Yoosefe Qhamu Piniyameesi Ghapi
44
Yoosefe hayampakkosi manneetena hasina payipa hayyu:
“Mangho iffeʼe alkasne kula qaghiti surbhoadhe huusundhi saamatte nusi hoqhashpa,
pirradhe huusundhiisika surbhoadhe huusundhina pakonu ghutu naanu xawwadhay.
2 Mahxathosi haayu quktate asipilho pirratena kodhdhiisi akkappa surbhosi qaso huusundhi takkayasa pirradhdhsi immanghottay pitmane illay qadhay.”
hayampakkosi mane huusuna qhamosi Yoosefe nusi qalli kulakki kodhi.
3 Usundhikka sinkatho awnetay iʼhaqeppa harraadhdhe huusundhiisi feadhonkippa ashanko paayyonki.
4 Haanakki katamana ligheppa okoto ashshonkinna Yoosefe hayampakkosi huusuna hasinna payi:
“Korussa kala ashsha,
adhdhaghapti payni:
‹Olho xetʼa an hune konnina mo’o maallaka olho magha ye holaste?
[Monuki ammaahxatto haayyu asipilho pirratena kodhdhiisi kereqete ata?
napay]
5 Monuki ammahxatho pogholho haayyuna asipilho pirrattena kodhdhisi kereqite ata?
Holuppa mahxatusa hossi pogholho haayyu na qukipa olho bhadhdhamisikka isinu hiʼasa qandhi?
Dhappite uuma haxaasikki ayeema kotte› napaypa nu qallay.”
6 Hayampakkosi manneete iʼashshipa korossisa hxafonna qhamosi anatay pay kulakki usundheesi qalli.
7 Usundhekka hasa inna payeppa nu holasonki:
“Pogholho haani monuka hasa ina qallati?
Ine kodhampawhe haahu he olho hasa lighasi konna qandhi.
8 Xayna qharaʼita pirradhdhesi surbhidhe haanina kittatte an taynikakki qhama piyye Keneʼanu dhoqhnippa ho holanitasi ahhela sheeghay,
emma laadhi hantu olho an amaallay maanne pogholho haanina pirradhdhe taakkinti warrkʼe kereqinaani moʼo?
9 Qhawho mahxatusa akki inena kittatte taayyami payni qhaqhitte fartattesi anama qhaqha,
ine tookkeka an pogholho haaninu ayladhe kodhina.”
10 Usokka inna payina:
“Pare olho hune payte saama anghari,
ikkodhdhitama qhawusa mahxatho qukutate natayami pataakki ayle ye kodhdhina,
hunesi kapay qhawho hune kohxna yeqaghi maallay ashsheesi aʼalkananku.”
11 Qhawuho kaasay dhoqhqho huususi wadhettakki hela odhdhasi,
surbhaadhe huusindhisikka ishshighoki.
12 Hayampakkosi qharunkonuki payipa haaka qaso dhalqhaqhakko saamatte xatuye thiyesu dhikatate mahxathosi quktate surbho Piniyamenna kittatti tayami.
13 Qharumadhdhe huusu olhosisi ihhiʼenna iʼazaneppa lallaadhdhe huusundhisi hela kakkaqeppa,
surbhidhe huusundhisikka feadhonkippa karo katamasi kula holenki.
14 Yihutapa qasawhe huusu Yoosefe kula iʼokaayyankina uso hanna mannete kalla yelighunaki na xafe;
ghuladhokippa haki mintteta piyyate xafne saasa kaanasonki.
15 Yoosefekka inna payina:
“Ata oli moʼo akkodhatte?
Qhawho qhamo hayyu kula qagha qhamu arnani olho bhadhamisi arittay sheeghinissa huni arte?”
16 Yihutakka ippayina:
“Lammi pogholho hanina,
manna paynani?
Moʼo annu holasnani?
Olho an hetay pinisnani ini sheeghnika,
dhappitesi an kodhanisiki Waako inemate hiʼaasi,
lammi qhawhusa maxatusa quktate nakanta taayyami patta ye kodhdhunna ine kaasay ayladhdhe haahu an kodhdhina.”
17 Yoosefekka ippayina:
“Olho hasa lighaasi moʼo kaakki payyni anu konni!
Qhawhusa maxatho quuktate nakanta taayyami pattaakki yeesi ayle kodhdhna,
hune tookke nakayhottay paappo haahundhi kula hola!”
18 Yihutakka Yoosefe kulaki xighghipa na payu:
“Pogholho haayyu!
akko maʼala ye salpa ano kodhampakko haahu an olho toʼoko patta qalladhdha,
atho qhamo Fereoone kula ho kaanasamti qhoota kodhdhiti maallay maʼala olo ya miiroodhi.
19 Pogholho haayyu!
xayna qharaʼita:
‹Paappo taakki qaso asheeghanku?›
kapaytipa ine kasqadhay,
20 inekka:
‹Paappo an sheeghaani,
qaso takkaya hu keeshana kalla dhali qagha,
ho uso qharaʼita qagha iffari,
dhellisa yaye illeta dhaltina kittatte uso patakki qagha maallay paappo usosi uumi cʼikadhi› anhola payni.
21 Atokka ine kodhampawhe haahuna aʼinena payti:
‹Qhama hiininu yekula okayattay.›
22 Inekka poghollho haani!
an hola payni:
‹Miʼayisa paappo huusuna kalla ye rehhamini,
an akkinaanipa okayanitta payni paappo huusu iffarra.›
23 An hasa hola paynina ine kodhampawhe haahuna aʼinena payti:
‹Apayni qasusa haahundhi dhalaqhaqhakusatakki huni okayonku payni laanka ye miinteema huni itʼtʼuyinte.›
24 Inekka karo kodhampako haahu paappo haani kula ahollina olho aʼinena payti kaasaasikki annu qallini.
25 Xaysa tupettay paappo haani iʼinena payi:
‹Hantukka ashshindhapa mangho takkaya ine pitamanku.›
26 Inekka anna payni:
‹Ine ashshine,
apayni qaso haani dhalaqhaqhakusatakki an ashshinaani payni patta.
Usotakki ini ashshooni payni qhawhusa miinta itʼtʼuye ini alkasne.›
27 Paappo haani,
kodhampako haahu,
hasi inena payi:
‹Xiskatto thaayyu Raheele shambho lakki patta qhamu ye dhaltisa aʼaranku;
28 Tookko xayna qharaʼita onke hasa lighnitakki pati,
karay aaghenu eesse kodhdhu,
haka kuyyu saasa qandhe tuqhame kodhdhupa haqhu.
29 Hantuka huusisiki ayyela akkitepa olokku na kodhdhamadhu payni lammi perre haayyu keshana kala illmametaki ahhawle kula ye oodhdhaste.›
30 Lammi hantu miʼaysatakki karo kodhampakko haahu paappo haani kula anu holu payni miʼaysa qhooti usona napse kodhdhi maallay,
31 qhamu yeine qalle qaghisa ihhiʼi payni iffarra,
hussana payatti ine kodhampawhe haahu paappo haaniisi perre huusu keshshana kala ilmametakki an hawle kula oodhdhasni,
32 Ano kodhampakko haahu paappo haayyuna:
‹Miʼaysa qhamu nakayhottay holinu ano nakapa kodhdhina kannpayipa pukaqite taayuusi teexa,
holuppa apayni ‹Miʼayissanakki olokku kodhdhamadhi payni perre haayyu qaghito kaasana ayetta ooyi.›
33 Huusa maallay ano ammiʼayisa kapeema pogholho haayyunu ayle kodhdhapa hassasa haqha,
miʼaye kapay iʼqharummaadhdhe huusu qale hola.
34 Hasaki ye kodhdhu payni miʼayi malettay mala paappo kulla hole alkasni?
Moʼo kaki payini hasa anu konni,
akko maʼala qootʼu paappo haayyusa kodhdhamanna qhama hiininu oloye kodhi.”