Xasaththo Pawloose
16
Kodhampattessi toʼokunko koro dhukkaysadha Kenkiraʼoosenna kodhdhiti Fepene alawte thaane qhamu kodhitisa arindha.
2 Akkadhessi kʼulkʼulawhenu gheeqasapa Pogholhottay qhama ise akkatteppa kʼarkʼarsa ihunena gheeqti kaasasi nu kodhankunnu an hunena thaaysa;
ise the yeesippa koro kishaasi kʼarkʼaray.
3 Hessi Iyyesus Kristoosttay ye qale kodhadha,
Priskʼilapa Akʼilanakka nakayye naye paya.
4 Usundhekka qhoota haayu maallay qagho huusundhiisi rakkonukki likkaseppa teexonki,
ano patta ye kodhdhunna toʼokunko koro dhukkaysadha koro ye koro Ayhudhatte kodhdhu kaasakki usundhe kaanasa.
5 Toʼokunkossi koro dhukkaysadha huusundhina manneete qaghanukka nakayho naye paya.
Qhawhossi an cʼikadhi piyye Isiyanna payyooteema Kristoose kula holi Apenetʼoosenakka nakayho naye paya.
6 Tessi onke kishattay hune tardhiti Maariyaamenakka nakayho naye ye paya.
7 Hessi ye qale shapameppa erkampawhatte kittattekka isi uuma arama dhalitho haayu,
Andhronikʼosepa Yuuniyaasenakka nakayho naye paye;
usundhe Kristooseesi dhukkaysadhettay heye inthaweye.
8 Hossi an Pogholhottay cʼikadhi Ampiliyatʼoosenakka nakayho naye paya.
9 Hossi ho Kristoose kodhdhi ine qale kodhadha Urupanoosepa hossi an uuma cʼikadhi Istʼakusenakka nakayho naye paya.
10 Hossi Kristoose dhukkaysadhe maallay temmamipa aramoy Apilisenakka nakayho naye paya.
Ahxke Aristʼopulosenakka nakayho naye paya.
11 Dhalitto haayyu Herodhiyoonanakka nakayho naye paya.
Hessi pogholhottay qagha ahxke Narsisenakka nakayho naye paya.
12 Heesi Pogholhottay kokisadhapa isi kodhadha,
Thirofaynapa Thirufosanakka nakayho naye paya.
Thessi kodhmo Pogholhitottay uuma tardhitipa Pogholhottay isan ise cʼikadha Persisenakka nakayho naye paya.
13 Hossi Pogholhottay qhollammi Rufoosepa thessi yelakka yaaye kodhdhiti yaaye thuusunakka nakayho naye paya.
14 Asinkiratoosepa Feleghoonepa Hermesepa Patiropaasepa Hermaasepa hessi usundhe qale qagha koro haaninakka nakayho naye paya.
15 Filologhoosepa Yuuliyapa Neriyapa alawte thuusunakka nakayho naye paya.
Holuppa Olimpaasepa kʼulkʼullawhesi usundhe qale qagha kaasanna nakayho naye paya.
16 Mayyitakko kʼulkʼulawittay ille xasa.
Toʼokunko koro Kristoose dhukkaysadha kaasakka nakayho ihhunena payi.
Dhihamte Dhikkatatte
17 Koro haayyu,
he qhama ille rerehninu koro kodhapa kollinkossi akkolatteesikka toorettay isi ashshanko haahundhinu kuththumatte gharisana qhama he tiqtatennu an hune dhihama,
usundhenakka sikaapuya.
18 Koro hasa ligha hunnu kodhadhi Pogholho haani Kristoosenu qandhima karqito huusundhinu,
qarrappe huusundhi luntuqhqhapa maltunko huusundhittay laalawheesikki tatake.
19 Kʼaale wonkelattenu he eeʼe paya qhama kodhdhitesa koro kaasay qhooti ari maallay an hxasoodhikka payni;
naqharray olho xeesanu arnanampawhe,
olho maghanu kapay laalawhe qhama kodhdhintenukki awwoʼi.
20 Haallikko nakayhito Seetʼanaasi iwaannapa luhhe haahundhina kalay macʼaqhcʼaqhisu.
Teexakko Pogholho Iyyesus Kristoose ihune qale kodhdha.
21 Hossi ye qale kodhadha Tʼimothoose,
holuppa he dhalittho haayyu kodhdhe Lukʼiyoosepa Iyasoonepa Sositʼiroosekka nakayho ihunena paye.
22 Ano ho erkuusi hune tooxi Tʼertʼiyoosekka nakayho an hunena payi.
23 Hosssi anopa toʼokunkossi koro dhukkaysadha hassa qagha anna hxasonni hayhitto akkadha Kayiyoosekka nakayho ihhunena payi.
Erastʼoosesi pirradhdhe katama xawwadhapa qhawho haani Kʼuartʼoosekka nakayho ihhunena payi.
24 Teexakko Pogholho haani Iyyesus Kristoose ihhune kaasa qale kodhdha!
Amen.
Ghisso kalatha
25-26 Haallikkosi perre ye hume sheeghenna hayo huusu koro ye koro Ayhudhatte kodhdhu kaasay qhamu dhukkaysannipa eeʼe payunnu.
Hussakka hossi matʼaaffe hxuumampawhattena qaghapa hantu ximbhadhu,
olhosi perre sikaapa lighghena bhadhdhamina ximbhadhe thuusuttay Wonkelessi an kollisipa qallame Iyyesus Kristoosettay hune dhiktise alkasna,
27 Haallikkosi uso patta arnanampakko kodhdhinu Iyyesus Kristoosettay perre ye hume sheeghena kalatha innu kodhdha.
Amen!