Kʼarkʼarro Akoro Dhukkayisadhanu Iʼilla Holasi
16
Hantu laammi kʼulikʼulawhenu kodhathe aʼilla holasi kaaʼitha,
hayossi an koro dhukkayisadha piyye Kelathiyanna qaghanu an teexitay kodha.
2 Kodhaththe illa holase xinke ano okayina inni kodhdhu;
hunena qhawho kaasay olhu tayadhina thorpana kuyyaqko paayotattena iʼakapa qawni xawadhu.
3 Xinkesi an hune kula okayina korossi hune qholtesama taptape an teexnipa kodhathessi aʼilla holasteesikka karo Iyyerusaaleme qhamu dhaghghaposinenu usundhetay eraka.
4 Apayni ashshankko ye gheeqasa payni anokka usudhe qale an ashshini.
Olho Pawulose Karo Miinatte Kodhe Woʼi
5 Piyye Mekʼodhooniyattay annu lighghe xurri maallay,
piyye Mekʼodhooniyanakki an hxafi payni karo haahundhi an okayni.
6 Yaxara huneka xayto anna ashshankko woʼi kula an ashshana qhama ye kʼarrkʼarrinttenu hune kapa an olani,
yaxaaray hune kapa an xakayte likkasni.
7 Hantu an lighghana hune emme anu wo’i,
woʼo Pogholhito ikkodhdhi payni xeere kisha hune qale oladhdhenu kippo an sheeghi.
8 Naqharray haka Palesi Kuyyaqako Hudhanko Hxupnannaa dhikkantti saasa kathama Efesoonesa an olanni.
9 Moʼo maalla payni mankaxxe kodhmo kishanakki ye qhaashami,
naqarray heye toorakka he kisha.
10 Timothooseka ihhune kula okayina yeghapunna qhamu hune qale gheyyininu kodha,
usokka qhamo hayyu kula ho kodhmo Pogholhitto kodhaye.
11 Hussa maallay yaxakka inni uso dhafu,
nakayyhottay qhamu karo haayyu hollinu kʼarkʼara,
hole huususikka koro haani illakki an tiqhanni.
12 Holluppa qhawho haani Apiloose,
koro haani illay qhamu karo haahundhdhi okkayninnu umma an wathadhdhi ahxayi,
uso kapay hantu hune kula okaye yewoʼu,
naqharray kuyyaqako innu ghartina iʼokayna.
Dhihamtepa Nakaysadhe Dikkatate
13 Thayra,
dhukkaysadhettay dhikitapa shikaaranku,
kokkisadha,
dhikita.
14 Olho akkote kaasa cʼiknottay kodha.
15 Koro haayyu!
ahxkke Istʼfaanose piyye Akkayiyana qaaka koro dhukayisadhana he payotatte qhamu kodhdheppa kʼukʼullawhenu kodhadhenu pukkaqate thuusundhiisi teexonkissa aʼaranku.
16 He qhamo huusundhi qaghapa holu isi usundhe qale kodhadhettay tardhdhanu qhama eeʼe paytenu an hune waathadha.
17 Istʼifanoosepa Forthunatʼoosepa Akaykʼoose karo hayyu okaye thuusundhittay uuma an hxasoodhi,
moʼo maallay payni hune qhoota huni hassa qaghte maalla olho yela eriqiisi usundhe iyye hoqhqhashe.
18 Usundhe yessippa huneesi ihhxaysiseye maallay koro usundhe lighoomasi arindha.
19 Manadhdhe kristaana piyye Isiyanna qagha kaasay nakayho ihunena paye,
Akʼilapa Priskilapa tookkunkko koro dhukkayisadha huusundhisa illa hola kaasay makaxako Pogholhitottay nakayho ihhunena paye.
20 Koro kaasay nakayyho ihune payi,
pukkaqatte pukkaqatte mayyitakko kʼulkʼulawittay elle xasa.