ye apaqhasnennuye.
15 Koro kʼalpe xeesa sheeghanu olho kaasay ho xeesa,
koro lokmadhipa hoye dhukkaysadhinu kappay olho toʼokkokka ho xeesa ye qaghi,
laadhdhi nunopa kʼalpe thuusudhikka the lokmatti.
16 “Haallikkoosi an araanikki” paye,
kapay kodhmo huusudhittay Iʼuso marmadha,
he koro shikshikeesa,
heye eeʼe payeppa he kodhmo xeesa toʼokokakki ye kodhe alkase.