47
Yoosefekka Ferioone kulaki ashshipa hasana payu:
“Paappo haayyupa qharumadhe haayyu qemmepa talaadhdhepa qholaadhdhe pana olhu sheeghe kaasaasi isixadheppa piyye Keneʼaanenu okayonkippa isi piyye Kesamenna qagha.”
2 Qharummaadhdhe husuna kittatte qhawho hxupinki qholipa Ferioone miinteema itʼtʼosuy.
3 Ferioonekka qharumadhesi Yoosefena:
“Kodhmo haahundhi moʼo?”
innapayipa kasqadhu,
usundhekka inna paye:
“Ine kodhampawhe haahu qhamo appaadhdhe haani kula he qhole koshadha.
4 Holuppa piyye Keneʼaanessa qhoti laaqe uuma hammaatipa xayto qeemmepa talaadhdhe nakoshannekka isiye qaghi mallay,
xeere qhacʼa qhama hassa qaaknenukki an okayni,
hantukka kodhampawhe haahu piyye Kesaamenna qaakenu qhama ine payitinukki anho waatanni.”
5 Ferioonekka Yoosefena inna payi:
“Paappopa qharumaadhdhe haahu hokulaki okaye,
6 haadhi piyye Kiptʼate kaasay xarghghe haahuna.
Hussa maallay paappopa qharumaadhdhe haahunu xaytusa xeesa nu teexpa ippiye Kesaamenna qaake.
Usundhena kittatte he koshnatte dhikitakki qagha payni qhole haayyusa wannaadhe kodh”
7 Xaysa tupettay Yoosefe paappo huusu Yaikʼoopeesi Fereoone kulaki ashshitappa na miinteema itʼtʼoosu,
Yaikʼoopekka Fereooneesi sakoy,
8 Fereoonekka:
“Perre haahu mala ghaqqiti?”
kippayipa Yaikʼoopeesi kasqadhu.
9 Yaikʼoopekka innapayi “Piyyinna perre an haayhunkottay likkasi perko 130,
hussakka perresi appaadhdhe haayyu kedhdha haayhukotta likkase illay aʼille kapeema eema payni he qhacʼapa he rakokka na naqi.”
10 Nakala Yaikʼoope Feriooneesi issakipa nakaysadhuppa nakaanta lighu.
11 Yoosefekka paappopa qharumaadhdhe huusu pana qaso huusu qhamu piyye Kiptʼatena qaaknenukki kodhi,
qhamosi Fereoone nu payi kula piyye Kiptʼatena kittatte xaytosi uuma xeesa Ramise anpayiisi ghapata huusundhi qhamu kodhdhininu nu teexu.
12 Yoosefe paappopa qharumaadhdhe huusu pana ahxke paappo huusu kaasanu qhamo dhihakko miʼaadhe huusundhi miinteema mangho yiʼitoosi qhamanu teexninukki kodhi.
13 Ikkodhitama kapay laaqesi piyye qhaatʼe kaasasa qhooti hammaatti maallay,
hussana payyati piyye Kiptʼatepa piyye Keneʼaane laaqetakki kottaʼame.
14 Yoosofekka pirraadhesi koro piyye Kiptʼatepa koro piyye Keneʼaane manghottay hxorghadhi kaasaasi,
iʼilla holasipa ho Ferioonesa xulleesu.
15 Waarsho Kiptʼattepa ho Keneʼaane ippirraadhe poghghina,
waarsho Kiptʼatte kaasay Yoosefe kapeemi itʼtʼuyipa kasqadhu:
“Maagho ayyinaani ine teexi,
kulay pirraadhe an sheeghni ihhume,
ehxhxe hahutta inna ine eemanaki allaaqetta humnaani?”
16 Yoosefekka haasi payipa nu holasu:
“Apayni pirraadhdhe apoghghite payni qhole haahundhi okaasapa ammanghottay hune ooha.”
17 Hussa maallay usundhekka qholaadhe huusundhiisi Yoosefe kulaki okaase,
usokka kankaadhdhepa,
harraadhdhepa,
qeemmepa,
talaadhdhe pana qholaadhdhe huusundhi kapeema maagho nu teexu,
manghosi iqhqholaadhdhettay ooheesi qhamu laaqe perrkusana qaghana lighghinenu kodhu.
18 Ipperkusa lighghi tupettay perrko nakala qaghana waarshosi Yoosefe kulaki okayipa hasa na payu:
“Pogholho haani olhan ho qhara bhannaani yeqaghi,
pirraadhdhe haani ihhume,
qholaadhdhe haanikka hoosiki an teexni,
lammi xaynu koru Pogholho haaninu olho an teexnaani pashshe haanipa pukaqate thaani malettay olho pile yeqaghi.
19 Emma inna ine eemanaki an humnaani?
Piyye taanikka moonukki patinti?
Inepa pashshe haaniisi akkadhpa mangho nakapa ine teexay,
inekka an aylaadhe Fereoone kodhina,
pashshe haanikka iʼhhuusu kodhdhe,
qamu ini farrinepa piyye taanikka henqqe haqhi maallay poodhaxo an pooxanaani ine teex.
20 Hussa maallay Yoosefe pashshe piyye Kiptʼattena qagha kaasaasi Fereoonenukki xorighi,
laaqesikka qhooti uuma hammaati maallay koro piyye Kiptʼattena qagha kaasay qhawho toʼokoka yehaqhunnaki pashshe hela lasse,
kappisa kaasay te Fereoone kodhdhi.
21 Yoosefekka waarsho Kiptʼatteesi hinasenu haka hinaaseema aylaadhdhe Fereoone kodhu.
22 Ikodhdhakka payni Yoosefe pashshe kʼeesadheeteesi ye xorighukka,
moʼo maallay payni kʼesaadhdhe kuyyaqako kaasay qhooti Fereooonena kaanta kʼarkʼarsa akkadhe maallay,
hxaayisa anu teexina payyati qhooti yiʼo usundhe hxafna tayadhe maallay pashe huusundhiisi ye lassonki.
23 Yoosefekka waarshosinna hasinna payi:
“Haadhi lammi hunepa pashshe haahundhiisi Fereoonenukki an xorighiye podhaxuusi akkadhapa ashonku pashshisaasi pooxanku.
24 Naqharray xeere amangho ghimina xargho hxupinna hxargho tookkosi Fereoonenukki anna qaakasinte,
xargho hxupina hxargho salax kapay poodhaxo appashooma pooxteppa hunepa ahxke haahundhi pana miʼaadhe haahundhinu iyyiʼo kodhdha.”
25 Usundhekka inna paye:
“Lammi qagho haaniisi appehesti maallay pogholho haanina miinatte angharri payni,
aylaadhe Fereoonekki an kodhdhinaani.”
26 Yoosefekka mangho awshi kaasanna xaargho hxupina tookkoosi qhama Fereoonenu teexni maallakki tampe lihasi,
tampisakka haka kuyyu saasa akodhadhittay.
Pashshe ye xargho Fereoonessa xullonki he kʼesadheete patta.
27 Xinkissana waarsho Israeelate piyye Kiptʼattena kittatte xayto anapayi kesaamenakki qaaki,
xaytusasa kodhatte kisha lihsadhonki,
uumakka naqonki.
28 Yaikʼoopekka piyye Kiptʼattena perrko 17 qaaki.
Perre huusukka perko 147 kki hxafe.
29 Israeelekka xeere fartate qhamu na itʼtʼuyessa iʼupadhina miʼaye huusu Yoosefesi iʼooqasipa hasa na payu:
“Hola miinatte an kanaste tayadhi payni xargho haahusi tafo haayyu kaleema qadhdhappa xesnopa dhukkaysatame ayye kontinu ye akutadhay,
xeere an farina piyye Kiptʼatesa oloye maayi.
30 Kuyyaqako an farina piyye Kiptʼatena ye lihaspa hawulesi ana appaadhdhe hayyu maayisa ye maayay” Yoosefekka inna payi:
“Eeʼe olissa ayye qallitiisi ankonna”
31 Yaikʼoopekka hasinna payi:
“Lammi ye akutadh.”
Yoosefekka innu akutadhi,
Israeelekka xaytossi inna rafina kasidheemi ghulladhipa Haallikko kaanasu.