Yaikʼoope Dhelle Huususikki saki
49
Xaysa tupettay Yaikʼoope dhelle huusuusi iʼooqasipa hasana payu:
“Into illa holama olho karo miintaʼita huneema kodhdhamanaasiki an hune qalliniye.
2 “Hune dhelle Yaikʼoope illeema holapa apaqhanku,
paappo haahundhi Israeelesikka apaqhasonku.
3 “Ropeele!
atho miʼaye haayu qharito,
perresi an ponkorumipa isan uuma dhikitanaki an ho dhali,
kanastepa humnataka aghulay.
4 Ikodhitama kapay qhota qhamo qandheete kakantulamti maalay ghulno atu sheeghinti,
hoore paappo haahuna saappeema hadhdhitipa
qafte thaayyusi lokoy!
5 “Simiʼoonepa Lewikka qasopa qharunko,
Korataadhdhe huusundhikka maahxhxe maghnitho.
6 Usundhekka miirra huusundhitakki tʼiirre kishaasi paaxeppa
qardhawweesikka qhitʼonki,
huusa maalay sullo husundhisa anu xullini,
olhu illema holleppa toruyadhonkisika anuna akkanika.
7 Miirasi huusundhi koro ghapisa
pana patisesi tuusundhi shahxunkito theqhicʼamti ikkodhita!
Piyye Yayikʼoope na kittaʼita an illenakala usundhe pulpuli,
waarsho Israeelate kaasa na kittaʼita an illenakala usundhe qhoqhooni.
8 “Yihuta!
qharumadhe haahu pana qasawuhe haahu iʼhho kaanasna,
xarghgho haahuka amme parakaradhe haahunakki ghappini
qharumadhe haahu pana qasawhe haahuka ho miinteemi kahhineppa ho kanasonki.
9 Yihuta atho miʼaye karmito,
miʼaye haayyu hamoonu hola,
qhamo karmitu ribhi,
kappeemakka rafu,
qhamo karmo nexte kulaki ribhi,
yaxa uso haqisenu shaxumna?
10 Ahxase rafisatte xarghe Yihutanna ye lighintikka,
toolako rafisatte lughghe huusuna kittatte,
hossi rafise uso gheeqasti haki okayni saasa,
waarsho kaasay eeʼekki nu payni.
11 Harreese thuususikka kulo kaarkko woynatesa,
miʼaye harateesikka saaro kaarkko woynatesa ishshapni,
lalle thuususikka tʼayye woynatettay,
laalle asaapeghutu urkuyiisikka tʼayye woynatte atʼiipitakki shoxni.
12 Ehxe huusukka tʼayye weynatenukki iidhdheete ghule,
ilghe huusukka orxenukki piqeete ghule.
13 “Zapiloonekka pasito hinaseeti qaaki,
ghinte thuusukka xayto markapaadhdhe na shikkarenakki kodhdhinti,
saapanko piyye tuusunakka haka piyye Sitoona saasi laaghami.”
14 “Yisakoorekka qhamo harre meqhte dhikita sheegha kula,
ho hattesi akara kara hoghina kittate rafa.
15 Xaytussa inna hxaysadhikka ho xeesa
piyyisakka the koro hxasesa qhamu kodhdhitisa ihhiʼina
hashshito huusuusi dhoqhqhonukki gharsadhi,
ikkittuyamnapa kodhadhu.”
16 “Taanekka kafko Israeelatena tookko kulakki kodhdhinipa,
warsho huususa qhaqhitte qhaqhu.
17 Taanekka tawwossi onkatte hinaseetepa
puutessi onke illena lighghana qagha kula,
qawhossi oollo kulufisa qhamu konnankannaye puqqininu
oollito hoolmakko inna qhawni.
18 Waako haayyu!
dhinise thaahuusikki an tiqitanni!
19 “Kaate korrosi koro orxamakki na tuulla,
Usokka iʼusundhe hopuynapa haaluyuyi.
20 “Ho Aseerena yiʼo xeesa qaghna,
yiʼo apoghlaadhdhenu gharasikki itʼtʼosni.
21 “Niftalemekka qhamo kuumatessi hasa hxurramtipa
isi miʼaadhe xeesooma dhala kula.
22 “Yoosefekka qhamo kaarkkosi awsha qandhe hinaseema fuʼipa
ohinteʼita saaroppa isi awsha kulla.
23 Koro kooʼeetekka uumi uso kottane,
kooʼe huusundhitakka raqqonkippa ghorenki.
24 Naqharray tʼihiile Waako Yaikʼoope dhikitattay
hossi koshshito Israelatte kodhdhi moqhorko dhikitattay
kooʼe huusukka idhdhikitna,
tʼihiile thuusu dhikitatakka ikkokisanna,
25 Hossi hoosi kʼarkʼaara Wakko paappo haahuna,
hossi hosakna,
olho kaasaasi alkasattay,
kʼarkʼrsasi ghuta moontito tayamnattay,
sakessi kala piyyatte kittatte tayamnattay,
sakessi manne dhalitopa qadhmeete tayamattay ihho sakna.
26 Sake ghuppe kedhdhana,
sake koloaadhdhesi perre ye hume sheeghenna kaanta,
sake paappo haahuna ighghula,
hussa kaasay ippukkaqate Yoosefe sappeema oodhdha,
hossi qharummaadhdhe huusuna kittatte ho ghula kodhdhina immiinte thuususa oodhdha.
27 “Piniyaame ooshite olo simidhay,
hu hamuyiisi sinkatho yiʼi,
hu pojuyiisi awnatti qhooti.”
28 Hisi kaasay kaffessi Israeelatte 12,
paappo huusundhikka olho innu qalli husi,
hussakka usundhe kaasay onke gheeqasattakki usundhe saki.
29 Yaikʼoopekka hasi payipa usundhe hayu:
“Ano kuyyqakko anna farripa karo koro haayyu kula ashsho ihxhxafi,
hussa maallay rampesi qhawho piyye Hitiwatte anapayi Efroonena pashito kittatte qaghasa appadhdhe haayyu kapeema ye maayya.
30 Rampisakka hessi piyye Keneaanenna Memrena kaantta qagha xayto Mekefela an payina Aprehaame pasho hawleetenu qhawhosi piyye Hitiwatte Efroonena pasho illay pitami.
31 Aprehaamepa naxaye thuusu Saarapa Yisaakʼepa naxaye tuusu Ripkʼaasi haamatte ausundhe maayi,
anokka xiskatto thaayyu Liyaasi xaytusasa ammaayi.
32 Pashusaasi rampissa na qagha illaki an Hitawaadheete pitami.”
33 Yaikʼoopekka idhdhelle huusunu hussasi qallipa dhikisu tupettay lughghe huusuusi hooresinna rafi sappeemi holsadhipa faruppa karo ahxke huusu kula ashshoyi.