4
Hune poghlaadhdhe,
moonthito qhama Pogholho sheeghitte qhoota arte maallay ayiladhdhe haahundhiisi pare qaghunkopa lighghaththe male rafisa.
Dhihaamte Pile
2 Thayrapa kalataysadhepa kokisadhettay ghissadhanku.
3 Xashshatesi Kristoose anna maallay shapami qhama qalle alkanaaninu Haallikko kʼaale qallenu qhamu ine mankaxe qhashninu qhoota haanikka ghissadha,
4 holuppa qhamo qalle ye gheeqasi kula ghaqiti qhama pareema kʼaalesi qalle alkasninu ye ghissadha.
5 Koro ye dhukkaysadhi qale arnaneettay lalaghamidha,
faroote attayatte kaasasi pakirsadha.
6 Qhawho kaasannu qhama mala malse holase alkasinte arenu,
qalliithe thaahundhi the sooqhottay asoorasi kula xeere kaasay the lunthuqhapa the soora ikkodhdhita.
Nakaysadhe Dhikkattatte
7 Olho ano na qaghi kaasasi Thikʼikʼoose hune qallina,
uso qhawho haani cʼikathamapa kodhampakko dhukkaysathama hoye qale kodhmo Pogholhito kodhadha.
8 Olho anna qaghni qhamu hune qallinipa saqqe haahundhikka dhikithonkinukki an usoosi hune kula eraki.
9 Qhawho haahundhi dhukaysathamapa cʼikatama Onosimoose uso qale hune kula okayna.
Usudhekka olho hassa qagha kaasasi ihhune qallina.
10 Hossi ye qale shapami Aristʼarokoosepa ashinko Parnapaase Markʼoosekka nakayho ihhune paye;
qhoota Markʼoose kaʼitha xayna qharaʼita erko an hune dhaghapoosi,
hussa maallay ihhune kula okayi payni uso akkadha.
11 Iyyostʼoosessi ana payi Iyyaasukka nakayho ihhunena payi.
Koro Ayihudhattena kittate he Ahxase Haallikkitonu ye qale kodhadha hisi patta,
yeesikka iyye dhiktise.
12 Qhawho haahundhi kodhampakko Kristoos Iyyesuse kodhdhi Epafaara nakayho ihhunena payi.
Usokka uuma qhama dhikitinteppa kasqo male kodhdhankuppa woʼoko Haallikkito kaasattay dhikitankuppa shikkaarankunu kuyyaqako kaasakki qhoota haahundhi ghissootettay orxamami.
13 Holuppa qhoota haahundhipa qhoota koro kathama Lodhokʼiyappa Iyyarapolisenna qaghanu qhamu kokisadhipa isi kodhadhasa ano annu masakara.
14 Akimittosi cʼikathami Lukʼaasepa Teemaasekka nakayho ihhunena paye.
15 Korosi haani katama Lodhokʼiyanna qaghapa Nimifaanepa toʼokunkosi koro dhukkaysadha hiisina manneete qaghanukka nakayho naye paya.
16 Erkuusi ahune nappapi tupettay toʼokunkosi koro dhukkaysadha katama Lodhokʼiyanna qaghanukka qhama nappapni kodhapa hunekka erko Alodhokʼiyanu hune erkaiisi nappapanku.
17 Arkipoosenakka hasa napaya:
“Kodhmossi Appogholhito akkatiisi dhikatatte hxafasenu kokisadhi.”
18 Ho nakayhuusi xarghe haayyuttay hune tooxi ano Pawloose.
Shapame thaayyuusi hela ghadhindha.
Teexakko Haallikkito ihhune qalle kodhdha.