Qarummaadhdhe Yoosefe Piyye Kiptʼate Kulakki Ashshe
42
Yaikʼoope qhamu mangho piyye Kiptʼattena qaghisi iʼapaqhina miʼaadhe huusuna inna payi:
“Ata moʼo akʼampaytteppa isa ille eʼeemanku?
2 Qhamu piyye Kiptʼatena mangho qaghisa an apaqhiye laaqe qhamu ye ine paaxintinu ashshindhapa piyyisana ine maangho pitamanku.”
3 Hussa maallay qharumadhdhesi Yoosefe hudhan mangho pitamenukki piyye Kiptʼate kula odhdhe.
4 Naqharay Yaikʼoope qaso Yoosefe Piniyamema olho magha na hxafna kippayipa ghapo maallay qharumadhdhe huusu qale ye erakukka.
5 Laaqe piyye Keneʼanesa qhooti hammaatti maallay dhelle Yaikʼoopekka korossi maangho pitamenu karo Kiptʼatte ashsha qali moruye.
6 Xeerisana Yoosefe rafisampakko piyye Kiptʼattena,
koro piyye qhatʼe kaasannukka honu mangho lassa uso.
Qharummaadhdhe husukka inna kaanta hxafenna uso minteemi itʼtʼuyeppa haki mintettay piyyatte hxafine saasa kahonkkippa nu xasonki.
7 Yoosefe qharumadhdhe huususi iʼhiʼina iʼusundhe upadhi,
naqharay qhawho ye usundhe arri kulakki kodhdhipa mirattay hasa napayuppa kasqadhu:
“Ata ahanukka okaayte ?”
usundhekka inna payenna:
“Maangho pitmadhenuki an piyye Keneʼanenu okayni.”
8 Yoosefe qharumadhdhe huususi iʼuppadhi usundhe kapay ye uso upadhonki.
9 Ulsinkesi qhoota qharumaadhdhe huusu kaaʼita iʼulseedhi hela taayipa na payu:
“Ata huni koro qiwa akkodhinte perina,
olhonna maallay okaaytekka xayto piyye thaanina tardhiisi qiwenu.”
10 Usundhekka inna payenna:
“Akko pogholho haani,
ine kodhanpawhe haahu mangho pitmadhenukki an okayni.”
11 “Ine kaasay kulay miʼaadhe appa toʼokito,
kodhampawhe haahu dhukampawhe dhishay koro qiwadha qandhi.”
12 Yoosefe kapay inna payi:
“Hasa qandhikka!
Hune olho anna maallay okayte piyye taanina bhaaqhqhe anattay rakko ineema okasinteesi qiwenu.”
13 Usundhekka inna payenna:
“Ine kulay kodhampawhesi haahu piyye Keneʼanenna qaaka,
miʼadhe appa toʼokito,
ine qhawho hudhanpa lakki qharumadhdhepa qasawhadhdhe.
Qaso haani takkaya pappo qale,
qaso haani tookko ippatti.”
14 Yoosefekka inna payi:
“Anhune qalla kulay!
Hune koro qiwadha,
15 qasusa hahundhi takkasa haaki okayni saasa xayna qhamu huni leehinttennu makaxko Fereonetaki an akutadhi,
yaxunko haahundhikka husitakki aramni.
16 Hunena kittatte qhawho toko erakapa iʼashshi qasusa hahundhittay okayu,
hune he haqhte olissa aʼqalate qhamu dhukke kodhi saama haaki aramnipa ahunesi hxuru saasa hune mane shappetesa aʼolatte,
kapay qhamusa aqalite kulakki ye kodhdhu payni makaxko Fereoonetaakki an akutadhi,
hune kaasay koro qiwadha.”
17 Xaysa tupettay usundhe kaasasi kuyyaqako izzaxaki manne shappete kitta oltisi.
18 Kuyyaqako izzaxana Yoosefe inna payi:
“Ano qhawho Waakoosi ghaapa qhoota kodhdhi maallay olisikki akkotte payni qagho haahundhiisi appinnisnaku.
19 Hune koro dhukatte akkodhdhite payni hunena kittatte qhawho tokko ihhassa manne shappete kitta ghayipa hune tokke mankosi dhoqhonkuppa ahxkadhdhe haahundhi laaqoodhennu ashonkutay.
20 Hune kapay qaso haahundhi takaasasi okase hune gheqasa,
onke hasa lighattay ollho aqqalate kaasay qhamu dhukke kodhdhisa iʼaramnaye,
fartatte kallakka appininanku.”
Usundhekka olisa kodhenu inna ghare.
21 Pukaqate pukaqatekka hasa iʼillena papayyanki:
“Karayikka dhappitessi an qaso haanisa koni maallakki an kʼatʼamni;
irrakadhipa qhoota qagho huusunu isi ine watadhana ine kappay inina apaqhasooni;
hussa maallakki rakku ineema hxafi.”
22 Ropelekka inna payi:
“Miʼayinna olho magha olo nakodhe,
anu payuppa hune qalla?
Hune naqharray hune ye apaqhonuku,
hussa mallay kʼeqhette tuusu xarghghe haaninakki kasqatamtti.”
23 Yoosefe hu usundhe qallateesi qhawho pako ishshighattay qhooti kodhdhi mallay olhu qalladheesi qhamu apaqhisa usundhe ye aronki.
24 Yoosefe usundhena kaanta illaaghamipa oyoyi;
holuppa laanka usundhe kula okayuppa torrosadhu;
inni exxettay eemana Simooneesi usundhena kittatte ghapuppa shapu.
25 Yoosefe kodhanpawhesi huusuna hasi napayipa usundhesi hayyu:
“Korussanu manghosi surbhidhdhe huusundhisa nu yakapa kodhatte tuusundhisikka nakitematte nu shapanku,
kallqe iʼonkeʼitha yinesiʼika nu teexanku.”
Ahusaasi nu kodhi tupettay,
26 qharummaadhdhe Yoosefe manghosi ippitmadheesi harraadhdhe huusudhisa iffeppa ashanko ghapasonki.
27 Qhoota iʼonkeema na awnuyti maallay xayto inna rafneesiki ghapadhenna usundhena kittatte qhawho tokko harenu manghosiinna hxuppenu isurbho ishighana manghosinna kittatte kodhatte shapankotaakki tayi.
28 Usokka qharumadhdhe huusuna inna payi:
“Ata kulay kodhatte tayusi aye holasi,
haadhi kulay surbhoo hayyuna kittatte an tayi!”
Kippayipa usundhessi qallu,
usundhe kaasay iʼmmurukeppa isi ellena payana:
“Ata Haallikko muʼina okasni?”
29 Papposi huusundhi piyye Keneʼanena qagha Yaikʼoope kula holonkippa inna kantta hxafenna ollho na hxafi kaasasi hasa payonkippa nu torryonki:
30 “Rafisampakko piyye Kiptʼattena ine koro qiwadhenu okayisa iʼine dhihipa miirattay ina qalladhu.
31 Ine kapay anna payni ‹Ine koro dhukampawhe dhiishay koro qiwadha qandhikka.
32 Inne qhawho hudhdhanpa lakki miʼaadhe Appa toʼokito,
miʼaye tookko ippati,
qaso haani dhalqhaqhakko piyye Keneanesa pappo kapeemi haqhi› kanna payni.
33 Rafisampakkosi piyyisana hasi inena payi:
‹Dhukampawhe kodhdhe haahundhisi husittakka an arri,
hunena kittatte qhawho tookko hassa ye kapeema haqhapa hune tookke piyye thahundhi kula ashshonkuppa ahxkisa hahundhi laqodhennu mangho dhaghghaposanku.
34 Naqarray qasussa haahundhi dhalqhaqhakkosi yekula okayattay.
Xerisana hune koro dhukatte dhiishoy koro qiwadha qhamu huni kodhonkkusa an hune araye,
qhawhusa hahundhisikka an holla hune teexa,
hunekka lammi piyyinna qhamawote kula na lallaghamesi aʼalkasnaku.›”
35 Xaysa tupettay mangho huusundhiisi surbhidheete ituqhqhenna surbhiadhe huusundhina kittatte pirradhdhe shapnettakki na taye!
Usundhepa paappossi huusundhi pirradhdhe holtiisi tayenna immuruke.
36 Xaysa tupettay paappo huusundhi inna payi:
“Ata kati miʼaadhe haayyu toʼotteema an dhapnika woote?
Yoosefe ippati,
Simonekka ye qaghi,
holluppa hantukka Pinyamesikki aʼakke wote.
Ata husi kaasay moya hxafi!”
37 Roopele paappo huusuna hasinna payi:
“Piniyaameesi harghghe haayyusa texepa apayni anu hokula holutta payni shanbhidhdhe haayyu lakkisi sixipa paaxay,
hussa maallay an hollapa holattaye.”
38 Yaikʼoopekka inna payi:
“Moʼokaki kodhinti payni miʼayi ye hune qale ashshinikka,
qharunko huusu iffari,
uso pattakki haqhi,
ata onkeema olokku nalighghadhu payni kati ooyettakki an keeshana kalla perre haayyu poghghinipa hawle kula odhdhakki ayela woote?”