15
Ine he dhukkaysadhettay dhikita,
koro dhukkaysadhettay taridhina taridhinko huusundhisi dhooqhe ine gheeqasa dhiishay pukkaqe thaaniisi patta hxaseese ye ine gheeqasti.
2 Ine kaasay ghorimtho hani qhamu dhukkaysadhettay dhiktninu olho uso pakirrapa ho uso hxaseesnasi konni.
3 Moʼo maalla payni Kristoose pukkaqate thuusuusi ye hxaseesu,
naaqharray “Dhaghisattossi ihhottay dhaghghisekki yeema dhaghghapi.a
” Qhamu payamtipa tooxamo kulakki na kodhdhiti.
4 Dhuupaythepa dhikitnossi an Matʼaffe Kʼulkʼullawhatte tayanaanittay kippo qhama sheeghnaaninnu olho aʼinthoosipa tooxo kaasay qhamu ine kollinko kodhdhinennu.
5 Haallikko dhuupaythepa dhikitno koro teexa Akkristoos Iyyesuse kaleema ashankunna kitte thaahundhisa innasso toʼokunkito hune teexa.
6 Qhamusa kula hossi Pogholho Iyyesus Kristosena Paappo kodhdhi Haallikko saqako toʼokkopa pako toʼokottay qhama Uso kaanasnte ihhune kodha.
Ote Xeesa Koro Ye Koro Ayhudhatte Kodhdhunnu
7 Kristoose qhamu kaanaste Haallikkitonu hune akkadhi kula huune kaasakka qhamussa kula ille aʼakkadhindha.
8 An hussaasi qalladhana Haallikko kipposi appadhdhe haani inthawennu teexisi qhamu dhikisnipa dhukunko Haallikkito aramonnu Kristoose kodhampakko koro Ayhudhattenakki kodhdhi an hunena payi payyo.
9 Qhamusa kula koro ye koro Ayhudhatte kodhdhu Haallikkoosi qhoota hxurakko huusu maallay qhamu kaanasnennu.
Hussakka qhamu hasa payamtipa tooxamo kula:
“Hussa maallay waarsho ye koro Ayhudhatte kodhdhuna kitteʼita anho kaanasna
Makaxko haahunukka kodhdhathettay kalata itʼtʼoosa.”b
10 Holuppa:
“Hune he huni koro Ayhudhatte kodhdhonku
koro Ayhudhatte qale hxasodhindha.”c
11 Laankakka hasi payamtipa tooxamoy:
“Hune he huni koro Ayhudhatte kodhdhonku Haallikkoosi kaanasa,
warshidhdhe kaasay Usoosi qila qila pasa.”d
12 Qhamussa kula Issayyaase hasi payi:
“Ho sanynye Isseyyenna dhalanna okayna;
Inthawampakko koro ye koro Ayhudhatte kodhdhunna kodhdhu.
Usundhekka usoomi kippo konne.e”
13 Kippo haahundhi humna Nasso Kʼulkʼullitottay qhamu ashshinipa isi ghohanu Haallikkossi kippito dhukkaysadhe taahundhittay hxasopa nakayhoosi ihune naqisa.
Pawloose Qhamu Namallay Shahxumtettay Tooxi
14 Koro haayyu,
hune pukkaqte thahundhina he xeesnottay hoqhqhite,
arno kaasatakka qhama hoqhqhiteppa qhawho tooko tookosi dhihamenu isi alkase sheeghakusa ano pukkaqate thaayyuna an upadhi.
15 Naqharray olho tooko tookosi hunena taayse awoʼipa erkuusi teexakkossi Haallikko ye teexittay shahxunta hune tooxo.
16 Teexakossi Haallikkito ote xeesanna koro ye koro Ayhudhatte kodhdhuusi kollisettay kʼeesito kula qhamo an kodhdhinipa kodhampakko Iyesus Kristoose kodhdhanu.
Hussakka koro ye koro Ayhudhatte kodhdhu qhamu Nasso Kʼulkʼulottay kulkʼullawinippa teexakko Haallikko hxaseesa kodhdhuppa itʼtʼuyunukki an kodhadhi.
17 Hussa maallay Haallikkonu kodhadhe tayyuttay Kristoose Iyyesusttay an peepadha.
18 Olho an qaladhippa ho an kodhittay koro ye koro Ayhudhatte kodhdhu qhamu Haallikkonu eeʼe payninu olho Kristoose yettay kodhdhipa kodhu malettay olho pile an shahxuntettay qallanni ye qaghi.
19 Husakka hu hasa kodhdhi humna Nasso Kʼulkʼullitotappa,
milikitaadhdhepa dhahxotaadhdhettay.
Onke hasa lighattay Iyyerusaalamenu payyatti haka piyye Illirikʼuume kaaʼita saasa wonkeleesi Kristooseesi tomooma torruya.
20 Yokkunte taayyu kriththo qhawho pile paayyisa ghupadhe qandhimma xayto makaxkko Kristoose ye qhaskadhu kaasanna ote xeesaasi thorruye.
21 Hussakka qhamu hasa payamtipa thooxamo kula:
“He qhoota huusu olonu qallu ihhiina,
he ye apaqhonkikka ihhela sheeghna.f”
Pawloose Piyye Roome Kula Ashshenukki Dhihadhi
22 Hussa maallay qhamu anu hune kula okayninu xeere kishaki aye kohxhxi,
23 Hantu kapay piyyadhdhe xaytu anna qaghi kaaʼitha qaghana olho an konni qhooti anu sheeghi maallay,
perre kishanu payyattikki an huneesi hiʼenu yori mallay,
24 an karo Ispaaniya kula ashshanaki an hune hiʼenu dhihadhi,
xinke an haattay lighghina an hune emminapa an kuyyaqqe qhacʼa hune qale oladhipa olhossi an woʼi dhikkisadha tupettay,
ashshanko haayyunukka qhama ye kʼarkʼarintenukki an kippo kodhi.
25 Hantu kapay kʼulkʼulawhessi Iyyerusalamatte qaghaasi kʼarkʼarenukki an usundhe kula ashshankito qaghi.
26 Moʼo maalla payni koro piyye Mekʼdhoniyappa koro piyye Akayya,
kʼulkʼullawhesi piyye Iyyerusalamenna qaghaana kittatte he teekolawhe kodhdhesi kʼarkʼaarenukki ghare!
27 Karayka usundhe kʼarkʼaarenu icʼcʼikadhe,
hussa maallay kitte na gheeqama,
koro ye koro Ayhudhatte kodhdhuki sakesi Nassawinkitosi koro Ayhudhatte qale qhootadha payni,
sakessi ihhassa piyyate tayadheesi koro Ayhudhatte qale qhoottanennu kitte na gheeqama.
28 Hussa maallay kʼarkʼarsassi aʼilla holasiisi Iyyerusaalame kula an ashshitappa teexa tupettay haattaki an lighghinipa hune hiʼapa karo piyye Ispaaniya kula ashsho.
29 Xinke an hune kula okaayina sake Kristoose hoqhqho qhama hune okaynittassa an ara.
30 Koro haayyu,
qhoota haayyu maallay Haallikko kula ghisadhettay ohxmatho haayyuna qhama ye qale kodhdhintennu Pogholho haani Iyyesus Kristoosepa cʼikno Nasso Kʼulkʼullitottay an hune waathadha.
31 Olhanna maallay ye ghissatekka korossi ye dhukkasadhi piyye Yihudhanna qaghana qhama pinninipa kodhmossi haayyu an piyye Iyyerusalamattena sheeghikka kʼulkʼullawhessi haaha qaghana miinatte gharunnu.
32 Hussukka woʼoko Haallikkitottay qhama karo haahundhi hxasottay okaynipa hune kapa hxaysadhanu.
33 Haallikko nakayhito ihhune kaasa qale kodhdha,
Amen.