Yoosefe Qhamu Ulsinke Fereooneesi Ishighi
41
Perkko lakki tupettay Fereoone ulsedhi,
ulsinkisakka ayyi kati kolle Apayenna hinaaseeti shikkaarina
2 loʼidhdhe he pishkko huusundhi na xeesipa he kokkoope taxxanki kollesina lighipa isi qashko dheetanakki hiʼi.
3 Nakaleemattekka loʼidhdhe meqhqholawhepa he nanaype pilawhe holipa kollesinna lighonkippa loʼidhdhe tokkeesi qharaʼitha kollatte hinasete qagha kapeema shikkaronki.
4 Loʼidhdhesi pishkko yena xeesipa meqhqholawhessi hessi xeesomapa kokopeesi iʼlloqhqhe.
Hattay pogholhossikka piʼathatte ithayri.
5 Holuppa lanka piʼathe uso akkinna ulsinke pile ihholi ulseedhoy,
ulsinikisattakka kartalite manghitakkito toottatte sappeete qhatʼtʼitte taxxan he mala xeesooma he kardhdhesikki hiʼi.
6 Nakaleemakka qhatʼitte taxxan he uruuressi xayto oqhqhaye lighanna koru okaayya shoqhti tishsheesikki hiʼi.
7 Qhatʼtʼesi tishshe taxxan,
hessi kardheppa gharonkisi illoqhqhe.
Fereoonekka iʼppiʼattatte tayrina qhamu ulsedhisa ihhela taayi.
8 Sinkatho iʼrafttatte haqina kʼalpe tuusu inna xarkishamti,
hussa mallay bhaasannolawhesi piyye Kiptʼattena qaghapa arnanampawhe kaasaasi iʼoqasipa ulsinkesi huususi nu torruyu,
naqharay ulsinkesisi qhawho ishighe alkasi toʼokokakki ye qaghi.
9 Kuyyaqisana wanittosi koro tʼayye itʼtʼoosana Fereoonena hasinna payi:
“Dhappite an kodhiisi kuyyu an hela thaayi.
10 Kuyyaqako tookko Fereoone yeemapa waannittosi manne yiʼitosa miiroodhipa mannesi hayampakko tiqitampawhattesa ine shappoy.
11 Ine lakkikka awune tootte ulsinke pile pile ulsedhooni,
ulsinke hanikka ishighe qawni qawniki sheeghe.
12 Xinkisana ayyiltto hayampakkosi tiqtampahattena Yoosefe ana payi iprawttoskki ine qale manne shappeetena qagha.
Ulsinkessi haani pukkaqatte pukkaqatte an ulsenesi usosiki an toruynippa uso ine ishshighoy.
13 Olho kaasay qhamosi uso qalli kulakki dhikadhi,
ano kodhimosi hayyu qharay kula qhamunku an holinukki iyeesi qalli,
wannittossi manne yititonakka qhamo asipisni nu qallu.”
14 Hussa mallay Fereoone Yooseffesi qhamu okasnenukki haayi,
usundhekka haattay manne shappeetena kittatte ghaponkippa okayonikittay,
usokka ikkaso hela qhitʼasipa maahxe urkuytate oohadhu tupettay pogholho minteemi iʼitʼtʼuyi.
15 Pogholhossi Yooseffena inna payi:
“Ulsenkesiki an ulsedhi,
naqharay yaxakka ishighe ye alkasuy,
atho kapay qhamu aʼulsenke ishighe alkastisa an apaqhi.”
16 Yooseffekka inna payi:
“Kulay ano ulsinke ishighe anu alkasi,
naqharray Waako ulsinke Fereonesi parema iʼishighina.”
17 Pogholhossika hasinna payi:
“Ulsenke hayyukka kati kole Apayenna hinaaseete an shikkaripa
18 loʼidhdhe taxxan he pishkko husundhi na xeesipa he kokkoopekki kollatte kittatte lighipa isi qashkko dheetanakki an hiʼi.
19 Nakalakka loʼidhdhe pile taxxan he meqqe husundhi haaki na armane saasa nanaypekki kollesinna lighi,
piyye Kiptʼatena aparay loʼidhdhe hissa kula korito magha anu hiuy.
20 Loʼidhdhessi nanaypeppa aʼeemanakka isi korito magha hessi taxxan kokkoopeesi illoqhqhe.
21 Illoqhqhe tupettakka qhamosi qharro kula he nanaype qhooti kodhdhe maallay yaxakka qhamu loqhqhesa ye upannikka,
saatisanna anokka piʼatatte an tayri.
22 Qhamussa kula hantukka ayyi kati kartalitte manghitakkito tootatte sappeete fittakko taxxan ho kardhipa ho mala xeesaasikki an hiʼi.
23 Nakalakka fiittakko taxxan ho oqhqhayye mandhito shoqhtipa tishshu tishitte taxxanki ye armadhi.
24 Fiithossi Manghito tishshi hossi kardhisikki loqhqhi,
ulsenkesi an hiʼiisi bhasanolawhenukka qalla naqharay qhawho ulsinkisasi ye ishighe alkasi ye qaghikka.”
25 Yoosefekka Fereoonena hasinna payi:
“Ulsinkissa lakkina ishighe thuusundhi toʼokke,
Waako olhu karo miinatte konnisikki ho hiʼaasi.
26 Loʼidhdhissa taxxan xeesooma perko taxxan,
fiithakussa tishatte taxxan xeesoomakka perko thaxxan,
ishighe usundhissa lakkina toʼokke.
27 Loʼidhdhissa nanaypoome korito magha taxxan na kaleema lighekka perko taxxan,
holuppa fiittakkussa taxxan oqhqhaye mandhito shoqhtipa tishshukka perko taxxan,
ishighe usundhissa lakkina toʼokke,
hussakka perko taxxan ho laaqatte.
28 Qhamossi anho qalli kula Waako olho karo miinatte konnisikki qharaʼitha ho hiʼaasi.
29 Piyye Kiptʼate kaasasa perko taxxan ho dhalxankito okaaya.
30 Xaysa tupettay perko taxxan ho laaqatte okayna,
laaqissakka qhooti piyisi uuma kottaʼinti maallay perrissa dhalxankito taxxaniisi ahela taymoonna.
31 Perrisa dhalxankito tupettay perre laaqatte na kalama okayna he uuma koro qootʼuyna qhooti kodhdhine maallay perresi dhalxankitoosi ahela taymoonna.
32 Ulsinkisa olhunna maallay Fereoonenu onke lakkittay armadhe Waako qhooti dhikkisi maallay,
Waakokka olissaasi xeere qhacʼana kittatte idhdhikkisni.”
33 “Lammi Fereoone qhawho arnane sheeghapa ho taayho sheeghaasi ighgheeqapa miinakale waarsho Kiptʼatte kaasanu xawwadhu.
34 Qhamussa kula Fereoone koro maanghussa perrisa taxxan dhalxankitona tayamenna xarghgho hxupinna tookkoosi sooqnapa illa holasusi ixxawwadha.
35 Usundhissakka maangho perrissa dhalxankito taxxan okaynana tayamannaasi iʼilleema holaseppa katamaadhdhe kaasasa righghe kitta yakonkippa tiqadhonki.
36 Manghusa aʼilla holasnikka perrissa laaqatte taxxan karo miinatte piyye Kiptʼatesa okaynanu axawwadha,
onke hasa lighattay piyyi laaqatte kala iʼppehnay.”
37 Olissakka Fereoonepa kodhanpawhe huusu kaasay olho xeesa ippayeppa akkadhonki.
38 Fereoonekka lammi hasi payipa kodhampawhe huusu kasqadhu:
“Qhawho Yoosefe kula qagha ho Nasso Waakito na qaghi yaxasikan taynaani?”
39 Hussa maallay Fereoone Yoosefena hasinna payi:
“Waako qhooti olissa kaasay ho hiʼaasi maallay qhawho qhamo haahu kula arnanepa thaayho sheegha ye qaghi.
40 Atho Manne Ahxase thaayyu na ho ghula akkodhdhinti,
waarsho haayyu kaasakka waanunko haahunukki eeʼe payni,
ano olho an hola ghullittay qakkate thaayyuttay patta.”
Yoosefe Piyye Kiptʼatesa Axawwadhi
41 Lammi Fereoone Yoosefena inna payi:
“Haadhi kuyyunnu koru piyye Kiptʼate kaasasa rafisampakko anho kodhi.”
42 Fereoonekka tʼukitte maathama na qaghiisikki ghoqakito hela yukipa ghoqakko Yoosefessa qadhdhu,
holuppa laallesia kanastateesikka uso urkeesu,
hapilesi awarkʼatte kodhdhiisi amooma nu qadhdhu.
43 Kareete pogholhito lankassa qhamu qakkani kodhu,
tiqitampakosi pogholhitokka qharaʼithi iʼinthawipa hasa payuppa isi saluya:
“Korunka nu kilipa” Yoosefe onke hasa lighattakki apiyye Kiptʼatte kaasasa xawwadhi.
44 Xaysa tupettay Fereoone Yoosefena inna payi:
“Ano Fereoone;
yaxakakki piyye Kiptʼate kaasanna hayo haahu malettay olho toʼokokakki ye konni.”
45 Fereoonekka Yoosefena:
“Tʼafnate Peinahib” kinna payipa nu makaxako kodhu,
holuppa qhawhosi kathama Heluyutenna kʼeesitto kodhdhi an payi Potʼifeerana shette thuusu Asnatesi nu akku.
46 Yoosefe ippogholho Kiptʼate Fereoonenu kodhadhe payina perko udhanko isexki hxafasi,
Yoosefe Fereoonena kanta ilighipa piyye Kiptʼate kaasanna lallaghamoy.
47 Perkusa taxxan dhalxankitona kittatte piyyekka awsho kishasikki awshasiti.
48 Perrisa taxxan dhalxankitona Yoosofe manghosi piyye Kiptʼate kaasanna awshisi iʼilla holasipa kathamaadhdhe qagha kaasasa yaku,
mangho katamaadhdhe kaaʼitha pashsheete awshi kaasasi qhama illa holasninu kodhu.
49 Onke hasa lighatay Yoosefe mangho qhamo taxakkosi kollate kulakki illa holasi,
mangho uuma naqina payyatti qhamu mala ghaqiti qaghisa bhatʼepa are ye alkasu.
50 Perresi laaqattena qharaʼitha,
kʼesitosi katama Heluyotena Potʼifeera an payina shette thuusu Asnaate Yoosefenu shampo lakki innu dhalti.
51 Yoosefekka:
“Waako rakko haayyu kaasappa manne paappo haayuna qhama anthayymoninukki ye kodhdhi” kippayipa miʼaye huusu qharithosinna makaxko huusu Minaasec nu kodhdhu,
52 Qhamusa kula:
“Piyyessi anna rakkadhisa Waako miʼaadhesikki yeessi teexi” kippayipa mi’aye lankannu makaxko huusukka Efremed nu kodhu.
53 Perresi taxxan dhalxankito piyye Kiptʼattena iʼdhdhikadhe,
54 Yoosefe qharaʼitha qhamosi iʼqali kula,
perresi laqatte taxxanki xule paaye,
piyadhdhe qagha kasaki laaqodhi,
ikkodhitama kapay piyye Kiptʼate kaasanna yiʼo korossi hxafna qagha.
55 Laaqesi piyye Kiptʼatesa innaqati,
waarsho Fereoone kulakki okayipa:
“Ollho ayyiineesi ine teex!”
Payuppa riiru,
Fereoonekka inna payi:
“Yoosefe kula ashindhapa olho uso hunena payiisi kodhanku.”
56 Laaqe piyye Kiptʼatesa naqi maallay,
Yoosefe riighghe kaasaasi iqhqhaqhashipa manghosiisi waarsho Kiptʼatenu qhama lassini kodhu.
Moʼo maalla payni laaqe maghatte qhooti piyye Kiptʼate kaasasa hammatti maallay.
57 Laaqisa qhooti piyye qhaatʼe kaasasa hammaatti maallay koro piyyaadhdhe kaasanna Yoosefena kaanta qhamu maangho pitmanenukki karo piyye Kiptʼate kula okayi.