50
Yoosefekka paappo huusu minteemi ranipa na ooyoppa mayyu.
2 Yoosefekka pukaqqo paappo huusuna qhamu ye kʼapni maalllay akimaadhdhesi huusuna kodhadha qhamu kʼorishattay shinenukki hayi,
akimaadhdheka Israeelesi kʼorishattay shiinoki.
3 Pukaqqosi qhamu ye kʼapni maallay akimaadhdhe qhamo aata piyye tuusundhina kula kuyyaqako 40 ki na poghghe,
korossi piyye Kiptʼattenakka kuyyaqako 70 ooyonki.
4 Iilme dhikkisi tupettay Yoosefe ahxke Ferioonena hasinna payi:
“Ayye akkadhanku payni Ferioonenu hasa payapa nu qallanku,
5 ‹Paappo haayyu ifarteema itʼtʼuyina hasi yela payipa ye akutasu,
«Haadhi ano afarra,
hussa maallay hawlesi ano piyye Keneaanesa qhotisa ye maay.»
Lammi an ashshipa paappo haayyu maayama an hollaye.
6 Ferioonekka inna payi:
“Ashshapa qhamu paappo haahu ho akutasi kula maayasay.”
7 Hussa maallay Yoosefe paappo huusu maayasenukki ashshi,
kodhampawhesi Fereoonepa xaadhighghe huusuna mannetepa he piyye Kiptʼatena qagha kaasakka Yoosefe qalimi ashshe.
8 Yoosefekka ahxke huusupa qharumaadhdhe huusu pana ahxke paappo huusuna illakki ashshey.
Miʼaadhepa qeemme pana qholaadhdhe huusundhi pattaki piyye Kesaamesa haqhi.
9 Korossi kareetadheetepa korossi olaadhdheetekka na qali ashshey,
koro uso qaleema ashshikka ho uuma kisha.
10 Afe kole Yordhanoosenna karo oqhqhaye ligha kula qawtesi ana payi Atʼadhena hxafonki.
Haamakka riirepa ikkitto uuma dhakadhattay nu oyonki,
Yoosefekka xaytusasa kuyyaqako taxxanki ooyadhi.
11 Korossi Keneaane piyyisana qaaka ilmessi Qawte Atʼadhena ihiʼenna hasi paye:
ilmi koro piyye Kiptʼatenu ooye haxa,
Husa maallay xaytusana “Apeele Mitʼirayim” kina paye,
xaytusakka kolle Yordhanoosenna afeete.”
12 Dhellesi qhamo paappo huusundhi usundhe hayi kulakki kodhe.
13 Pukaqosiisi idhdhooqheppa piyye Keneaane kula ashonkittappa rampesi Aprihaame qhawho Hitawatena maytenu pitami piyye Memirenna kaanta qagha pasho Mekfelasa maayonki.
14 Yoosefepa qharumaadhdhe huusu pana korosi paappo huusu maayenu na qalle ashshi kaasay immaaye tupettay karo piyye Kiptʼatte kulakki holi.
15 Qharumaadhdhe Yoosefe paappo huusundhi iffari tupettay hasi payeppa isi he ghadha:
“Yaxaaray Yoosefe iʼine shikkina,
olhossi anna dhappini kaasa maallakka ine haaluyu.”
16 Husa maallay hasi payeppa Yoosefe kula erkasamonki:
“Paappo haahu ye farunna qharaʼita hasi payipa hayo teexu:
17 ‹Yoosefena hasa na paya:
«Maʼala dhappitepa cʼuppo qharumaadhdhe haahuna nu xur,
usundhe ihola dhappeye.»
Hantukka payni maʼala aylaadhe Waako paappo haahuna olhu hola dhappeesi nuxur.›”
Yoosefe iʼolissaasi apaqhina iooyi.
18 Xaysa tupettay qharumaadhdhesi huusukka iʼokayeppa namiinteema kiliponkippa:
“Haadhi ine aylaadhdhe haahu” napayonki.
19 Naqharray Yoosefe hasinna payi:
“Haayi olo ghaape!
Ano Waako kapa kodhdhe an alkasna inta?
20 Karay hune olho magha ayeema dhihatte,
Waako kapay qhama kuyyu hiite kula qagho waarsho kishana qhamu dhinninukki xeesno kodhi.
21 Hantukka olo ghaape,
ano hunepa dhelle haahundhiisi ayyiʼashna.”
Onke hasa lighattay qaliite xeesattay usundhe dhiktisu.
Farte Yoosefe
22 Yoosefepa ahxke paappo huusuna piyye Kiptʼattenaki qaake,
Yoosefekka perko 110 ki hxafasi.
23 Yoosefe miʼaadhe Efremeesi haka opo izzxa saasa hiʼi,
miʼaadhe miʼaye Minaase Makire dhalikka Yoosefena tafoomi dhaladhe.
24 Xaysa tupettay Yoosefe qharumadhe huusuna hasinna payi:
“Haadhi ano an farra,
Waako kapay ihune emmina,
piyyinakka hune lihasuppa piyyessi Aprihaamepa Yisaakʼe pana Yaʼikʼoopenu katape xuli kula hune dhaghghapoosu.
25 Yoosefekka dhelle Israeelatena inna payi:
“Kuyyaqako Waako hune emmina meqhqhe haayyuusi akkapa he qale sheeghonku.
26 Yoosefekka perko 110ki hxafaspa faru:
pukaqqo huusuka qhamu ye kʼapninnu akʼorishattay shiinu tupettay saatʼine kiteemi qadhdhepa piyye Kiptʼattesa hxawwadhoki.