Qharummaadhdhe Yoosefe Qhamu Piyye Kiptʼatte Kula Hole
43
Laaqe piyye Keneanessa uumi naqitipa isi ashshay,
2 ahxke Yaikʼoopekka manghosi piyye Kiptʼattenu okayettaasi iyiʼeppa poghonki tupettay paappo huusundhi innapayi:
“Into hatukka ashshindhapa mangho takkaya ine pitamanku.”
3 Yihudha kapay paappo huusuna hasinna payipa nu holasu:
“Ata kulay qhawhusa hasi inena payipa toomooma ine dhihamu:
‹Apayni qaso hahundhitaakki huni okayonku payni inta yemiinteema itʼtʼuyonku.›
4 Apayini qaso hanisiki aʼine qalle laghghiti payni an ashinanipa ho manghosi pitamani.
5 Atu wooti payni inekka piyisaasa ini ashine.
Qhawhusa iʼinena payina:
“Apayni qaso haahudhiki yehune qale okayu payni minte thayusa intha itʼtʼuyonuku.”
6 Israelekka hasinna payipa nu holasu:
“Kulay hune yela dhappi!
Monukka ‹qaso pilakko an sheeghni› paytepa qhawhusanu qallanku?”
7 Usundhekka hasinna paye:
“Kulay qhawuhusa qhoota haanipa qhoota ahxke hani kaaʼita hasi payipa uuma ine kasqadhu,
‹Paappo haahundhi iʼqagha?
Qaso pilakko asheeghanku inta?›
Inekka hussa maallakki an hasa payinipa nu holasani,
emma uso qhamu inena payinina qasusa hahundhisi akkapa okaayyankutassa mala an arre alkasne?”
8 Yihuta kapay paappo huusuna hasinna payi:
“Miʼayeesi yeema marraʼapa aminakalte ashshine,
apayni hasa ankonni payni inepa atho pana dhelle haani kaasay laaqe ine poghinana kalla an pininaaniye.
9 Miʼayi kapa ano nakapa kodhdhinaye,
qhoota huusu kapeema ano kasqatamna,
usosikki anu nakayhottay holuttappa homintta shikarasha payni perre haayyu qaghito kaasay ayetta ooyi.
10 Hasa ghaqqitiki ini oladhooni payni ahxay haka hantu saasa lakkittakki an hxafnippa holaanni.”
11 Xaysa tupettay paaposi huusundhi Israeele hasinna payi:
“Hasi kodhdhiti payni,
qhawsa piyisa rafisanu awsho xeesa piyye thaanina awshana:
pelesea takkasapa sakmo takkasapa kʼimamaadhdhepa kerpepa temire pana lewzeesi surpaadhdhe hahundittay nu dhoqhindha.
12 Pirraadhdhessi surbhidhdhe haahundhina kittate tayamadhe qhooti holase hune gheeqasi maallay pirraadhdhessi na padhawapa dhoqhadhoku,
yaxaray pirraadhdhisa surbhoidhdhe hahudhina pakkeete taymadhe he dhappameppa okayonkiye.
13 Qaso hahundhisikka akkapa waadhettay qhawhosi kula ashonku.
14 Simioonepa Piniyaameesi qhama holtetannu Waakossi Olho Kaasay Alkasa hxurakko huusuttay ihune saqako qhawsana horxisa.
Karay miʼaadhe haayyusiki an dhapi payni moʼo an konni,
olho uso payisikki an akkanniye.”
15 Hussa maallay korossi teexakosippa piradhdhesi inna padhaweesi iʼakkeppa Piniyame illay waadhettay piyye Kiptʼatte kula ashshanki,
haaha hxafonkippa Yoosefe minteema itʼtʼuyonki.
16 Yoosefe Piniyaameesi iqharumaadhdhe huusu qale hiʼina waannittosi manne huusunakki ooqipa na payu:
“Koruusi manne kulla ashshattay,
kuyyu qhooti ye qalle piifanne maallay aqholte toote saqhapa piife gharisu”
17 Hayampakosika qhamossi Yoosefe nu qalli kulaki korosiisi ho Yoosefe kula ashshittay.
18 Usundhekka qhoota ho Yoosefesa aʼusundhe ashshita maallay ighghaapepa isi hasa illena papaya:
“Olhunna maallay hassa kula ine okaasi illakka pirradhdhessi qharro an hassanu holaanina surbhoaadhdhe haanina kittatte tayame malla perinna?
Qhawhu olokukki inena konnipa ine kittesuppa aylaadhdhe huusu ine kodhuppa harraadhdhe haanisikka inena sixukki woʼina?”
19 Hussa maallay hayampakkosi ho Yoosefenna manneete kodhadha kulakki itʼtʼuyeppa manneete mankaxeema qallatesonki,
20 hasakka na payonki:
“Pogholho haani!
kulay xayna qharʼaita mangho pitamenukki an hassa kula okayni,
21 naqharray manne anna rafnaanisa an sallanipa surbhidhdhe haanisi ishshighoninna surbhidhdhe haani kaasanna pirradhdhesi haani ammooruynettay usundhessiki gheyya.
Haadhi hantu an hollittay.
22 Holluppa pirradhdhesi an hantu manghottay pitmanaaniisikka anna kala dhooqhanni.
Kuyaqakusanakka qhawho pirradhdhisaasi holipa surbhidhdhe haanisa ine yaku ini arri.”
23 Hayampakkosi manneetekka inna payi:
“Haay ologhaape!
Ho pirraadhdhisa surbhidhdhe haahundhisa hune teexi Waako haahundhipa ho paappo haahundhina,
ano payni an hunena akki.”
Xaysa tupettay Simoonetakki usundhe kula okayi.
24 Hayampakkosikka korosiisi manne Yoosefe kaleemi xulleesipa qandhe ihhela luhhettay shoxneesi nu tteexu,
harraadhdhe huusundhinukka qashko teexu.
25 Qhamu haaha piifannessa qhootanu qalli maallay Yoosefe haaki saate piifattena okayni saasa teexakkosi innu okayetay nu teexenenukki gharsadhe.
26 Yoosefe immanne kaleema xullina kompossi uso qaghi kaleemi xulleppa teexakkosiisi nu teexonki,
haki mintettay piyyatte hxafne saasa kahhonkippa nu xasonki.
27 Usokka nakayhunte thuusundhiisi inna kasqadhi tupettay hasinna payi:
“Paappo haahundhi qhamu keeshuyi ayye qallitenna innakaysadha?
Hantukka iqagha naʼa?”
28 Usundhekka innu holaseppa na payonki:
“Kodhampakko haahu paappo haani iqqagha,
holuppa innakaysadha” Kippayeppa hantukka piyyema kata payonkippa nu xasonki.
29 Yoosefekka iʼusundhe eemana miʼayessi yaayye thuusuna qaso huusu Piniyaameesiki hiʼipa:
“Qasosi haahundhi ayye qallite husi?”
na payuppa kasqadhu.
Piniyaamenakka:
“Miʼaye haayyu,
Waako ho saki” kinnapayi.
30 Yoosefekka qaso huusuusi ihhiʼina qhooti uuma nu dhakaati maallay miinakalti na kaanta laghghamipa kompo kitteema xuluppa ooyoy.
31 Immiinte hela shoxi tupettay lighu,
he dhikitisupa piife qhamu itʼtʼuyintinukka hayyu.
32 Yoosefenuka qawiniki anu qhooti qharummaadhdhe huusunukka qaawniki anu qhooti,
korossi Kiptʼatte kuyyaqako kaasay Yoosefe qale yiʼanukka qawnikki aqhooti mo’o maalay payini koro piyye Kiptʼattena koro Iprawatte qali yiʼo yiʼi payni lokmeema qhooti dhihadhi maallay.
33 Qharummaadhdhe pana qaso Yoosefe qharunko wananu paayyatti haka qaso dhalqhaqhakko saasa illekaleemi uso minta qakkadhe,
qhamu malaala qakkadhesi ihhiʼenna idhdhahxeppa pukaqate pukaqate ille eʼemonki.
34 Yiitossi Ayoosefenu qhootina asixapa usundheesi isa padhaawa,
Piniyaamenu kapay usundhena kanta xargho hxupinki anaanu padhaawi,
onke hasa lighattay Yoosefe qale qukonkippa ille qale hxasodhonki.