Teexakko Hxuumappa Ho Pako Pile Pile Qalladhatte
14
Kokisadhapa C’ikno kala ashshonku,
teexakko nasawinkitoosi gheeqanku,
dhikitapa hussa kaasanna ghulasapa teexakko hxuumaa qalladhatteesi gheeqanku.
2 Qhawho pakko pilettay qalladha Haallikkonukki qalladhi dhiishay qhawhonu qandhi,
olho bhadhdhamiisi qhooti Nasso Kʼulkʼullottay qalladhi maallay qhawho upanna ye qaghi.
3 Naqharray qhawho hxuuma qalladha koro ghupadhepa kookisasepa dhiktisenukki qalladhi.
4 Qhawho pakke pile pilettay qalladha pukkaqte thuusuusi pattaakki dhiktisi,
naqharray ho hxuuma qalladha kapay thoʼokunko koro dhukkaysadhanaki ghupadhi.
5 Hune kaasakki pako pilettay qallanna payni an wo’a ahxay,
hussana kaanta kapay hxuuma qallante payni the ghulattakki an woʼi,
thoʼookunko koro dhukkaysadhana qhamu ghupithamininu qhawho pako pilettay qalladha hoosi qhalladhiisikki ye holuppa ishighu payni,
ho pako pilettay qhaladhana kaanta qhawho hxuuma qalladha ighghula.
6 Lammi koro haayyu,
xinkesi an karo haahundhi okaynakki,
armateesettay taakinti arnottay taakinti hxuumattay taakinti kollisettay anu hune qalluppa pako pilettay hune qalla payni muhune pakirri.
7 Shubhalepa sonqho heye qagho sheeghe kakki ikkitussa iqhqhassikise isi ye reehami payni ikkitusa huusundhiisi mala upadhe alkanni?
8 Holluppa ooshitte ikkitto hoye ooshittate kodhdhusi qhaskinna payni yaxa orxankonu gharsanna?
9 Hunekka qhamussa kula;
appako haahundhitay aqalladhankunna qallithe koro xulattay huni qalladhonku payni olho qallateesi yaxa are alkasna?
Qhamo koro hayyonu qalladha kulakki akkodhinte.
10 Piyye qhaatʼeete pakke kishakki qagha,
pakkisana pako ollo ishighi yeqaghi.
11 Lammi ano pako an qalaadhiskki anu ishighe alkasu payni qhawho annu qallinu hayhitho annu kodhini,
usokka hayhitho iyye kodhini.
12 Hunekka qhamusa kula;
teexakko nasawnkitoosi tayadhenu he gheeqa qhama kodhite kula,
teexakkossi toʼokunko koro dhukkayisadhasi ghupadha tayadhenu uuma gheeqa.
13 Hussa maallay qhawho pako pilettay qaladha olisa iqaladhiisi ishighe qhamu alkasninu ighghisadha.
14 Xinke an Pako pilettay ghisadhina nasso haayyu ighgisadha,
kapay olho an qaladhi yeye xuli.
15 Lammi moʼo kodhe yegheeqasa?
Nassottay an ghisadha holuppa kalpetaka isan ghisadha,
nassottay an qhaladha holuppa kalpetaka isan qalladha.
16 Hasakki ye kodhdhu payni xinkkesi annassottay Haallikkoosi kaanastina qhawho hayihiththo kodhdhi olissa atho qallatikki yenu xulu payi,
mali olissa atho qallatinu Amen paye alkasni.
17 Yaxara atho parreema Ahaallikko kanasti naqharray qhawho tookko ye gharsamnitay.
18 Ano hune kassanna ghutay qhoota pako pilettay qalladhi maallay Haallikkoosi an kaanasa,
19 naqharray Manne Kʼulkʼullawhatte kalla koro pileesi kollisenu qallidhdhe 10000 hxafnasi qalladhatte kaanta qallidhdhe hxupinki an kʼalpe thaayyuttay qallanni payni iwwo’ya.
20 Koro haayyu dhihadhe thaahundhittay olo miʼaadhe kodhdhi,
olho maghanu miʼaadhe kodhdha,
dhihadhe thaahundhittay kapay koro bhaxi kodhdha.
21 Qhamu Pogholiho hasa payipa,
Matʼaafe Hikkatesa thooxamo kula:
“Koro olona pako apaqhipa
pako koro qurratettakki
awaarshunu qallanni,
ikkodhdhitakka payni ye yela apaqhonki.b”
22 Hussa maallay pako pilettay qalladhe milikkite koro ye dhukkaysadhinu dhiishoy koro dhukkaysadhanu qandhikka,
hxuuma qalladhe kapay koro dhukkaysadhanu dhiishoy koro ye dhukkaysadhinu qandhikka.
23 Laami koro dhukkaysadha kaasakki illa holipa isi pako pilettay qalladhanapa koro hayhiththo taakki koro ye dhukkaysadhi usundhe kula xullu payni koru issasarodhi ye payni?
24 Naqharray kaasakki kʼaale hxuuma qalladhanakki hayhiththo taakki qhawho ye dhukkaysadhi na xullini payni kʼaali apaqhi kaasakki uso dheehna,
olho kaasattakki he ghanni,
25 olho saqako kitteema na bhadhdhami inna armanna,
laadhdhi “Haallikko usundhena kittatte” ippaynipa haki miintettay piyatte xafnisasa kahuppa Haallikkonu sakatu.
Qhamu Mala Haallikko Kaanase Gheeqasiti
26 Koro haayyu,
lammi moʼo an paynaani?
Xinkke aʼilla holtenna qhawho kaasa qhalitako sheeghi,
kollise sheeghi,
armatheese sheeghi,
pako pilettay qalladhi sheeghi,
olho apako pilettay qaladhiisi ishighe sheeghi.
Hussa kaasay kapay ho koro dhukkaysadhaasi ghupadha kodhdhe gheeqasa.
27 Qhawho pako pilettay qalladha qagha payni qhawho lakki taakki inaqekakki payni qhawho isexi ille tiqthadhettay iʼqalladhe,
hollppa ishighe gheeqasa.
28 Qhawho ishighnakki ye qaghi payni ikʼkʼampayappa pukkaqte thuusunuppa Haallikkonu qalladhu
29 Hxuumampawhe lakki taakki isex ikkodhdheppa qalladhonki,
tookke kapay olhossi qalladheesi ippareema qhoththosadhe.
30 Koro illa holina kittatti qhawho tookkonukki olokku armadhi payni ho payyotatte qalladha ikʼkʼampaya.
31 Hune kaasay qhama kollanteppa pukkaqatte pukkaqatte ille dhiktisankunu ille tiqthadhettay hxuuma qalladhe aʼalkasnaku.
32 Nasso hxuumampawhatte hxuumampawhenu iʼeʼosadha.
33 Haallikko Haallikko tampe sheegha dhiishoy ho tampe male qaaka qandhi.
Mannaadhdhe kristaana kʼulikʼullawwe kaasanna qhamussa kula kodhdhe gheeqasa.
34 Xinke koro dhukkaysadha illa holina xiskke ikʼkʼampay,
hikkekka huppayti qhamu ee’e paynenu dhiishoy qhamu qallanenu ye payu.
35 Xiske olo tookko tookko hu are woʼekki qagha payni,
itʼtʼiire huusundhiisi manneema kasqadhe,
moʼo maalla payni xiskaththo xayto toʼokunko koro dhukkaysadha na illa holina kitteemi shikkaartipa isi qalladha payni palanko.
36 Kʼaalle Haallikkito hunena kittati lighti kati?
Taakki Kʼaalle Haallikkito hune kula pattaki dhaghghapti?
37 Qhawho ano hxuumampakko taakki teexakko Nasso Kʼulkʼullito an sheeghi payakki qagha payni husi an hune thooxi qhamu hayo Pogholhito kodhdhisa iʼari,
38 qhawho hussasiisi yeʼarikki qagha payni usokka iʼaramne hxura.
39 Hussa maallay koro haayyu hxuuma qalladheesi uuma gheeqa,
pakko pilettay qalladhesikka olo dhawrase,
40 naqharray olho kaasay qhamu gheeqasipa ighghari kula ikkodhdha.