Israeele Ahxke Huusu Iillakki Piyye Kiptʼate Kula Ashshi
46
Israeele olhu sheeghi kaasaki sixadhipa ashshankonu haqu,
ippiyye Persapehenna hxafina Waako paappo huusu Yisaakʼenukki teexakko adhili itʼtʼoosi.
2 Waakoka raaʼetakki awne nu armadhipa:
“Yaikʼoope!
Yaikʼoope!”
na payu.
Usokka inna payi:
“Yee,
haadhi hassaki an qaghi.”
3 Waakokka hasainna payi:
“Ano Waako paappo haahuna Waakkoye karo piyye Kiptʼatte kula ashshenu olo ghapi,
piyyisasa anho waarsho kisha konniye.
4 Ho qale an piyye Kiptʼatte kula oodhdhini,
haahanukka hola ho lihasa,
kuyaqako affartina Yoosofe xarghghe huusuttay ehxhxe haahusi ho holasna.”
5 Xasay tupettay Yaikʼoope piyye Persapehenu ihhaqi,
dhelle Israeelekka paappo huusundhi Yaikʼoopepa miʼaadhe huusundhi pana xiske huusundhiisi karetadhdhesi Ferioone nu erakisa ihhadhdhase,
6 Yaʼikʼoopepa kafko huusu kaasay qholaadhdhepa kodhattesi piyye Keneʼaanesa kodhatadhe kaasaasi issixadheppa karo piyye Kiptʼatte kula ashshonki.
7 He piyye Kipt’atte kula ashshe dhele huusu tʼiirepa ihaadhdhepa oppope pana sanye thuusu kaasay.
8 Hessi Israeele qale karo piyye Kiptʼatte kula ashshena makaxe huusundhi haadhi hisi,
sanynye Yaikʼoope,
qharitto Yaikʼoope Roopele.
9 Dhelle Roopele:
Henohepa,
Felusopa,
Asiroone pana Karmi.
10 Dhelle Simoonekka:
Yimueelepa Yaminepa Ahatepa Yakinepa,
Tʼohare pana Saulesi shette Keneʼaanitatte dhladhi.
11 Dhelle Lewikka:
Kersoonepa,
Kʼeate pana Merari.
12 Dhelle Yihutakka:
Erepa Onaanepa Shelapa Faarese pana Zara.
Naqharray Erepa Onaane piyye Keneʼaanesi farre.
Dhelle Faareesekka:
Hetʼiroonepa Hamule.
13 Dhelle Yisakorekka:
Tolapa Fawapa Yupina pana Shimroone.
14 Dhelle Zapilloonekka:
Seretepa Eloone pana Yahiliʼele.
15 Ponkori hessi Yaikʼoope ippiyye Mespetʼomiyanna qaghana Liya nu dhalti,
holuppa shettesi tina ana payi illay ponkorepa ihaadheete dhihakko huusundhi qhawho 33.
16 Dhelle Katekka:
Tʼifonepa Hakipa Shunipa Esipoonepa,
Eripa Aroti pana Ariʼeli.
17 Dhelle Asereekka Yuminapa Ysuwapa Yisuwina pana Periʼa alawte thuusundhika Sarihe ana payi,
holuppa dhelle Pereʼakka Heperina pana Malkiʼele.
18 Dhelli hudhdhampa tappi kaasay hessi Yaikʼoope hultitesi Laapa miʼaye tuusu Liyanu teexi Zilipana dhali.
19 Naxaye Yaikʼoope Rahelena dhelle hiisi Yoosefepa Piniyaame.
20 Kʼeesttosi katama Heliyute piyye Kiptʼatena qaghana miʼayye Potʼifeeray Asnaate Yoosefenu Minasepa Efremesikki dhalti.
21 Delle Piniyaamekka,
Pelapa,
Pekerepa,
Aspelepa,
Kerapa,
Naʼimaanepa,
Akipa,
Roosipa,
Manfenepa,
Hufima pana Aredhe anpayi.
22 Dhelli 40 hessi Raheele Yaikʼoopenu dhalti pana opoppe hiisi.
23 Miʼaye Tanekka,
Hushime ana payi.
24 Dhelle Niftalemekka,
Yahitʼueelpa,
Kunipa,
Yetʼeri pana Shileme ana payi.
25 Dhelli taxxan kaasay hultitesi Laapa miʼaye thuusu Rahelenu teexi Pilhana Yaikʼoope dhali.
26 Ahxke Yaikʼoope piyye Kiptʼatte kula uso qale ashshena dhihakko huusundhi qhawho 66,
dhihakussasa kapay xiske dhelle huusuna yedhihamonki.
27 Ponkorressi lakki Yoosefe piyye Kiptʼattesa dhali illay axke Yaikʼoope piyye Kiptʼatte kula xulle qhawho 70.
28 Yaikʼoope karo Kesaame kula iʼashshankooma haqina Yihuta qhamu qharaʼitha ashshinipa nu dhihamte akkunukki Yoosefe kula eraki.
Usundhekka ippiyye Kesaamenna hxafenna,
29 Yoosefe kareete tuususikki gharsadhipa paappo huusu Israeeleesi akkadhenu karo Kesaame kula na miinta okayu.
Inna kaanta hxafina pappo huusuusi amoʼiti tʼapparadhipa uuma ooyoyi.
30 Israeelekka Yoosefena inna payi:
“Lammi qhamu aqaghotta qaghitisa anho hiʼi maallay xaaynu koru anfarakka payni rakko yeqaghi.”
31 Xaysa tupettay Yoosefe qhaarumaadhdhe huusupa ahxke paappo huusuna hasinna payi:
“Ferioone kulaki an hadhdhinipa hasana paya:
‹Qharumaadhdhe haayyu piyye Keneʼaanena qaakapa ahxke paappo haayyunakki ye kula okayi.
32 Usundhekka he qhole koshadha qhooti kodhdhe maallay koshnampawhe,
iʼokaayanakka qeemmepa talaadhdhepa qholaadhdhe pana ollhu sheeghe kaasatakki okaye.›
33 Ferioone ihune ooqasipa:
‹Kodhmo haahundhi moʼo?›
payuppa hunena kasqadhu payni,
34 hune hasa payapa nuuholasanku:
‹Ine he aylaadhdhe haahu kodhdhini haadhi haka miʼayunkonu paayyatti qhamo appadhdhe haani kula he qhole koshadha.›
Xaysa tupettay koro piyye Kiptʼatena koro qhole koshadhaasi qhooti musadhi maallay piyye Kesaamesa qhama aqaakittenukki hune payniye.