Yoosefe Qhamu Ulisinke Koro Shappmana Ishighi
40
Xaysa tupettay wannitto koro tʼayye pogholhonu itʼtʼoosanapa ho manne yiʼitona wannitto kodhdhikki pogholho piyye Kiptʼattena dhappi.
2 Fereoonekka waannitosi koro tʼayye itʼtʼoosanapa hossi manne yiʼitona wanitto kodhdhisa uuma inna miiroodhi.
3 Hussa maallay xaytossi hayampakko tiqithampawhatte qaghi mannessi Yoosefe nakalla shapami kulakki xullesipa usundhe shapu.
4 Hayampakkossi tiqithampawhatte Yoosefeemi usundhe teexi,
Yoosefekka olho gheeqasa kaasatakki usundhe kʼarkʼaari,
immanne shappeetesa kuyyaqe qhacʼa oladhe tupettay,
5 wanittossi tʼayye pogholhonu itʼtʼoosapa wannittossi mane yiʼitonaki awne tootte ulsinke qawni qawni ulsedhi,
ulsinkissa usundhe lakkina qawni qawnikki isheghe sheeghe.
6 Haqhayna sinkato Yoosefe ikkompossi usundhena qaghe kula xullina he dhahxhxasi hxafi.
7 Hussa maallay Yoosefe hasi payipa usundhe kasqadhu:
“Ata kuyyu moʼo mala payipa miinte hunena kumippa isa dhahxhxanku?”
8 Usundhekka hasi payeppa nu holasonki:
“Kulay ine lakki awni ulseedhipa qaawuho ulsinkissa ine ishighna dhapaani.”
Yoosefekka inna payi:
“Qhama ulsinke ishshighninu ho koro alkase teexa Waako qandhi?
Into ulsinkissa haahundhi ye qalla.”
9 Hussa maallay wanittossi koro tʼayye pogholhonu itʼtʼoosana hasi payipa ulsinke huusuusi Yoosefenu qaallu:
“Ayyi kati yela miinatte dhishtakko woynate qagha.
10 Dhishtakussakka saante izzaxki sheeghi,
miinakaltte kʼuraqoppa pisoy,
xurkukisa husukka kardhonkippa awoshonki.
11 Holuppa ayyi kati maahxatto Fereoone na qukute qukiisikki an xarghgheete sheeghi,
awshitakkossi woynateesi yuuttapa mahxattossisa tʼiipopa Fereoonenu xarghgheema teexa.”
12 Yoosefekka inna payi:
“Ishighe ulsinkinna haadhi hisi,
santissa issxe kuyyaqako issxe.
13 Kuyyaqako issxana kittatte Fereoone shappeete ihho lihasnapa karo wanukossi haahu qharro kula ho holasu,
qhamossi qhqharro awanitto tʼayye itʼtʼoosa kodhdhitipa isa kodhadha kula hantukka shullo Fereoone na qukte qukiisi aʼakkinappa Fereoonena xargheema teexay.
14 Lammi xinke ihho ghartina ye dhihadhapa olho xeesa ye kodhay,
qhoota haayyuusi Fereoonenu qallipa manni shappeetena ye lihsasay.
15 Ano piyye Iprattenu ho an hassa kula okayi aye lasi,
hantukka payni olho anna maallay hassa manne shappeetesa xulli olho toʼokokka anu dhappunna.”
16 Wannitosi manne yiʼitona ishighessi ulsinke wannitto tʼayye itʼtʼoosanu aqalli qhamu koro hxasesesa iʼapaqhina ulsinke huususikka hasi payipa Yoosefenu qallu:
Anokka an ulseedhipa ayyi kati koochcho yiʼito issxki an pukkaqateema dhooqhi,
17 kochcho saappe ghutu qaghana yiʼo pile pile ho Fereoonenu agharisi na qagha,
aaghe hoolottay haqakka isi yiʼosi yela pukkaqatte sappete qaghana yiʼa.”
18 Yoosefekka hasi payipa nu holasu:
“Ishighe ulsinke haahuna haadhi hisi,
kochchussa issex kuyyaqako issex,
19 kuyyaqako izzaxna kittatte Fereone manni shappeetena ihho lihasna,
ihhola pukaqte ghoxasi tupettay kaarkko saappeema ho sipisuppa aaghe hoolottay haqa sakanko haahuusi yiʼonki.”
20 Kuyyaqako issxanna Fereoone kuyyaqako inna dhaladhi qhooti kaanasni maallay kodhampawhe huusu kaasannu yiʼosikki gharisi,
kuyyaqakussana wanittosi koro tʼayye itʼtʼoosanapa waannittossi manne yiʼitona qhamu shappeete lighneppa kodhanpawhesi miinteema itʼtʼuyokinukki kodhi.
21 Wannittossi koro tʼayye itʼtʼoosana karo kodhmossi huusu qharro kulakki holasi,
usokka qhamossi qharro kula quktessi tʼayyateesi Fereoonenu xarghgheema teexe paayyu.
22 Naqharray wannittosi manne yiʼitona kapay qhama sipisninukki kodhi,
olho kaasay qhamossi Yoosefe ulsinke huusundhi ishighi kulaki kodhdhi.
23 Wanittossi koro tʼayye itʼtʼoosana kapay Yoosefeesi yehla thaayumma ithaymoodhi.