Yaikʼoope Qhamu Efremepa Minaseesi Saki
48
Xeere qhacʼa tupettay Yoosefena:
“Paappo haahu iʼudhama” anapayipa anu qallu,
Yoosefekka dhelle huusu lakki Minaasepa Efremeesikki ooqipa Yaikʼoopesi kulesanu ashshoy.
2 Yaikʼoopena:
“Miʼaye haahu Yoosefe ho kulaki okaayi” anapayipa anu qalluna,
usoka idhikitipa hooressi inna rafisa qakkadhdhu.
3 Yaikʼoopekka Yoosefena hasinna payi:
“Waakossi Olho Kaasa Alkasa piyye Keneʼaanena xayto ana Loosa payisa iyye aramadhipa ye sakoy,
4 hasakka yela payu:
‹Sanynye taahuusi annaqisna,
piyyisikka sanynye hokala okaynanu ghapata kodhapa teexa.›”
5 Hassa kula anu okayunna qharaʼita miʼaadhissa lakki appiyye Kiptʼatesa dhalti xaynu koro haayyukki kodhdhinepa dhihamonki,
Roopelepa Simiʼoone qhamu miʼaadhe haayyu kodhdhe kula,
Efreemepa Minaasekka miʼaadhe haayyukki kodhdhine.
6 Miʼadhe usundhe tupettay ho dhalanna kapay,
ihhaahu kodhdhe.
ghapata huusundhittay kapay makaxko qharummaadhdhe huusundhitakki dhihamne.
7 An piyye Mesopotʼomiyannu holapa piyye Efraatanna hxafenu onke takkasa ye haqhinna yaye taahu Raheele piyye Keneaanesa iyya fartipa anokka onkessi karo piyye Efrata kula ashanna hinaseema maayasa.”
Efrata payyo Peete-liheeme.
8 Israeelekka dhelle Yoosefeesi iʼhiʼina hasi payi:
“Hisi koro yaxay?”
9 Yoosefekka:
“Hisi miʼaadhe Haallikko hasasa yetteexi” kinna payi.
Israeelekka inna payi:
“Ye kula itʼtʼospa an usundhe saki.”
10 Xinkisana exxe Israeele keshshana payatti likkeema ye xayto hiʼe,
hussa mallay Yoosefe miʼaadhe huususi paappo huusu kapa itʼoosi,
paappo husukka mamayyoppa tʼatʼabharadhoy.
11 Israeelekka Yoosefena inna payi:
“Qhamo an hollipa laanka ho hiʼasa anu dhihadhukka,
Haallikko naqharay miʼaedhe haahusikka qhama hiini iyye kodhdi”
12 Yoosefekka dhelle huusuusi kilpaye Yaikʼoopenna kalla xighisipa piyyeema kata kahhuppa sakatu.
13 Yoosefekka dhelle huusu lakkiisi iʼakkipa Efremeesi xarghgho miskitotaakki ghapipa Yaikʼoopena xargho pixatte kaaqila shikkaarashu,
Minaasesikka xarghgho pixattetakki ghapipa Yaikʼoopena xarghgho miskito kaqila shikkaarashu.
14 Israeele kaapay xargho miskitosi qaso Efremenna pukaqite saappeemi xawwadhi,
xargho pixateesi xargho miskitto sappaʼita likasuppa Minaase saappeema xawwadhu.
15 Xaysa tupettay Yoosefesi hasi payipa saakoy:
“Waakkossi appadhdhe haayyu Aprihaamepa Yisaakʼe nu kodhadhe
yeesikka haka kuyyu saasa perre haayyu kaasanna hoye koshshitto kodhdhi,
16 Erkampattesi olho magha kaasana ye tiqati iʼusundhe sakti,
usundekka makaxko haayyupa ho appaadhdhe haayyuna ho Aprihaameppa ho Yisaakʼettay iʼooqame,
sanynye tuusundhi piyye kaasasa innaqata”
17 Yoosefe paappo huusu qhamu xarqho huusu miskitosi pukaqate Efreeme saappeema xawwadhisa ihiʼina inna maghti,
qhamu pukkaqate Efremenna saappeete akkinipa pukkaqate Minaasesa xawwadhunnu xargho paappo huusuna ghapu.
18 Yoosefekka paappo huusuna hasinna payi:
“Appa,
kulay hasa qandhikka,
husikki qharitto maallay xargho miskitoosi pukkaqate thuusu sappeema xawwadhi.”
19 Paappo huusu kapay inna payi “ An ara,
miʼaye haayyu an ara,
usoka waarsho ikkodhdhini,
sanynye thuusukka waarsho dhamma ikkodhdhinti.
Ikkodhdhitama kapay qaso huusu usona kaanta ho ghula ikkodhdhini,
sanynye thuusukka waarsho dhammaki kodhdhinti.”
20 Kuyyaqakusana hasi payipa usundhe sakoy:
“Israʼeelaadhdhe kuyaqaku ille sakena makaxxe haahundhiisi hela taayettay hasa payeppa ille sakonki:
‹Haallikko qhamo Efreemeppa qhamo Minaase kula ihhune kodha›”
Yaikʼoope onke husa lighattakki Efreemeesi Minaasena inthoosi.
21 Xaysa tupettay Israeele Yoosefena hasinna payi:
“Lammi ano kuyyaqako anna farri iʼitʼtʼuyi,
naqharay Waako hune qali kodhdhini,
piyyessi kedhdha appaadhdhe haahundhi na qaake kula hune holasu.
22 Piyyessi Sekeme an Amoradheete orxankopa kooettay akiisi qharummaadhdhe haahuna kaanta xargho ghula hoosikki an teexi.”